坐落將軍澳寧靜海濱嘅“Maison Beirut”唔只係一間餐廳，更係一場通往黎巴嫩核心嘅感官之旅。呢度有迷人嘅海濱靚景，正值春夏好啱坐室外，聽住波浪拍打堤岸聲音享受美食；揀啱時間仲可以欣賞夕陽，構成令人難忘嘅用餐背景。
室內裝潢則對地中海魅力致敬，以湛藍色調為基底，牆身精心挑選傳統黎巴嫩幾何圖案，搭配七彩繽紛的中東風格沙發裝飾，充滿異國情調。無論你選擇室內，於精緻燈光下用餐；抑或室外享受清風送爽，都可以感受充滿活力又寧靜嘅氣氛。
穿越黎巴嫩美食之旅
“Maison Beirut”堅持正宗黎巴嫩美食，無論食材、調味均致上深深敬意。大膽地以香料、新鮮香草同歷史悠久煮法，呈現一場傳統味道盛宴。
由擁有超過40年經驗嘅埃及主廚精心設計菜式，確保每份味道都帶有黎凡特(Levant) 中東地區靈魂。黎巴嫩菜以健康、奢華平衡而聞名，大廚將呢個理念展現得淋漓盡致。以優質橄欖油、手工研磨香料、新鮮豆類入饌，一嚐引人入勝嘅大自然味道。
必試招牌菜 滿足海鮮迷&肉控
用餐之旅開始，當然要試吓黎巴嫩料理基石—Mezze!! 豐富嘅Mezze 好啱同朋友happy share㗎。呢道Mix Hummus Platter 就係必試之選，包含4款滋味變奏—經典、松露、紅菜頭同牛油果。每款都係將傳統口味加入獨特變化，配埋暖笠笠、軟綿綿嘅彼得麵包同香脆Nachos 蘸嚟食，開胃又好食。
對海鮮fans嚟講，呢道烤八爪魚都係必食之一!! 八爪魚用橄欖油、檸檬汁、大蒜同香草調製嘅醃料醃過，然後烤到微焦啱啱好。咬落肉質彈牙嫩滑，好有地道風味。
同樣吸引嘅係蒜香烤虎蝦，就配上濃郁嘅蒜香同他他醬，帶嚟一陣濃烈味道爆發，撞上鮮嫩多汁嘅虎蝦幾夾喎。
唔止八爪魚同虎蝦，海鮮迷表示「我咩都要!!」，就要揀呢道Mix Seafood Grill 啦。集合多款新鮮海鮮—蝦、青口、三文魚、魷魚同澳洲鱸魚，全部都烤到好香。配埋香草牛油醬，以濃郁香草同微酸味，突出海鮮嘅天然甜味。
而鍾意食肉嘅朋友，就要揀呢道IGable嘅Mix Grill啦。多款烤肉散發住仙氣上枱，未食已經聞到好香。每款烤肉都用傳統黎巴嫩香料醃製，咬開仲爆出肉汁好正。
沉浸式體驗黎巴嫩文化 精彩肚皮舞表演
“Maison Beirut” 獨特溫馨氣氛，無論約會或三五知己飯局都好啱㗎。選擇室外用餐，更會伴隨住海風輕拂同柔和背景音樂，成為浪漫晚餐、家庭聚餐或者悠閒週末brunch 嘅理想地點。
逢星期五及六(7:30pm及8:30pm)，更有出色嘅肚皮舞者精彩表演。迷人舞姿同傳統音樂，帶你穿越到貝魯特嘅熱鬧街頭，喺星空下感受異國風情地用餐。無論生日、週年紀念，又或只係想過一個特別晚上都係完美選擇。
如果有特別節日同慶典，仲會舉辦獨家肚皮舞表演!! 多數由客席舞者演出或延長表演時間，同感受與別不同嘅活力同興奮氣氛。
Maison Beirut
地址: 將軍澳唐賢街29號藍塘傲格林威治村地下10號舖
電話: 23210368