平時成日都食到海膽，但原來唔同品種嘅海膽都有時令月份。特別係矜貴嘅紫海膽，每年得4月至5月係當造期。佢哋比一般海膽更清甜滑嫩，配埋其他食材又會撞出唔同效果㗎。
將軍澳「赤本山」限定推出海膽の盛宴，有主角紫海膽之外～仲可以食到多款唔同海膽、拖羅、毛蟹等，共有前菜、刺身4品、御料理、壽司10貫、熱湯同甜品。不過想食就記住book位，因為紫海膽隔夜唔好食，所以日日由日本直送嘅貨量唔多，每日限量4位咋！但就確保一定食到新鮮靚嘢。
【必搶】海膽の盛宴
只嚐即日運到紫海膽！每日限量招待4位
前菜 季節前菜
刺身4品 鯛魚他他拌海膽魚子醬 北海道原隻紫海膽 毛蟹馬糞海膽 海膽吞拿魚腩
御料理 甘鯛立鱗燒 海膽南瓜醬
壽司10貫
熱湯
甜品 |
海膽Fans捉緊時間！平時限定4位·母親節不設人數制限
海膽の盛宴平時星期一至日都係限定4位，如果你驚搶唔到位，母親節嚟食飯就無問題喇，因為當日係無人數限制㗎，帶埋親朋戚友一齊食都得呀～
「赤本山」氣氛細膩恬靜，坐壽司吧可以欣賞師傅手藝；想同家人朋友享受私人空間，提供2間日式房、1間VIP房揀。
【前菜】季節前菜
前菜會集合春夏時令食材，亦有機會食到其他海膽。我哋今次就有赤海膽+紫菜，即開即食嘅赤海膽好飽滿！前菜就食到海水鹹香味好醒神。
而廣島蠔則配上香麻不嗆辣嘅馬山椒，為廣島蠔提鮮之餘，食落亦更惹味有層次。春夏時令食材仲有螢光魷魚，一咬落去有種卜開嘅口感，愈咬愈彈牙鹹香。
【刺身4品】
刺身集合咗多款貴價魚材—鯛魚、毛蟹、海膽等等，每道刺身都能獨當一面。
鯛魚他他拌海膽魚子醬
鯛魚有種溫和嘅鮮甜味，肉質細緻略帶魚油。師傅就將鯛魚做成他他，令淡雅魚香滲入赤海膽，一柔一強鮮味喺口中爆發。
北海道原隻紫海膽
嚟到主角登場嘅時間！師傅即席開原隻紫海膽，刮出滿滿海膽肉～甜味會慢慢喺口入面漫延，加埋細嫩口感幾上癮。
毛蟹馬糞海膽
身為海膽fans，當然知道人氣馬糞海膽係幾濃海水味㗎啦。所以師傅就將兩種濃味代表—海膽、魚子醬，配上細緻輕甜嘅毛蟹肉，以蟹鮮平衡濃味。
毛蟹仲係師傅原隻拆肉㗎，相比一般包裝蟹肉更加甜，柔嫩口感都實在好多。
海膽吞拿魚腩
今次海膽+吞拿魚腩真係好澎湃！好似超豪華版嘅花之戀咁，上面有滿到就嚟瀉嘅海膽，下面全部…係全部都係吞拿魚腩!! 一咬落去已經好軟綿綿，兩種creamy口感撞埋一齊好正。
御料理
立鱗燒真係IGable又好食嘅料理～而且唔係全部魚都可以做到㗎。師傅特別揀選魚鱗薄脆、肉質軟嫩嘅甘鯛嚟做。用熱油淋上甘鯛令魚鱗豎立脆卜卜，配埋海膽南瓜醬一齊食又係另一種風味。
壽司10貫
師傅會依當日魚材決定壽司款式，鍾意不時不食嘅話就啱喇。今次師傅整咗正值當造期嘅石垣鯛壽司，係少有油脂豐富嘅白身魚，肉質紮實爽口，加埋creamy海膽更有口感，每年得2至3個月當造咋。
同場鳥貝壽司亦有驚喜～平時食嘅貝類如粒貝、象拔蚌都係好爽口；鳥貝反而略為腍身，但貝味就特濃。
(左上二)石垣鯛壽司、(右下二)鳥貝壽司
【甜品】
飲完熱湯後就會奉上甜品，係抹茶奶凍配雪印士多啤梨。輕甜唔膩，用作結尾好滿足。
【同場加映】
食一個set唔夠喉嘅話，呢度都有單點畀大家追加㗎。私心推介呢道鯖魚料理，估唔到厚切鯖魚+鯖魚粒+壽司飯係咁有口感，魚肉又嫩又彈牙。一定要成件啪入口呀，你會feel到成口都係魚香!!
小長井華漣蠔
蠔迷可以試埋呢款日本長崎嚟嘅生蠔，蠔肉厚身爽口，淡淡海水味唔會太濃，配埋飛魚子啱啱好。
赤本山
地址: 將軍澳至善街3號澳南海岸SAVANNAH Place地下G07A號舖