澳門新口岸區唔單止係澳門政府積極推動的旅遊區，更係美食體驗嘅絕佳好去處。喺澳門玩樂一日後，不妨喺度品嚐一下精緻嘅餐飲！今次介紹嘅3間餐廳都位於澳門新口岸，包括米芝蓮二星店及必比登推介餐廳，新口岸附近交通方便，有多間新式酒店，不論係公幹或旅遊都非常合適！
坐落新口岸永利酒店嘅經典粵菜廳——永利軒自2015年起一直未有離開米芝蓮星級餐廳榜單，至2020年開始更係升上二星，餐廳裝修出名豪華氣派，以九萬片水晶組成嘅立體飛龍係佢哋嘅招牌打卡位，無論係商務聚會，又或係家人聚餐都係大方得體之選！佢哋享負盛名嘅菜有茶皇雞、三十年陳皮蛋白蒸星斑、香檸金瓜馬拉卷，午市手工點心亦非常受歡迎，週末同假日嘅話幾乎一位難求！
九鯤於2024年10月於永利澳門（Wynn Macau）盛大開幕，由備受矚目的行政總廚張志成掌舵，餐廳以茅台與環球海鮮為主題，更係澳門唯一一家設有茅台主題酒吧嘅餐廳，珍藏多款茅台佳釀同時亦有頂級中國葡萄酒可現場競拍，難怪短短時間就獲得米芝蓮推介！
嚟呢度必須要試嘅菜式為茅台火焰脆皮雞、木桶茅台酸湯東星斑、茅台熟醉羅氏蝦，逢星期五、六晚上設有海鮮拍賣環節，成功投得嘅會由餐廳即時烹調，搭配首席調酒師Mark Lloyd精心調制嘅創意茅台雞尾酒一絕！
於1945年創立、連續14年獲得必比登推介嘅六記粥麵本店位於沙梨頭，以自家製傳統竹昇麵製作嘅蝦子撈麵、錦鹵雲吞、米通鯪魚球、水蟹粥打出名堂。佢哋於2024年進駐澳門漁人碼頭，位置鄰近澳門外港客運碼頭，對遊客嚟講比起去本店可以更輕鬆地享用到以上當地經典美食！
