次次去觀塘食飯都搵到驚喜!! 今次喺牛頭角地鐵站附近，就有間泰國主題food court—“Foodhall by Moon Thai”，前身係連續5年獲米芝蓮推介嘅上環傳統泰菜餐廳“Moon Thai”。觀塘店繼續由前泰皇御廚團隊主理，有鑊氣又有地道風味，價錢仲幾抵食𠻹。
觀塘新店“Foodhall by Moon Thai”，繼續由前泰皇御廚團隊主理。
呢度佔地5,525呎，泰國度假風主題裝潢，加埋落地大玻璃真係好有空間感。地方咁大好啱me time外，亦好適合畀大家帶電腦嚟做嘢/開個meeting，順便食個lunch兼飲杯咖啡幾chill(細心加分位: 部分座位有得叉電㗎)。而家仲有多項優惠，即睇詳情～
“Foodhall by Moon Thai”優惠一覽！
- 外賣優惠: 全日咖啡$20 - 3月優惠: 凡惠顧即獲晚市88折優惠券1張 - Happy Hour 3大優惠(每日3pm-8pm): 1) $198/2小時 無限暢飲 2) 每位送泰式烤雞肉串(1份) 3) 各式烤物額外8折，包括: 炸薯條、泰式豬肉丸串、沙嗲豬肉串燒、沙嗲雞肉串燒、烤香茅豬頸肉、泰式魚餅
(另收加一服務費) |
泰國度假風標配高樓底及落地玻璃，係觀塘區少有嘅唞氣空間。
座位舒服寬敞，部分座位提供叉電，歡迎大家帶電腦嚟做嘢同me time。
“Foodhall by Moon Thai”有4大區域畀你買嘢食:
- Bar(泰茶/咖啡)
- Thai Signature(泰式地道炒粉麵/咖喱)
- Boat Noodles & Grill(泰式船麵/串燒及甜品)
- Burger Brunch(Fusion漢堡/All Day Breakfast)
星期一至五限定嘅午市套餐只係$68起(包指定冷/熱飲品)，CP值好高。留意返，6pm後晚市主打泰菜，所以「Burger Brunch」區夜晚會休息㗎。不過淨係睇水吧同泰菜區已經多到唔知點揀～ 水吧有各款咖啡、不同酒類外，仲有獨特茶味嘅泰式奶茶、泰國團隊設計嘅泰式髒髒奶茶、泰式茶湯力等。
“Foodhall by Moon Thai”特設4大區域。開放式廚房幾有feel，今日想食咖喱、船河定串燒? 可以行去唔同區睇吓慢慢揀。
最近泰國團隊推出咗幾款新料理，包括多款超惹味蛋咖喱、飲酒必食燒原隻魷魚、清爽開胃泰式豬肉碎生菜包等，幾款都好啱同朋友一齊share食。
【全新！晚市泰國料理】
咖喱炒皇帝虎蝦$248 / 辣椒膏炒皇帝虎蝦$248
嚟自越南嘅頂級皇帝虎蝦，每隻連頭長達16-18cm，重量足足約100g就想像到幾大隻啦!! 泰廚用滾油將虎蝦外層炸到香脆，入面肉質就keep住彈牙鮮甜。
真心2款口味都幾吸引，「蛋咖喱炒皇帝虎蝦」係用湖北土雞蛋同泰式咖喱粉精心調製，令咖喱香氣有種溫和嘅辛香+甜味。
蛋咖喱炒皇帝虎蝦。咖喱香氣帶有溫和嘅辛香及甜味。
「辣椒膏炒皇帝虎蝦」就用地道泰式辣椒膏炮製，香辣可口又帶絲絲甜味。每碟都有4隻大蝦，一次滿足鮮味同香辣雙重享受。
辣椒膏炒皇帝虎蝦。地道泰式辣椒膏炮製，香辣可口又帶絲絲甜味。
每隻虎蝦都約100g，真係好肥美厚肉。
燒原隻魷魚$92
新鮮原隻魷魚大約18cm長，重量有180g㗎。泰廚用慢火燒製，外層燒到少少焦香，而魷魚口感依然好爽彈。蘸埋獨家秘製嘅泰式海鮮醬汁，有種酸辣交錯層次感，好有泰式風味。
燒原隻魷魚。外層燒到焦香，口感依然好爽彈。
獨家秘製嘅泰式海鮮醬汁，有種酸辣交錯層次感。
蛋咖喱雞$158 / 蛋咖喱牛肉$188 / 蛋咖喱豬肉$158
食泰國嘢點少得咖喱，全新泰式蛋咖喱用泰式咖喱粉做基礎，加埋湖北土雞蛋、濃郁椰奶；以及清新檸檬草、香草羅勒等多種香料煮製。
濃郁咖喱帶有蛋嘅嫩滑，而且椰奶味好有存在感，後續再滲出香草餘韻，幾有層次變化啊。
(左)泰式蛋咖喱牛肉、(中)泰式蛋咖喱雞、(右)泰式蛋咖喱豬肉
可以按自己口味揀嫩滑雞肉、鮮嫩牛肉 或 多汁豬肉，試吓獨一無二嘅泰式風味。
泰式豬肉碎生菜包$98
泰國料理嘅獨特香料+新鮮生菜嘅清爽口感，煮出呢道又香又開胃嘅泰式生菜包!! 泰廚選用新鮮豬肉碎，配合香茅、蒜頭、辣椒等多種香料爆炒，逼出濃郁香味。最後加入魚露、糖調味，令豬肉碎有微微甜味。
食嗰陣，用新鮮脆嫩生菜包住豬肉碎，中和豬肉油膩之餘，又多種清脆口感。每啖都好有香料辛辣味，辣迷一定鍾意!!
泰式豬肉碎生菜包。結合泰國料理嘅獨特香料，以及新鮮生菜嘅清爽口感。
用新鮮脆嫩生菜包住豬肉碎，每啖都好有香料辛辣味。
Foodhall by Moon Thai
地址: 觀塘觀塘道348號宏利廣場1樓101號舖
電話: 28511288