如果你身邊都有個鍾意食日本嘢嘅伴侶，情人節唔使多諗～去食日本菜就無錯啦。尖沙咀「漁道樂」和風環境有榻榻米座位，並掛滿店主喺日本各地搜羅嘅飾品海報，好似穿梭到日本居酒屋。
坐榻榻米食日本料理有儀式感。
日式VIP房隱私度高，享受二人世界。
極豐盛！情人節日本料理
呢度由30年廚師發辦經驗師傅主理，每日都會親自安排時令魚材由日本直送到港。今年情人節套餐就安排咗刺身、壽司、浜燒、和牛鍋等，基本上想食嘅都有齊晒。牛油果沙律更放上玫瑰花刺身，女神一定鍾意，即睇有咩食啦～
情人餐 $1,688
玫瑰沙律杯
第一道菜已經好啱放閃～師傅將厚切三文魚、油甘魚刺身卷成玫瑰花，配上牛油果三文魚籽沙律。
極上壽司盛合
集合多款人氣壽司—海膽、油甘魚、三文魚、魚籽等，滿足壽司癮。
龍蝦3點刺身
刺身份量真係好驚喜！原隻澳洲龍蝦已經好吸睛，新鮮起肉彈牙鮮甜；加埋日本吞拿魚、油甘魚刺身大滿足。
浜燒盛合
平時好多人都為咗呢度嘅浜燒而嚟，將游水海鮮直接放上日本浜燒爐慢燒勁香～而且火力啱啱好，特別係貝殼類可以兜住海鮮汁，拎起貝殼連汁一齊啪入口好正。
店內設魚缸，有多款游水海鮮。
生蠔殼兜住蠔汁，連蠔肉一齊食好正。
情人節套餐有帆立貝、瀨戶內海生蠔，可以自己燒或安排專人幫你燒㗎。
味噌蟹甲羅
蟹甲羅真係浜燒必食，蟹蓋有滿滿蟹肉、蟹籽、蟹膏、鵪鶉蛋、青蔥。放上浜燒爐後，將鵪鶉蛋漿倒入蟹肉中，一邊燒一邊撈勻好有儀式感，入口creamy又重蟹香。
海鮮天婦羅
師傅用銅爐明火炸，特高油溫可以將天婦羅瞬間炸至金黃，鎖住食材水分特別juicy。而且每日都會換炸油，完全無油膱味。
鹿兒島A4和牛鍋
情人節食個和牛鍋，甜蜜暖笠笠～特別引入鹿兒島和牛，油脂分佈平均，有和牛油香又有肉感咬口，輕輕一灼就食得喇。
甜蜜小丸子
日本人好鍾意嘅甜品，一啖輕甜紅豆、一啖Q彈軟韌小丸子，係簡單純粹嘅幸福感。
漁道樂
地址: 尖沙咀金巴利道35號金巴利中心地下A舖
電話: 23887668
