嚟緊4月咁多假，想同朋友去旺角食飯飲嘢直落，可以試吓呢間天台酒吧餐廳“REFLECT”。天台大到可以包場開party，仲有好多梳化位，望住旺角夜景傾偈幾好feel。
“REFLECT”大天台有好多梳化位，俯瞰旺角夜景食飯飲嘢。
室內座位坐得舒服，享用墨西哥料理。
“REFLECT”由10年經驗墨西哥大廚主理，定期推出新菜單，成日嚟都唔會悶。2025年4月就新推海鮮意大利飯、墨西哥炸卷(Chimichanga)、法國慢煮雞胸等。全部都好大碟，好啱一班朋友share兼飲酒。
“REFLECT”2025年4月推出新菜單，大份量好啱share！
海鮮意大利飯
大廚依傳統意大利做法，唔會將意大利飯煮到全熟，仲保留少少「咬骨」口感，加埋紅花忌廉汁又幾creamy。海鮮方面，就有白酒、香草煮製嘅澳洲藍青口、沙白、大蝦。大蝦來頭唔細，特別用清徹無雜質水養飼，唔會有黑色腸之餘，食落特別爽甜㗎。
墨西哥炸卷(Chimichanga)
鍾意墨西哥菜嘅美國人，都好鍾意呢道香口嘅“Chimichanga”。其實佢嘅真身係將經典墨西哥捲餅(Burrito) 炸到脆卜卜，內餡有肉、濃郁豆蓉、甜椒同拉絲芝士。一咬落去先脆後綿，加埋莎莎醬、牛油果醬同酸忌廉，真係好有層次啊。
其實呢件“Chimichanga”真係好大份，可以切開幾件一齊share，飲酒啱晒。
法國慢煮雞胸
好多人想健康啲食雞胸，但又怕肉質太嚡太乾。所以“REFLECT”大廚特別將法國雞胸慢煮幾個鐘，保留雞肉嫩滑同蛋白質。上枱之前又會再煎一煎，健康得嚟都好香口啊。
雞胸用咗鼠尾草、檸檬醃，未食之前已經聞到雞胸有啲檸檬香味，但食落一啲都唔酸，仲有少少甜同雞汁𠻹。加埋上面嘅芒果莎莎醬，幾有墨西哥風味。
【飲到凌晨2點！2款全新小食】
“REFLECT”每晚都開到凌晨2點，如果揀坐天台仲有feel，感受吓旺角寧靜氛圍嘅另一面。想試多幾款墨西哥菜，就記住9:30pm前order定，因為9:30pm後係小食時段啦。小食選擇都有7至8款，最近仲新推咗2款～
雞泡魚乾
飲酒必食嘅雞泡魚乾，蘸滿蛋黃醬食，正！
燒牛脷
唔係將普通來貨將牛脷燒熟就算，係用自家滷水汁煮一晚後，再一片片串起燒香。完全唔會用鬆肉粉，反而用時間煮到又腍又爽彈。上面再灑滿招牌墨西哥辣粉，宵夜食呢個無得輸。
【必食甜品】反轉蘋果撻(Apple Tarte Tatin)
本身情人節限定嘅反轉蘋果撻，因為反應熱烈而繼續留低，一定要試吓點解咁受歡迎!! 私心覺得個餡真係超多蘋果肉，加埋肉桂、牛油同酥皮，又脆又香甜爆發幸福感。
【果香·花香即調雞尾酒】
呢度有駐場調酒師，調製多款精緻打卡雞尾酒外，亦有充滿果香、花香嘅雞尾酒，女仔一定鍾意。
Rubí
石榴+桃+青檸撞雪碧，搶眼鮮紅色嘅石榴幾多果肉，再飲啖雞尾酒清甜爽口。
Oro
接骨木花甜酒，優雅帶微甜氣泡，適合小酌。
Amargo
Jim Beam加杏仁榛果橙香，濃郁回甘唔澀口。
REFLECT Restaurant & Bar
地址: 旺角西洋菜南街74-84號旺角城市中心12樓
電話: 94029697