尖沙咀最新異國情調餐廳登場～藍色店門加上仿綠植裝飾，咪以為係文青cafe，其實係黎巴嫩菜餐廳！其中獨立房間鋪上富民族色彩嘅地毯，打卡充滿異國色彩。餐廳請嚟曾於知名酒店任職嘅埃及主廚坐鎮，出品有保證，好似傳統鷹咀豆泥、阿拉伯傳統燒烤都可以喺度試到。由即日起至10月31日，晚市全單8折同時送是日精選甜品一客(Classic Arabic Rice Pudding)，即睇有咩必食推介啦～
店門採用鮮明嘅藍色，感覺清爽醒神
天花以色彩繽紛嘅花飾作裝飾，增添浪漫氣氛
餐牌提供黎巴嫩特色小食、冷熱盤、阿拉伯傳統燒烤等，當中包括多款羊肉料理，如烤羊肉串、黎巴嫩羊肉腸、烤羊架等。而收尾必食嘅甜品，則推介坊間少見嘅黎巴嫩法式多士、埃及麵包布甸。
肉類料理以羊肉為主
特色冷、熱盤
黎巴嫩菜嘅冷盤必定有幼滑嘅鷹咀豆泥，想味道層次豐富啲，可以揀黑松露鷹咀豆泥，當中加入中東芝麻醬同檸檬汁，味道清香；拌優質橄欖油配麵包、脆片一齊食，更突顯當地風味。
黑松露鷹咀豆泥、香辣菲達芝士
另外用煙燻茄子、中東芝麻醬製作嘅烤茄子蓉，以及用烤紅甜椒、洋蔥、麵包糠同核桃製作嘅辛香紅椒泥口感就夠晒軟綿。
烤茄子蓉、辛香紅椒泥
如果你鍾意食海鮮，熱盤烤西班牙八爪魚就啱你喇～原條八爪魚腳烤得香軟彈牙，配埋以香料調味嘅鷹咀豆一齊食口感層次更豐富。
原條八爪魚腳分量十足
餐廳主打嘅羊肉料理之中，不得不試中東特色炸羊肉餅！羊肉混合松子同布格麥（即風乾小麥碾碎而成嘅硬質小麥），羊羶味同油分適中，好啱做下酒菜。
必試傳統小菜之一
肉食控主菜精選
啖啖肉嘅招牌羊腿以香料醃製，煮得軟腍入味，用刀叉輕輕力就可以分開；灑上杏仁片，同配搭嘅時蔬既增添清香氣味，又可以平衡油膩感。
可2至3人開心share
如果有3 、4個人聚餐，不妨試下阿拉伯傳統燒烤，以金光燦燦嘅烤爐呈上，打卡啱晒。可以單點一款肉類串燒或丸類，而混合烤肉則試齊羊架、雞肉同牛肉，以及鋪滿蔬菜嘅薄餅。
混合烤肉約有4件羊架，再伴上雞塊、牛肉片
RUE DU LIBAN
地址: 尖沙咀山林道22-26號地下A號舖