想喺銅鑼灣食個下午茶，嚟嚟去去都係打卡蛋糕、鬆餅有啲悶？其實下午茶飲啖茶、食點心都好Chill 㗎。一直主打創新中菜嘅「顏府御膳」就推出CP值極高下午茶，原價每位HK$128，現每位HK$88(2位起)就食到黑松露點心、川辣擔擔麵等，最後仲有老火靚湯滋補吓。
呢間上樓中菜館一直由大師傅主理，擅於傳統中菜加入新元素，早前推出嘅麻辣脆皮燒賣就大受歡迎。今次下午茶回歸基本，以高級食材入饌傳統點心，如黑松露、安格斯牛肉等，HK$88 確實值回票價。
顏府下午茶有點心、湯麵、老火湯，每位只需HK$88，CP值極高。
點心拼盤 高級食材入饌
每日下午2點半至4點就係下午茶時段，率先端上嘅「精緻點心拼盤」就有黑松露帶子餃、脆皮焗叉燒包、香炸安格斯牛肉腸粉。
點心拼盤均以高級食材入饌，如黑松露、安格斯牛肉等。
黑松露帶子餃
點心罕有加入名貴黑松露，配搭新鮮帶子增加爽彈口感。皮薄足料，一啖入口即湧出松露香。
脆皮焗叉燒包
脆皮叉燒包曾掀起一股熱潮，但坊間質素不一，部分預早製成嘅叉燒包外皮已濕腍。呢度嘅脆皮叉燒包就即叫即做，確保每件都外脆內軟，所以每日限量發售㗎！
香炸安格斯牛肉腸粉
點心拼盤中最特別就係呢道腸粉，點心師傅將滑溜腸粉包住安格斯牛肉香炸，外脆內爆出肉汁，牛味亦比一般牛肉腸粉香濃，相當有驚喜。
下午茶暖胃 2款湯麵任揀
套餐有2款湯麵選擇—川辣擔擔麵 或 嫩雞煨麵，下午茶時間食碗麵暖肚特別滿足。川辣擔擔麵以四川手法製作，完美將麻、辣兩味結合，湯底濃郁惹味。爽口擔擔麵掛湯力十足，每啖麵都食到川辣味。
川辣擔擔麵以四川手法製作，結合麻、辣兩味。
嫩雞煨麵
唔嗜辣嘅話，亦有呢道嫩雞煨麵選擇。湯底用濃雞湯熬製，足料雞湯濃郁掛麵，麵條彈牙，伴上鮮嫩雞絲一齊入口，就做到雙重口感。
嫩雞煨麵以濃雞湯熬製，足料濃郁。
麵條爽身彈牙，一定要夾埋軟綿雞絲一齊食！
每朝開火熬製 必飲老火湯
師傅每朝返嚟第一件事就係開火煲老火湯，今次下午茶都飲到㗎！老火湯每日唔同，會依當日時令食材決定，早前就有大獲好評嘅野葛菜煲生魚湯，足料滋補。唔飲湯嘅話，亦可選擇自家製清熱五花茶，啱晒夏天消暑。
師傅一朝早開火熬製老火湯，每日依時令食材變更。
玩味十足 長方形鹽燒茄子
作為中菜館，晚市亦有唔少高質小菜值得一試，今次就輕輕介紹幾款人氣菜式啦。前菜必食鹽燒茄子，上枱時絕對估唔到係茄子，因為師傅將茄子去皮再切成長方形，灑上秘製調味後炸到脆身，外脆內綿，無論外形定味道都玩味十足。
炸至脆身嘅長方茄子，上枱時絕對認唔出係茄子，玩味十足。
鑊氣十足 薑蔥/砵酒蠔煲
新推嘅薑蔥蠔煲，砂窩上碟鑊氣十足，一打開蓋就聞到好香薑蔥味。桶蠔用薑蔥炒香後，再用惹味自家醬汁兜勻，個人覺得撈飯一流！
同場仲有砵酒蠔煲，酒香令新鮮桶蠔更鮮甜肥美飽滿，咬開仲會爆汁，啱啱上枱嘅話小心燙口呀。
薑蔥炒香桶蠔後，再加入惹味自家醬汁兜勻，砂窩上碟鑊氣十足！
燉湯集食材精華 花膠螺頭燉竹絲雞
頭先都提到呢度嘅湯水，每日足料熬製，滋補一流。相比要喺備料、睇火搞一大輪，嚟到坐低就飲得真係舒爽得多！個人推薦花膠螺頭燉竹絲雞，用厚花膠、新鮮螺頭同各材料燉製，每啖燉湯都係食材精華，滋陰養顏、養血保腎。
花膠螺頭燉竹絲雞用厚花膠、新鮮螺頭等燉製，每啖湯都係精華。
同場加映，即日起至8月31日顏府御膳午市單點餐牌提供7折優惠，有多款點心、小菜選擇㗎！*此優惠不包括任何套餐及下午茶套餐！
顏府御膳
地址: 銅鑼灣開平道1號Cubus 5樓
電話: 28990055