每次經過尖沙咀山林道，都會畀夢幻藍色花花餐廳吸引住。呢間由黎巴嫩人Imran Khaleel開嘅“RUE DU LIBAN”，可以食到地道黎巴嫩菜。最近2025年11月推出咗新菜單，繼續有當地人飯前會食嘅凍開胃菜(Cold Mezze)、熱開胃菜(Hot Mezze)，好有風味。埃及人主廚Ahmed Menshawy亦設計咗一系列主菜—招牌慢煮牛肋條、香滑雞乳酪等，加埋傳統阿拉伯烤肉好豐富!!
主廚Ahmed Menshawy超過40年黎巴嫩料理經驗，亦曾喺開羅嘅喜來登酒店掌廚，之後又喺黎巴嫩、杜拜同好多歐洲國家工作，閱歷豐富。同時繼續秉承地中海健康飲食，加入各種乳酪、蔬果、香草、橄欖油。就算想瘋狂食肉，都可以食得健康㗎。
“RUE DU LIBAN”最新資訊/優惠
🔥2025年11月推出全新菜單 🔥黎巴嫩雙層下午茶 只需$88/位 (3pm - 5pm) |
尖沙咀藍色花花小店“RUE DU LIBAN”。
異國風裝潢配搭漫天花海，好IGable。
埃及人Chef Ahmed Menshawy擁超過40年黎巴嫩料理經驗，曾於開羅嘅喜來登酒店掌廚，擅長黎巴嫩古老食譜。
【即刻睇吓11月新菜單有咩食啦】
前菜｜
哈羅米芝士芝麻菜沙律(Halloumi Arugula)
超厚切哈羅米芝士，大大粒好軟Q，比平時嘅芝士多咗種微鹹奶香，絕對值得為哈羅米芝士嗌呢道沙律呀。當然仲有新鮮芝麻菜、番茄粒、洋蔥等等，食落好清爽同芝士幾夾喎。
哈羅米芝士超厚切軟Q。
凍開胃菜(Cold Mezze)｜
松露乳酪(Truffle Labneh)
當你見到一系列嘅開胃菜(Mezze) 選擇，就知點解黎巴嫩菜一直被稱為健康菜系。好似凍開胃菜(Cold Mezze) 就有多款鷹咀豆蓉、茄子蓉、乳酪等，軟綿綿口感開胃之餘，天然食材又有營養，嚟到一定要「入鄉隨俗」試吓。如果你鍾意希臘乳酪同松露，呢道松露乳酪一定係首選。
希臘乳酪同松露組合，有種獨特香味。
熱開胃菜(Hot Mezze)｜
香烤八爪魚(Grilled Octopus)
口感控一定要食嘅烤八爪魚，八爪魚鬚真係超大隻!! 加埋鷹嘴豆、番茄乾酸酸哋，好啱邊食邊飲酒。
超大隻八爪魚鬚。
塔布勒沙律(Tabbouleh Salad)
鍾意純粹嘅清爽蔬菜感，可以揀呢道有番茄粒、洋蔥、歐芹碎嘅沙律。特別加咗檸檬醬、紅石榴，酸酸甜甜一啲都唔單調。
檸檬醬、紅石榴成為呢道沙律嘅靈魂。
炸羊肉球(Kibbeh Bil Laban)
黎巴嫩菜有好多羊肉料理，如果食開羊嘅唔會覺得羶，反而會鍾意個肉味好濃。主廚Ahmed Menshawy特別加咗乳酪醬幾解膩，有時又食到松子仁嘅堅果味幾吸引。
黎巴嫩菜好擅長羊肉料理。
主菜｜
招牌慢煮牛肋條(Beef Short Ribs)
牛肋條經低溫慢煮，肉質真係軟嫩好多!! 切開嗰陣，真係輕輕用力已經骨肉分離，而且有種中東菜式獨特香料味。
低溫慢煮牛肋條好軟嫩，並有中東香料味。
香滑雞乳酪(Chicken Fatteh)
黎巴嫩料理真係好擅長用乳酪入饌，好似呢道常見嘅雞料理，加咗乳酪醬後令雞肉多咗種輕盈奶香，完全係白飯小偷呀！
香滑雞乳酪配飯一流。
傳統阿拉伯烤肉(Traditional Arabic Grill)｜
想感受中東飲食文化，不得不提傳統阿拉伯烤肉。推薦牛肉(Beef Kebab)、雞肉(Chicken Shish Tawook) 都燒到外焦內嫩。拎起肉串嗰陣，仲見到肉汁滴緊落嚟!! 烤肉Juicy得嚟又有香料味，配埋新鮮蔬菜食好正。
必試傳統阿拉伯烤肉，惹味又有肉汁。
【下午茶優惠$88/位】
每日逢3pm - 5pm，“RUE DU LIBAN”下午茶只係$88/位咋～ 呢個價錢已經包咗招牌小沙律、2款三文治、甜品、飲品。三文治有雞肉沙威碼/牛肉沙威碼/烤肉丸/法爾費爾款式揀，用咗奶油麵包幾香!!
雙層下午茶、靚茶壺都好精緻有Feel，而且“RUE DU LIBAN”掛滿花花真係好靚，下晝想搵個地方同老Best輕食傾偈就啱晒啦。
雙層下午茶、茶壺好精緻，用餐體驗圓滿。
RUE DU LIBAN(香港)
地址: 香港尖沙咀山林道22-26號地下A號舖
電話: +852 23102922