唔少遊客嚟到香港都會體驗吓飲茶文化，講到懷舊粵式茶樓，一定唔少得有近百年歷史嘅蓮香樓喇！茶樓翻新後注入好多新元素，好似首設燒味區同手搖茶飲，同時亦保留人氣點心、多款懷舊手工菜式、茶盅沖茶文化等等。即使經歷結業重開，但係味道依然保持水準，同之前一樣㗎～
【自設燒味爐】古法燒製蜜汁叉燒‧潮蓮燒鵝
重開後嘅一大亮點就係最近新增嘅燒味區，由茶樓自設燒味爐，自己燒味自己燒，不論堂食或外賣，保證客人可以食到新鮮出爐、香噴噴嘅燒臘系列！
潮蓮燒鵝（$168/例牌; $288/半隻; $568/全隻）
燒鵝最期待就係食到皮脆肉嫩嗰一啖，呢度嘅燒鵝燒到好上色，晶瑩金黃脆面睇見已經超有食慾～入口肉質嫩滑juicy，油分十足夠香口。鍾意啖啖肉嘅話一定要叫上庄 ($168)部位；而食開髀位嘅客人就推介下庄 ($198)喇！
蜜汁叉燒皇（$148/例牌）
好食嘅叉燒其實好有講究，選用頸肌嘅梅頭部位會特別軟腍鬆軟，以傳統古法烤製，中途搽上麥芽糖同10種秘製香料，令叉燒食起嚟甜甜哋又惹味。
秘製貴妃雞（$138/半隻; $268/全隻）
貴妃雞可以話係白切雞嘅變奏版，用咗白滷水慢浸至熟透，唔單只將精華滲入肉質，仲做到皮滑肉嫩嘅口感𠻹～
桶子油雞（$138/半隻; $268/全隻）
濃濃醬油兼帶光澤嘅玫瑰豉油雞，精髓在於喺滷水醬汁加入玫瑰露酒浸製而成。口感比起其他雞菜式唔同，外皮更加Q彈滑身，仲食到豉油焦香。
懷舊金錢雞（$28/件) (4件起)
金錢雞就聽過喇，你又食過未呢？呢一道傳統粵菜燒味因為手工繁瑣，所以妨間已經買少見少。師傅需要提前將肥、瘦豬肉同雞肝醃漬，然後串起慢火香烤，入口外脆內酥、爽口甘香，未食過嘅話可以嚟呢度一試㗎！燒味外賣仲會送樽裝茶飲，口味3選1：檸茶、純茶、奶茶，食住燒味品茶。
【超過30款手搖茶飲】
蓮香樓歷史悠久，但係都有追趕潮流，搞搞新意思～好似地下新增嘅茶飲部咁，主打6個系列嘅手搖茶飲，分別有雲泡、純茶、檸茶、奶茶、果茶同養生系列。全部茶飲都係用新鮮茶葉沖製，搭配新穎仲好多選擇𠻹！飲完想encore嘅話，仲可以單購茶葉，茶控一定會鍾意。
浮生若夢（$38/杯）
以法式花茶湯為基底，有明顯清澈花香仲帶香料感，配搭好新鮮啊。推介可以先分別試吓茶底同表面嘅雲泡層，再直接將兩者混合一齊飲，會有兩種體驗㗎～
粉黛薔薇（$38/杯）
充滿浪漫粉色嘅雲泡由全脂奶打成，賣相好似白雲咁輕盈，飲落有淡淡玫瑰味～以幽香伯爵茶為基調，灑上紫薯碎+玫瑰碎勁靚，買返杯打卡都值啊！
【懷舊點心逐個食】
嚟到茶樓當然要食！點！心！蓮香樓多達70款點心都係手工包製，保留咗唔少工藝複雜又將近失傳嘅款式，如黑芝麻卷（又稱菲林卷）、鵪鶉蛋燒賣、糯米包、千層腐皮夾等，畀上一代懷緬舊時味道嘅同時，下一代又可以認識更多懷舊點心。
鮮豬潤燒賣（$35/大點）(即叫即蒸)
大人細路都鍾意食燒賣，而豬潤因為清潔時間繁複，要徹底洗淨先用到，所以令供應嘅地方愈嚟愈少。呢度難得食到，爽口豬潤配嫩滑燒賣，口感一流。
古法豬肚燒賣（$35/大點）(即叫即蒸)
同樣備料花功夫，不過啱啱出爐嘅豬肚好爽嫩，加埋惹味燒賣一齊食好夾㗎。
雀巢芋角（$35/大點）
每次食芋角都好期待見到鳥巢狀嘅炸皮!! 包入新鮮芋頭作內餡，高溫油炸會令芋頭瞬間炸成雀巢狀，賣相好靚，食到綿密芋泥，而且無油饐味㗎。
蓮蓉西米焗布甸（$38/特點）
甜品款式層出不窮，但呢款懷舊甜品真係食極唔厭，表面焦香內裡軟滑，仲帶粒粒西米增加咬口，甜而不膩。
【晚市手工菜】
晚市除咗限量供應點心外，亦有唔少手工菜式。功夫菜單由40幾年經驗嘅師傅掌舵，炮製一系列歷史悠久嘅經典粵菜，好多款式都係坊間好難食到～當中師傅推薦口感層次勁豐富嘅「霸王鴨」同「仙鶴神針」，提早3日前預訂就食到喇～
蓮香正宗霸王鴨
一上枱就畀霸王鴨嘅焦香外皮吸引住!! 呢道菜式係傳統廣府菜，會先將鴨起骨，再釀入薏米、蓮子、冬菇、鴨肉粒、白果、鹹蛋黃等食材；然後再上老抽，炸到金黃焦香；最後仲要將成隻鴨用陳皮上湯浸足2個鐘至腍透先可以上碟，當中嘅功夫同手藝絕對唔簡單㗎！
仙鶴神針
咁有氣勢嘅菜名係引自武俠小說，同時亦係一道歷史悠久嘅宮廷菜。製作過程極之考功力，要先將原隻乳鴿去骨填肉，再釀入先用上湯燉足2-3日嘅魚翅燉製，因為手工複雜、用料考究，所以漸漸成為失傳味道。正正因為菜式來得不易，所以一人一隻啪先夠過癮～
蓮香樓
地址: 中環威靈頓街160-164號
電話: 21160670 / 34915855