一大班好友聚餐，想喺鬧市搵間氣氛輕鬆，食物又有水準嘅新店試試？旺角呢間「獅叔」就最啱喇！新店主打新加坡同馬來西亞菜，團隊特別親自飛到馬來西亞發掘地道特色菜，當中更有曾經喺新加坡任職嘅廚師。能夠「神還原」當地風味，同時糅合創意元素，好有驚喜！
「獅叔」主打地道星馬菜，加入新元素，以摩登風格重現南洋風味
餐廳名獅叔嚟自星馬常用嘅俚語「Shiok」，譯做廣東話就係「好爽！」「好正！」，放落餐廳就係「好味！」咁解。的確呢度嘅菜式味道正宗又抵食，加上玩味十足又完全唔老土嘅懷舊風格裝修，真係「好正！」
神還原星馬風味 多款海鮮主食任揀
唔單止菜式有星馬 Feel，連菜式名都一齊神還原？好似「叁巴醬炒啦啦」咁，少去馬來西亞嘅朋友真係未必知，原來啦啦係當地人對蜆嘅叫法～新鮮飽滿嘅蜆肉，加上香辣嘅叁巴醬，無論係送酒定配飯都一流！
叁巴醬炒啦啦
新加坡名菜之一「奶油麥皮蝦」亦非常香口，外層嘅麥皮微甜香脆，襯托出蝦肉嘅鮮甜彈牙，一試難忘。另一款「叁巴燒鱈魚」用肉質細嫩、油份適中嘅鱈魚加上香辣惹味嘅叁巴醬，醒胃之餘醬汁又唔會蓋過魚肉嘅鮮味，層次豐富。
奶油麥皮蝦
叁巴燒鱈魚
傳統主食新演繹！IG-able 波波飯
摻摻即係兩溝咁解，聰明嘅你應該已經估到，「檳城蝦麵摻摻」係指麵底有齊油麵同米粉。蝦湯充滿蝦殼同蝦膏嘅鮮味，再加上大蝦、雞蛋同油炸鬼，令口感更多變。而「檳城蝦湯泡脆米飯」就用自家熬製蝦湯配飯同脆米，既食到湯飯嘅香軟，亦有脆米嘅酥脆，無論邊種口感都同鮮味十足嘅蝦湯好夾！連豆腐卜都吸滿蝦湯，一試難忘。
檳城蝦麵摻摻
檳城蝦湯泡脆米飯
點解啲飯好似變咗一個個波咁？原來團隊考察時，發現馬六甲當地流行食乒乓飯，即係將糯米飯捏成兵兵球大細方便進食。餐廳推出嘅「蒜虎蝦球飯粒」就將其改良，減少糯米分量，食落無咁膩。配搭大大隻嘅爽脆虎蝦、金黃蒜粒同自家調配嘅辣醬，令人忍唔住一啖接一啖咁食晒！
蒜虎蝦球飯粒
最啱開心Share 香口小食推介
「雞棗小卷配印尼蝦片」當中嘅雞棗小卷其實係炸雞肉丸，外層金黃香脆，裡面嘅雞肉口感彈牙，加上印尼蝦片更香口。「馬來沙爹雞串燒」嘅雞肉先以香料醃過，加上師傅手勢好，熟度得宜唔會太乾，加上花生香氣濃郁嘅沙爹醬，充滿馬來西亞風味！
雞棗小卷配印尼蝦片
馬來沙爹雞串燒
滿足埋甜品胃～特色甜點一覽
「咖央雪油烤吐司」嘅雪油大家又知唔知係咩？簡單啲嚟講其實就係雪凍嘅牛油，係當地嘅特別叫法。凍冰冰嘅牛油加上烘過嘅吐司再放入口，亦會好似雪咁慢慢融化！咖央醬柔滑香甜，同牛油、吐司簡直係鐵三角不敗組合～
咖央雪油烤吐司
「咖央蘋果金寶配雪糕」就係經典英式甜品Apple Crumble嘅南洋變奏，唔單止打卡夠搶鏡，冰涼嘅雪糕、暖暖哋嘅金寶，再加上咖央醬嘅椰香同甜味，冷熱香甜交織，係飯後甜品之選！
咖央蘋果金寶配雪糕
色彩繽紛嘅獅叔海報，打造輕鬆又有活力嘅氛圍
獅叔
地址: 旺角奶路臣街17號THE FOREST 1樓110及111號舖
電話: 35861959
