嚟緊秋冬想搵個靚戶外地方飲吓酒，估唔到旺角都有選擇!! 仲要係月球主題酒吧餐廳—「J.moon」，掛滿過百盞月亮燈。真係一入門口已經漫天月球，每張枱都有專屬月亮燈畀大家影相自拍。2025年11月開始咗新嘅【冬】Menu，聖誕節仲特別設計咗高CP值「四道菜聖誕套餐」𠻹～ 年尾Holiday Mood約伴侶閨蜜食飯打卡，順便直落飲返兩杯啦。
店內掛滿唯美月球燈，好有氣氛。
戶外空間十分舒服，三五知己齊齊享受吓日光。
【四道菜聖誕套餐】
聖誕節同伴侶或閨蜜食飯，西餐一定有Feel～今年特別設計嘅「四道菜聖誕套餐」融合多款人氣食材，而且開胃菜同主菜都可以自選菜式，方便你揀唔同類型Share食，咁就更加盡興啦！
開胃菜三選一
松葉蟹他他
海鮮控Must Try!! 精緻嘅松葉蟹他他以牛油果做底，再鋪上大量松葉蟹蟹肉+海膽，份量有誠意，拌勻微酸嘅柚子啫喱Balance鹹鮮味，食落好refreshing～
意式生牛肉片
鍾意飲酒嘅朋友，推薦你試意式生牛肉片，係意大利經典菜式之一。牛肉片鹹鹹哋，加埋檸檬香蒜蛋黃醬、火箭菜、黑橄欖同埋切成薄片嘅硬芝士Parmigiano-Reggiano，味道相對松葉蟹他他濃厚啲，但一樣勾起食慾！
香煎鵝雞肝
香煎鵝肝同雞肝，喺一道菜同時出現又做成兩種口味，少見之餘又冇違和感👍🏻～鵝肝沿用傳統做法，配烘多士同焦糖蘋果；雞肝就以海苔米餅代替麵包，再加特製脆片點綴作新嘗試，先食鵝肝再到雞肝，香脆口感會層層遞進㗎！最後以Colourful嘅香醋沙律解油膩感，咁就可以試真啲下一道菜啦～
湯品
味噌花椰菜奶油湯
Fusion菜作為餐廳Menu重要特色，聖誕套餐又點可以唔玩Fusion元素呢?!呢款湯品結合西、日口味，將花椰菜略為打成蓉，保留咬口，再加奶油同味噌煮成湯，清爽順喉。湯中間則用36個月熟成嘅伊比利亞豬肩胛火腿砌成「食用花」，有美感得嚟仲昇華味道層次。
主菜四選一
牛油焗波士頓龍蝦配龍蝦意大利麵
需要澱粉質嘅朋友必試「牛油焗波士頓龍蝦配龍蝦意大利麵」～開邊龍蝦掃上牛油，焗至表面帶焦香感，肉質依然爽口彈牙；意大利麵就用龍蝦湯煮到收汁吸滿精華，配埋烤茄子、車厘茄等時蔬，鹹鮮中帶一點甜，層次更豐富兼提味呀！
香煎黑鱈魚
西京燒鱈魚食得多，但其實西式香煎做法都別有一番風味！餐廳今次選用黑鱈魚，將魚皮煎脆逼出魚油更香口，魚肉結實得嚟又夠嫩滑。師傅特別用西芹根泥代替一般搭配薯蓉嘅做法，加埋青椒蒔蘿奶油醬同炒時蔬，整體感覺飽而不膩。
烤加拿大豬扒
睇外表咪以為係特大羊架，其實師傅將羊架常見嘅香草脆皮做法，轉用喺豬扒身上，烤焗時可以鎖住水分，啖啖肉都保持Juicy，而香草味道則更滲入豬扒，唔使太多調味。加上滑溜嘅奶油薯蓉同新鮮炒時蔬，絕對飽肚呀！
【升級選擇】澳洲150日穀飼黑安格斯肉眼牛扒 (250g)
牛魔王之選！澳洲150日穀飼黑安格斯牛扒，味道香醇，而肉眼部位脂肪比例適中，配合恰到好處嘅火候煎封鎖住肉汁，一個字「正！」～加埋烤蒜一齊食，蒜頭嘅甜味更加釣起肉香，鍾意嘆靚扒嘅朋友一定要試！
薑餅人蛋糕
聖誕甜品必有薑味！可愛薑餅人造型蛋糕，結合薑味吉士醬、牛奶朱古力慕絲、朱古力海綿蛋糕同蛋白酥皮，薑中帶甜唔會互搶～仲有哥士的同迷你聖誕樹做裝飾，意境100分!!
聖誕雞尾酒
想由頭到尾都係聖誕Feel嘅話，試埋聖誕雞尾酒啦～酒紅色基底、仿雪山泡沫置頂，仲有肉桂條同玫瑰花瓣襯托，打卡啱晒📸～
【酒店級大廚創作四季Fusion菜】食飯飲酒直落！
唔係間間酒吧都有咁多高質料理！「J.moon」就有大廚團隊依時令轉換食材，於【春】、【夏】、【秋】、【冬】四季設計全新Menu。最新推出多款主菜同分享小食，加咗唔少墨西哥同東南亞元素
「J.moon」2025年11月【秋】Menu正式推出，加咗唔少墨西哥同東南亞元素。
單單小食已經幾有驚喜，好似芥末蛋黃醬炸蠔、BBQ沙嗲豬肉串燒配泰式辣醬，平時去酒吧食嘢真係少見咁高質大碟。而主菜就有照燒比目魚及三文魚卷Taco、香茅蒜蓉蜆、慢煮西班牙杜洛克豬架、等，完全可以食飯飲酒直落。
照燒比目魚及三文魚卷Taco
Taco餡超爆滿!! 滿滿照燒比目魚同三文魚餡，一咬落去已經好有魚油香。大廚團隊特別加咗牛油果，香得嚟完全唔膩。Taco皮脆脆哋，呢種脆口好啱飲埋啤酒或者雞尾酒。
泰式香草烤牛肉沙律
泰式燒牛肉一向無得輸～ 薄切牛肉加咗泰國香料、酸汁，酸酸辣辣勁開胃。雖然係沙律類，但牛肉份量真心多，難得去酒吧飲嘢都食得咁滿足。
味噌燉飯 配蟹肉與蘆筍
蟹餅夠香，鮮甜蟹肉存在感幾強，撞上濃郁深沉嘅味噌燉飯幾吸引。
香茅蒜蓉蜆
蒜蓉蜆精華一定係個汁!! 個汁有晒香茅、蒜蓉同蜆肉貝味。真心要一邊食蜆肉、一邊用烤麵包汁都撈埋
慢煮西班牙杜洛克豬架 配番茄馬蘇里拉芝士與巴馬火腿
超大件西班牙杜洛克豬架🤯。豬肉係鬆軟得嚟有油花，完全無豬羶味。外層仲有炙燒馬蘇里拉芝士同巴馬火腿，超鹹香拉絲。
脆皮風乾馬友
平時去酒吧都係食Fish and Chips!? 「J.moon」特別推出脆皮風乾馬友，馬友魚肉更細膩濕潤，個皮仲要脆卜卜～ 配埋青辣椒椰醬同蔬菜，幾啱夏天食。
海老龍蝦醬拌稻庭烏冬
撈烏冬最重要有個靈魂醬汁！今次大廚用咗海老龍蝦醬，令Q彈稻庭烏冬有濃郁海鮮味，而且巨型蟹柳真心超巨!!
自家製蝦多士
飲酒幾啱配港式經典蝦多士，每件多士都有原隻蝦，全部即叫即炸。一啖食到酥脆多士＋彈牙蝦肉兩種口感，配埋韓式蜜糖辣醬無得輸。
【飲酒推介小食】
平時飲酒得薯片蝦條開始悶嘅話，「Jmoon」佐酒小食一定畀到你新鮮感。想有啲墨西哥風味，可以揀墨西哥烤牛肉配牛油果/番茄莎莎醬烤餅，粟米餅皮夾住燒牛肉，仲有牛油果同番茄莎莎醬揀嚟蘸，真係誠意十足。
仲有大大隻嘅芥末蛋黃醬炸蠔，炸皮金黃脆卜卜，咬開係蠔肉爆汁好有重海水味！如果飲酒想食吓串燒，BBQ沙嗲豬肉串燒配泰式辣醬嘅份量過足口癮。
【靚靚雞尾酒！】
喺「J.moon」月球環境飲酒真係好有feel，佢哋仲有多款即調雞尾酒，推薦大家秋冬涼涼哋揀戶外座位～
Taurus
“Make yourself at home, this drink will definitely make
you feel like home with all your passion surrounding by you”
調酒師希望你可以喺呢杯雞尾酒沉澱於溫暖感覺，將烏龍茶浸泡威士忌、百香果，配合橙利口酒、檸檬汁、雲呢拿糖漿、忌廉撞出層次。
Scorpio
“You're a drifting wood drifting on a river with no destination but freedom, maybe you'll know where to go by taking another sip”
感受自由漂流嘅詩意～ 以橙皮浸泡Gin酒，加入橙糖漿、苦味開胃酒，帶嚟清新果香同微苦嘅層次感，好似漂浮於河流中尋找去向。
Libra
“This is perfectly balanced. Just like you”
體驗完美平衡嘅味蕾之旅～ 以散發香氣嘅香蕉葉浸泡Rum 酒，同時加入白可可嘅細膩甜味、牛油果嘅奶油質感同豆奶，再以班蘭泡沫增添輕盈花香，每一啖都好豐富。
J.moon
地址: 旺角西洋菜南街1A-1K號百寶利商業中心4樓10-11號舖
電話: 95455738