“Mamaday”嘅黑色幽默曾令你我回心一笑,仲記唔記得一入門口嘅「愚蠢的人類」打卡位,見證大家嘅愛情友情。由2019年開業至今,猶記得大家耐心地等位等食嘅畫面,一切一切都令團隊好感動。
人來人往,“Mamaday”老店始終受不了香港昂貴租金要講再見了。團隊會努力經營至7月,於最後時光同大家好好告別,希望各位再次蒞臨支持。往後寄望於 “GoodDay BadDay MamaDay”、“Wish You A Mamaday”同大家未來見。
![](https://www.openrice.com/userphoto/CMSContent/0/8G/001O3Z32F0F091B49C5CE3j.jpg)
由2019年開業至今,大家嚟到一定打卡嘅「愚蠢的人類」。
![](https://www.openrice.com/userphoto/CMSContent/0/8G/001O40CAD42137319B4630j.jpg)
老闆用心砌嘅Lego牆,一事一物都係回憶。
【老店最後時光 | 芫荽控】
就算步入倒數時光,“Mamaday”依然用心創作最後限定系列—「芫荽控」同大家告別,並特地選用本地有機芫荽,好感受到團隊真心不捨同用心。
![](https://www.openrice.com/userphoto/CMSContent/0/8G/001O410D82662A4405C89Aj.jpg)
“Mamaday”告別作「芫荽控」,用心回饋食客多年支持。
健康荽選層層疊窩夫沙律$108
手工窩夫一直係“Mamaday”限定人氣單品!! 堅持自家製作窩夫漿,兼且即叫即焗先做到咁外脆內鬆軟。
於最後嘅芫荽控系列,團隊就幫你健康荽選咗食咩好荽最健康喇。呢個健康荽選層層疊窩夫沙律用窩夫夾住火龍果、牛油果扮漢堡,搞鬼搞怪又幾清爽滿足喎,鬆軟窩夫比平時嘅漢堡包仲吸引呀。配埋柚子油醋汁沙律,一啲都唔膩。
![](https://www.openrice.com/userphoto/CMSContent/0/8G/001O4235655E81C41593EDj.jpg)
用窩夫、火龍果、牛油果扮漢堡,鬼馬呀你。
![](https://www.openrice.com/userphoto/CMSContent/0/8G/001O43CBF09742857C4548j.jpg)
好有新鮮感嘅素食料理。
吾系幾荽窩夫$108
如果你都係“Mamaday”手工窩夫Fans,足足有4件窩夫嘅吾系幾荽窩夫好值得食。每件窩夫都有3重芫荽—芫荽窩夫漿+芫荽吉士醬+新鮮芫荽,芫荽無孔不入!! 全系列均用本地有機新鮮芫荽,兼且全手工製作窩夫,只係$108絕對誠意之作呀。
細心留意,就會發現每條窩夫坑紋都加咗花生糖!! 食落甜甜地、脆卜卜幾有層次,有啲似九份嘅花生糖雪糕㗎。
![](https://www.openrice.com/userphoto/CMSContent/0/8G/001O442E4E236D3D44AB53j.jpg)
每條窩夫坑紋都加咗花生糖,脆脆甜甜幾特別。
芫荽蕃茄雙蜆意粉$158
嚟過都知“Mamaday”廚房空間唔大,但依然無阻團隊對細節用心。好似呢道芫荽蕃茄雙蜆意粉,單單意粉就分開煮2次做到彈牙口感。
而且海蜆唔會預先煮好,「紐西蘭花白加越南海蜆」即叫即煮特別鮮甜㗎。滿滿嘅秘製芫荽醬料更需打製1個鐘,食嗰陣真係值得汁都撈埋。
![](https://www.openrice.com/userphoto/CMSContent/0/8G/001O45C8D3665F9F9E49B7j.jpg)
用泰式蝦片分隔海蜆同意粉,方便試勻2款口味兼汁都撈埋。
荽荽哋戚風蛋糕$68
芫荽控連甜品都唔放過,荽荽哋戚風蛋糕絕對比你想像更好食!! 戚風蛋糕好香綿鬆軟;上層忌廉又滑溜唔會太甜,無論口感、甜度都啱啱好。記住連埋芫荽薄脆、新鮮芫荽一齊食,真係食過最荽嘅蛋糕呀。
![](https://www.openrice.com/userphoto/CMSContent/0/8G/001O46572A26AEC3B615C0j.jpg)
自問芫荽控,點可以未食過新鮮芫荽蛋糕。
荽聲荽氣荽梳打$56
原來芫荽變嘢飲都好吸引!! 荽聲荽氣荽梳打用近期爆紅手打檸檬沖法,將芫荽、新鮮青檸即場手打,濃郁芫荽味好爽快。
走西(酒荽)沙冰啊唔該$56
想走西? 諗都唔好諗呀,最多幫你酒荽啦。將芫荽、西班牙紅酒打成沙冰,變成呢杯神秘趣味Cocktail。可以先飲一啖最底嘅芫荽沙冰,芫荽味爆勁!再撈勻輕甜嘅紅酒沙冰,又係另一種感受呀。
![](https://www.openrice.com/userphoto/CMSContent/0/8G/001O47B918AC99B34B9ED4j.jpg)
(左)走西(酒荽)沙冰啊唔該、(右)荽聲荽氣荽梳打
【味道回憶 | 本店經典限定】
講完最後芫荽控系列,嚟到最後最後……唔知你仲記唔記得“Mamaday”老店先有得食嘅有蟹GO又有蟹肉的蟹蟹蟹意大利扁麵,真係爆多蟹膏蟹肉;都幾辣的泰式打拋豬烏冬,靈魂係18種香料煮足4、5個鐘而成嘅台灣打拋豬醬;手工紫薯窩夫,唔只窩夫係手工製,連紫薯蓉都新鮮製作……全部都係回憶呀。
仲有仲有,真心抵食西班牙黑毛豬乳豬只係$338,足足4份1隻絕對夠幾個人Share。每隻乳豬都浸汁幾個鐘做到入晒味,豬皮仲燒到脆卜卜。
![](https://www.openrice.com/userphoto/CMSContent/0/8G/001O4852BDEC6B959615A4j.jpg)
西班牙黑毛豬乳豬足足有4份1隻。
![](https://www.openrice.com/userphoto/CMSContent/0/8G/001O4992B4CA1F77232A19j.jpg)
當年團隊多番試味,最終決定用呢種有肉又夠嫩嘅乳豬仔。
Mamaday
地址: 尖沙咀加連威老道29號信基商業中心2樓
電話: 23456856