趁呢排天氣仲未算好熱，不如捉緊冬天的尾巴，去試下銀座38兩間火鍋店同埋露天酒吧啦。
新鮮食材即叫即製 吞POT 雞煲火鍋.住家菜
講得火鍋又點少得近幾年最興嘅雞煲火鍋呢？吞POT雞煲賣點就係即叫即整，而且佢哋嘅雞煲都好有特色，就好似呢個辣酒花螺雞煲咁，喺出面好少見到。一上枱就聞到濃濃嘅香味，惹味之餘仲帶少少酒香、鮮香，唔食得太辣？揀BB辣就無問題啦！
女士們唔使左揀右揀啦，一於揀呢個滋補螺片花膠雞煲。雞湯底用鮮雞熬足一日，濃郁鮮甜，最緊要係養顏啊！
打邊爐又點少得牛肉呢？呢款極品本地手切牛頸脊用上本地鮮牛，牛味重而且彈牙。
十全大寶丸包括生拆蟹粉墨魚丸、黑松露墨魚丸、黃金海膽黑墨魚丸、香煎鵝肝蝦丸同芝士牛丸等，所有丸類都係師傅每日新鮮手打，難怪咁彈牙啦。
響鈴都係火鍋必食之選～呢度嘅自創爆芝響鈴就特別加入芝士，食落又係另一番「芝」味，芝士控絕對唔可以錯過！
吞POT 雞煲火鍋.住家菜
地址: 尖沙咀山林道38號銀座38 十二樓
電話: 31097301
高質海鮮火鍋 橫浜街場
餐廳主要供應海鮮火鍋同藥膳火鍋套餐，海鮮套餐包括鍋底、主菜如海鮮拼盤、手工餃、丸類同 埋肉類，每樣都會跟返人數畀食客(肉類每兩位一份)，除咗套餐內嘅食物，其他配料可以無限追 加。講到最吸睛位，就一定係佢哋嘅噴泉火鍋！噴泉火鍋呈現木桶狀，由杉木製成，係餐廳 特意去馬來西亞搵人訂造返嚟，據講經杉木煮嘅食物會有健脾胃同減少上火功效。而且食嘅 時候可以經火鍋泉口直接拎湯飲，咁就唔會飲到面層嘅油份喇。
海鮮套餐包括鍋底(2-6位一個、7-9位兩個)、主菜同肉類。湯底方面好多選擇，鍾意鮮甜類可以試卜卜蜆鍋，惹味之選就有麻辣口味雞煲同野菌鍋，想養生就有呢個花膠螺頭雞鍋，湯底用咗大量豬骨、雞同金華火腿等熬製八小時，濃郁到起膠，烚野前一定要飲返兩碗。
另外一個賣點就係海鮮拼盤，包括澳洲龍蝦、象拔蚌、大蝦、蕃薯蜆、刀貝同3L廣島蠔，全部都係新鮮貨，夠哂生猛。套餐仲包手切安格斯Prime Grade牛頸脊、西班牙黑豚肉或蒙古羊肉一份、四款手包手工餃同特色丸類。仲有另外四十幾款火鍋配料無限任食，海鮮控同牛魔王是咪已經變咗心心眼？
沒有最抵，只有更抵！呢個火鍋套餐仲要包埋飲品，紅／白酒同啤酒都係任飲，今次真係可以飲飽食醉！
橫浜街場
地址: 尖沙咀山林道38號銀座38 十一樓
電話: 67066660
鬧市中的露天靚景酒吧 HYC Bar & Lounge
想喺尖沙咀區搵間靚景Bar不是夢，HYC Bar & Lounge位於大樓最高層，有露天位可以一覽成個九龍區同維港景色。負責人表示希望營造到一個放鬆氣氛畀客人飲下酒同傾下計。有維港景送酒，真係好chill啊～
餐廳裝潢以時尚工業風為主，主調係金色同綠松石色，畀人一種摩登時尚感。而且空間感好大，枱與枱之間距離夠遠，好適合幾個閨蜜密密斟，暢所欲言。
作為酒吧，酒精類方面選擇當然豐富，cocktails、紅酒、白酒、啤酒、香檳等通通都有，唔單止咁， 客人仲可以搭配啱自己口味嘅 GIN & TONIC，正呀喂！有選擇困難症嘅朋友唔知點揀好？酒吧已經 預先設計好一系列嘅組合，例如 MONKEY 47 + FEVER TREE AROMATIC 同 BEEFEATER + FEVER TREE INDIAN 咁，總有一杯啱口味！
溫馨提示一句，雖然呢間酒吧並無小食供應，但就絕對歡迎大家自己帶啲小食去，邊飲邊食，望住個靚景chill返晚！
HYC Bar & Lounge
地址: 尖沙咀山林道38號銀座38 二十二樓
電話: 2572 6388