印度風味結合英國經典有咩新火花? 以印度文中的“Sepoy”(意指印度士兵)為名嘅餐廳—“Sepoy Mess”風格獨特，店內掛滿手槍，不過唔使驚真身只係火機(笑)，但依然衝撃視覺，玩味甚濃。
“Sepoy Mess”靈感來自英國殖民時期嘅印度，當時英屬印度軍隊食堂(印度稱軍隊食堂為“Mess”) 要滿足兩國軍人口腹，於是以印度食材及香料煮製，同時大幅減低辣度並加入英國風味，做出迎合每個人口味嘅料理，可謂由時代造就與別不同嘅英式印度菜。
店家牆壁更掛有當時英屬印度軍隊真實相片，由印度博物館慷慨提供。身處香港可以味蕾、環境感受當時軍隊氣氛，係幾特別嘅體驗。
Arancini Tikka Chaat
呢度小食就將印度經典Tikka，結合歐洲菜Arancini。Tikka以香料、乳酪混合而成，大受印度人喜愛；Arancini傳統以意大利米搓圓炸成米波波，外脆內軟。
“Sepoy Mess”設計嘅Arancini Tikka Chaat，就一反傳統變成香脆薯仔波波。內餡富印度特色，有滿滿柔滑布里芝士、鷹嘴豆馬薩拉、酸梅醬、薄荷醬。兩國飲食文化於口中爆發，相當過癮。
Masala Garden Salad
呢道沙律靈魂係印度常見嘅薄荷醬，將成熟番茄、青瓜、印度洋蔥混入新鮮芫荽。清爽微辛，食到印度食材嘅層次又輕盈得多。
Crispy Chicken Burger
“Sepoy Mess”融合印英料理，理所當然地有餡餅(Wraps)同漢堡包啦。相信好多人都係第一次喺印度餐廳食漢堡，入面嗰塊漢堡扒真係最驚喜。全因雞髀肉用咗香料醃製，淡雅香料味道會慢慢滲出嚟，再配搭熟悉嘅番茄、洋蔥、車打芝士。明明口感係漢堡，但味道又好似係印度菜嘅感覺幾奇妙。
Keema Masala Tacos
歐美周圍都食到嘅Tacos，餡料變成好香嘅羊肉碎，加埋傳統香料、番茄、新鮮香草做出清爽口感。羊肉分量好多，真係啖啖都係爆汁羊肉。
Tenderloin Skewers
呢度好多串燒都用咗印度香料醃，同平時串燒風味好唔同。牛柳串燒更另加芥末油、生薑、大蒜，未食已經聞到好香啦。
Afghani Ribs&Chips
相信好少人食過阿富汗羊肋排，24小時慢煮羊肋排以芳香印度香料、芫荽、薑、大蒜醃製。羊肉好嫩，直接拎住嚟食一咬就得。雖然香料眾多，但味道唔會好濃烈，有種柔和異國風味嘅感覺。
Mains & Curry
略嫌羊肋排唔夠啖啖肉，呢道羊膝一定滿足到你!! 羊膝肉事先浸泡喺印度克什米爾地區嘅醬汁。當地以豐富香料、奶製品為主，可以想像味道偏向濃郁奶香。最後加上甜中帶辣嘅茴香籽，香味獨特，好值得大家一試。
Royal Hyderabadi Biryani
如果要數呢度嘅招牌料理，不得不提Royal Hyderabadi Biryani。受印度海德拉巴(Hyderabad)嘅悠久傳統啟發，加入藏紅花突出香味，以味蕾感受當地文化。
Royal Hyderabadi Biryani有羊肉$238、蔬菜$178、鴨肉$248選擇。羊肉會用骨熬煮，增強風味；鴨肉則以洋蔥、番茄慢燉，味道較為溫和。
Sticky Toffee Pudding
太妃糖布甸係英國甜點，典雅擺盤亦相當有英式氣派。呢度會即席淋上咖啡，以甘苦平衡香甜，有種奢華而內斂感覺。
Sepoy Mess
地址: 尖沙咀柯士甸道西1號ELEMENTS圓方3樓R008號舖
電話: 23300316