沙田一間酒店開咗全新歐陸餐廳及酒吧「2+2 café & bar」，特別選用多款活海鮮，如龍蝦、南非鮑魚、本地海鱸魚等炮製高質環球菜式。另外亦照顧一眾牛魔王，挑選多款上等和牛，如鹿兒島A5夏多布里昂和牛柳、澳洲M6和牛斧頭扒等。餐廳裝修雅緻，又設有戶外座位，無論嚟用餐或飲杯cocktail輕鬆下都唔錯。
精選海鮮菜式 融入鮮活食材
想一次過試到世界各地海鮮嘅鮮味，海鮮拼盤必定畀到你大滿足嘅感覺～貝殼形巨盤盛載啖啖肉嘅波士頓龍蝦、時令生蠔、南非鮑魚、帶子同虎蝦，其中生蠔每日供應3款，如澳洲、法國、南非等產地，由大隻飽滿到海水味濃都有。更配有辣根雞尾酒汁、南美香辣醋青醬等6款特色醬汁，讓你享受多重滋味。
海鮮拼盤配上煙霧效果，打卡一流
開胃前菜則推介松葉蟹肉甘蝦海膽牛油果沙律，蟹肉加入紅洋蔥碎、西芹粒、蛋白醬等提升鮮味；底層嘅牛油果則加入檸檬汁同橄欖油，入口更清新。沙律配埋時令甜蝦、海膽同鮮嫩羅馬生菜，方便食客按喜好自製海鮮生菜包。
DIY西日fusion沙律
嘆主食之前，不妨飲返碗即叫即製嘅龍蝦干邑濃湯暖下胃。師傅將半隻新鮮波士頓龍蝦用秘製魚湯慢煮15分鐘提鮮；而濃湯加入多款炒香嘅蔬菜外，重有焗煮過嘅龍蝦頭、赤米小蝦一齊熬煮，質感濃稠又鮮甜，上碟前再淋上燒熱嘅干邑増加香氣。
濃湯散發酒香更滋味
主菜方面都想嘆海鮮嘅話，火焰海鹽焗原條海鱸魚都係唔錯嘅選擇。海鱸魚選用約1公斤重嘅本地活魚，參考地中海菜做法，魚肚放入薑蔥、香草、檸檬片等，用拌入香草同蛋白嘅幼海鹽覆蓋魚身再烤焗。上菜時記得準備相機，因為會喺食客面前淋上燃燒中嘅冧酒，營造火焰效果！
火焰海鹽焗原條海鱸魚
精選多款上等和牛
餐廳亦照顧一眾牛魔王，選用A4、A5鹿兒島和牛唔同部位，炮製啖啖肉嘅漢堡同牛扒。好似招牌香煎鵝肝烤和牛漢堡就選用西冷，漢堡扒嘅肉同脂肪按3:1比例製作，明火烤焗後帶點焦香味，入口充滿肉汁；配埋香煎法國鵝肝，以及酸青瓜、生菜同自家製他他醬平衡油膩感。和牛方面則提供鹿兒島A5夏多布里昂和牛柳、鹿兒島A4厚燒和牛肉眼扒等。當中夏多布里昂為牛柳最矜貴、每一條牛柳只能製作兩份餐點！
另外除咗日本和牛，亦選用了頂級澳洲和牛。澳洲M6和牛斧頭扒肉質鮮嫩有咬口，配埋香濃嘅牛肉汁更加滋味，啱晒牛魔王聚餐時開心share。
招牌香煎鵝肝烤和牛漢堡
其他特色食品、Cocktail
招牌原隻蒜香烤有機玉米雞特別選用本地飼養81日嘅有機玉米雞，外皮顏色金黃得嚟油分適中，肉質鮮甜嫩滑。雞隻以秘製香料、大量蒜蓉醃24小時後洗淨、風乾，收到客人落單再即時烤製45分鐘，保證新鮮熱辣辣。
招牌烤原隻蒜香有機玉米雞
飯後甜品必試創新嘅意大利咖啡芝士朱古力！呢款Tiramisu變奏版，底部為傳統Tiramisu，用手指餅、咖啡酒、濃縮咖啡同意大利軟芝士製成；而頂部嘅朱古力波波造形Tiramisu，則將所有材料拌勻，冷凍後沾上朱古力粉，味道甘甜，口感幾creamy𠻹。
意大利咖啡芝士朱古力
餐廳亦推出多款Cocktail，其中以店名命名嘅2+2 Signature類似輕盈版嘅Negroni Sbagliato，混合藍寶石琴酒、金巴利利口酒、聖日爾曼接骨木花利口酒、迷迭香等，酒精濃度較高，同時帶點草本香氣，男女都啱飲。而Darjeeling cooler則以大吉嶺利口酒、茶為基調，再加入帶莓味嘅尚柏酒、乾薑味汽水等，適合鍾意清爽口味嘅朋友。另外可以作為餐前酒嘅Gulfstream，混合伏特加、新鮮菠蘿汁、藍色橙酒等，入口微甘開胃。
左至右分別為2+2 Signature、Darjeeling cooler、Gulfstream
2+2 café & bar
地址：沙田白鶴汀街8號帝都酒店1樓
電話：26943886