秋意起，仿彿提醒大家又到食蟹季節喇。荃灣西如心酒店嘅自助餐餐廳 Café Circles 於2023年9月1日至11月30日推出「滋味蟹饌自助餐」，酒店廚師團隊嚴選各地優質螃蟹，利用唔同煮法炮製多款佳餚，絕對係蟹迷福音。逢星期五至日晚，仲可以獲贈秋季必食—時令大閘蟹㗎。
大閘蟹優惠！
逢星期五至日晚惠顧「滋味蟹饌自助晚餐」，每位饕客可獲贈時令大閘蟹一隻 |
環球冰鎮海鮮
食自助餐當然要mark實環球海鮮！冰鎮海鮮自助區放滿雪花蟹腳、麵包蟹、凍蟹；當然仲有經典大蝦、青口、蜆、小龍蝦等，各種海鮮源源不絕供應。
冰鎮海鮮區集合多款高質螃蟹。
今次主角雪花蟹腳極厚肉，蟹迷絕對輕鬆食回本。麵包蟹亦有飽滿蟹膏蟹肉，每啖散發獨特蟹香係大滿足之選。對比起麵包蟹，凍蟹就細隻啲，但蟹肉嘅味道係最鮮甜出眾！
麵包蟹有滿滿蟹膏蟹肉。
多款經典海鮮，源源不絕供應。
小龍蝦大隻多肉。
以冰鎮海鮮揭開序幕後，螃蟹料理陸續有驚喜！沙律冷盤、湯品都搵到各種蟹蹤影。冷盤有清新爽口蟹肉青瓜沙律、蟹肉蝦凍卷、蟹鉗杯；再飲啖濃郁暖胃蟹肉周打湯，相當舒暢。
冷盤蟹鉗杯好搶眼。
廚師團隊已將蟹鉗拆殼，輕鬆啖啖肉。
蟹肉蝦凍卷顏色搶眼，口感豐富。
熱葷區有超過20款蟹料理輪流供應，一嚐好有風味嘅薑蔥炒蟹、胡椒炒蟹，鑊氣十足。鍾意香口嘢必食金黃酥脆椒鹽軟殼蟹、濃郁creamy焗蟹蓋、大隻彈牙炸蟹鉗。仲有熱辣辣新鮮出爐自家製Pizza，放滿蟹柳、雜椒、千島醬再焗，必食推介！
胡椒炒蟹鑊氣十足。
椒鹽軟殼蟹炸到金黃酥脆，好香口。
焗蟹蓋鋪滿醬汁、蟹籽，食落濃郁creamy。
炸蟹鉗好大隻彈牙，大人小朋友都會鍾意。
不得不提 Café Circles 嘅 Live Station好出色，除咗必備即切烤肉，仲有坊間少見BBQ區。大廚即席以牛油蒜蓉燒雪花蟹腳，等食之際已經聞到好香啦！一系列串燒如雞翼、雞肉串、台灣腸、秋葵、茄子都係即叫即燒好惹味。
BBQ區串燒即叫即燒，坊間自助餐少有。
牛油蒜蓉燒雪花蟹腳，等食之際已經聞到好香。
身為甜品控，一入門口見到震憾長枱甜品區已經好開心！每日由甜品師傅製作多款精緻蛋糕—日本紫薯戚風蛋糕、宇冶綠茶慕絲蛋糕、焗流心芝士撻等；巨型招牌鮮果千層酥更係全晚焦點。而且不惜工本有齊Häagen-Dazs雪糕杯、雪糕批，值得留肚享用呀。同場亦有小朋友一定鍾意嘅朱古力噴泉、夾糖專區，加埋一系列時令甜點完全係甜品天堂。
「滋味蟹饌自助餐」詳情
自助午餐 供應時間：中午12:00至下午2:30 價錢：成人$398、 小童／長者$318(星期一至五) 成人$488、小童／長者$408(星期六、日及公眾假期)
自助晚餐 供應時間：晚上6:30至9:30 價錢：成人$618、小童／長者$518(星期一至四) 成人$698、小童／長者$598(星期五至日及公眾假期)
*逢星期一長者享用自助午餐可享淨價$250優惠，經Nina Boutique 預訂9月及10月嘅自助餐更可享低至65折優惠！ |
用餐區寬敞，適合約會或天倫樂。
全場設多個自助區，美饌源源不絕供應。
Café Circles
地址: 荃灣楊屋道8號荃灣西如心酒店9樓
電話: 2280 2868 / 5970 0551
