經歷咗六個多月，相信好多小店都無乜心情諗冬日菜色。延期又延期，Seoulmate Café 終於推出「榮光喛冬日」 Special Menu 啦! 雖然可能 Special Menu 無咩 special，可能大家無乜心情出街食飯，可能農曆新年太快到，但係都要和理 DINE 一 DINE，因為「五大小食 缺一不可」!
五大小食 缺一不可
「五大小食 缺一不可」，一聽就知係五款小食拼盤啦。五款小食都炸得啱啱好金黃脆口，真係少一款都唔想呀，分別有韓燒豬仔髀、炸雞、餃子、蝦球同甜薯條。鐵板則放有煮溶嘅車打、馬蘇里拉芝士，果然韓國菜就係要食芝士拉絲。
炸物唔會太乾太油。輕輕喺鐵板一捲，就沾上厚厚芝士。
你揀良知白雪山定係憤怒了火山?
呢度最出名嘅就係「山」，每次見到軟綿綿蛋白嘅山，加埋萌萌表情已經忍唔住要同佢影相。佢哋嘅表情仲會成日轉㗎，每次都有驚喜。今次冬季限定就有「良知白雪山鰻魚櫻花蝦飯」同「憤怒了火山鰻魚飯」。
（左）良知白雪山、（右）憤怒了火山
已經見到足料嘅鰻魚櫻花蝦飯，唔洗再揮叉暴篤啦!
蜜桃烤蕃薯炸雞
雖然韓式炸雞熱潮一直不減，但編輯最欣賞店家唔會「食老本」只賣一般炸雞，反而Keep 住設計新口味。今次冬日限定嘅「蜜桃烤蕃薯炸雞」就加入歐洲冬日元素，加上微微的肉桂烤香蕃薯和香桃。輕甜香桃配炸雞食落無咁膩之餘，炸皮沾上桃汁亦更酥脆，烤蕃薯內軟外脆十分甘香。
蜜桃炸雞靈感取自歐洲。
泡菜蕃茄忌廉芝士意粉 配 香煎三文魚
韓國菜嗰種濃郁軟綿味道，真係好令人上癮，喺冬天食特別滿足。厚厚嘅自家制忌廉芝士下面，係酸酸微辣嘅泡菜番茄意粉。雖然厚忌廉係主角，但香煎三文魚都有驚喜，魚皮煎得夠脆，咬落亦滲出魚油。
厚厚芝士忌廉最啱冬天食。
Glory to Hong Kong 窩芙甜品拼盤
作為香港人，一定齊心愛香港呢個地方。望住迷你聖誕老人、薑餅人鏈企埋一齊，可能就係店主嘅命名靈感。除咗可愛人物，仲有四件麻糬窩夫砌成嘅迷你樹，比一般窩夫更煙韌，配埋忌廉、兩球雪糕一齊食，幾種咬口加埋一齊幾特別㗎。
可預先致電店家自訂碟上字句。
韓國荷蘭寶寶班戟配士多啤梨
呢道荷蘭寶寶係經典班戟，外層少少焦脆，食落軟綿綿得嚟又帶煙韌，蛋味香濃，係即叫即焗先有呢個效果㗎。
荷蘭寶寶班戟即叫即焗。
綠茶韓意米酒芝士蛋糕 (Tiramisu)
今次冬日限定推出咗兩款芝士蛋糕口味，其中一款就係綠茶Tiramisu喇。平時食開嘅Tiramisu 多數都係用冧酒，今次就改用韓國米酒。聞落有米酒香味，但食落唔會好重酒味，反而突出咗綠茶獨有嘅醇澀味道。
Baileys 咖啡意式芝士蛋糕 (Tiramisu)
相比綠茶口味，Bailey 味道嘅酒味同咖啡香更濃，可以話係一般Tiramisu 嘅進化版，所有味道都更強勁，Tiramisu 粉絲一定要試試。
（左）Baileys 咖啡 Tiramisu、（右）綠茶韓意米酒 Tiramisu
冬日特飲
店家亦特別調製多款特飲，Mocktail 同Cocktail 都有，女仔大把選擇。
（左起）桑格莉亞的白葡桃酒、伯爵茶啫喱黑焦糖忌廉、Baileys咖啡配海鹽焦糖棉花糖、血腥月娥幾時酒 (Bloody Carrie)。
店主特別推介血腥月娥幾時酒 (Bloody Carrie)，佢話 : 「你哋叫月娥走，我哋捐呢杯酒，唔知好唔好飲，爲求大家科金! 」