突然想喺銅鑼灣食餐高質壽喜燒同Shabu Shabu，一時之間真係唔知點搵好。最近香港銅鑼灣皇冠假日酒店全新裝修，最新鮮滾熱辣新開日本料理「天月」主打多款定食、壽司、刺身、天婦羅等。為慶祝新店開業，仲有優惠價食限定壽喜燒同牛涮涮鍋套餐，銅鑼灣人又多間日本料理揀喇！
慶祝新店開業，推出限定和牛壽喜燒同涮涮鍋套餐優惠。
個人對酒店出品嘅日本料理一直好有信心，因為日本料理好講求食材質素，而酒店就一定用靚牛、靚魚，今次限定餐就用上鹿兒島A4 和牛同澳洲M9 和牛，頂級食材先贏一仗。而「天月」最吸引嘅地方，除咗食物就係環境！因為全店以3間和式房間隔，每間和式房都有落地玻璃俯覽銅鑼灣鬧市。食客可向餐廳預訂包房，隱私度極高，疫情下都安心得多。
全店以和式房間隔，隱私度高。房內座位寬敞，疫情下可放心用餐。
「天月」遵循日本料理傳統會每季轉換餐單，以食物反映四季更迭，更突顯出日本人不時不吃嘅識食態度。大廚就以日本直送新鮮食材入饌，製作傳統和食—和牛便當、宮崎吉列豬扒定食、蒲燒鰻魚飯等都可以喺度食到。
限定和牛壽喜燒／涮涮鍋 超豐盛套餐
私心推介趁「天月」新開業就嚟一試，因為店家正推出嘅限定壽喜燒同牛涮涮鍋套餐，兩款套餐都有前菜、2款刺身、麵豉湯同餐飲或甜品，份量豐富。而家營業時間由中午至晚上6點，想Chill 啲可飲住清酒慢食到黃昏。
鹿兒島A4 和牛壽喜燒套餐
端上壽喜燒鍋後，店員即以鹿兒島A4 和牛脂開爐，即刻聞到和牛香～嗰種香氣絕對會令隔籬枱食客都想Order 份壽喜燒㗎。然後店員會將和牛輕烤至粉紅色，和牛油花細密、入口即融，沾上日本生蛋液漿食口感更綿滑，肉味久留口中不散。
鹿兒島A4 和牛壽喜燒套餐 (以上為二人份量)
鹿兒島A4 和牛超大塊，加埋優惠相當抵食。
店員以和牛脂、大蔥、洋蔥開鍋，即刻聞到好香。
將和牛沾上日本生蛋漿，口感更綿滑。
壽喜燒醬汁＋清酒同煮 超豐盛蔬菜豆腐
和牛過後，店員會放入蔬菜同豆腐再澆上壽喜燒醬汁、清酒同煮，蔬菜同時吸滿和牛精華，輕甜得嚟又有酒香，平時少食菜嘅我都清鍋！
鍋中放入滿滿蔬菜同豆腐，澆上壽喜燒醬汁、清酒輕甜有酒香。
澳洲M9 和牛涮涮鍋套餐
鍾意清新啲嘅話推薦和牛涮涮鍋，大廚揀選結合日本和牛油香同美國牛肉濃郁嘅澳洲M9 和牛，食到鮮嫩肉質之餘，透過清爽昆布湯底突出牛味。若鍾情和牛嘅油香，都可以加HK$200升級鹿兒島A4 和牛㗎！
和牛涮涮鍋除咗有彈牙烏冬，仲有外脆內QQ嘅日式麻糬，好鍾意呢種煙韌口感呢！
澳洲M9 和牛涮涮鍋套餐 (以上為二人份量)
新鮮蔬菜好清甜，更突出澳洲M9 和牛肉香。
招牌日式定食 雜錦刺身飯套餐
「天月」亦有多款日式定食，好啱附近返工人士趁Lunch Time 過日本料理癮。全部定食都有前菜、麵豉湯、咖啡同甜品，店家特別推薦雜錦刺身飯套餐，一次過食5種日本刺身，醋飯酸度恰好，相當高質。
雜錦刺身飯套餐
日本宮崎豬扒 吉列豬扒定食
吉列豬扒肉質鬆化，全因用上出名嫩中帶鬆化嘅宮崎豬扒。外層炸得脆口、厚薄適中，唔會畀炸漿蓋過豬肉，配埋日本味噌秘製醬汁突出肉味，佐飯一流。
宮崎吉列豬扒定食
多款日式小食 驚喜小沙甸魚榻榻米
定食之外，仲有多款日式小食。今次試咗3款小食，最有驚喜嘅係小沙甸魚榻榻米，驟眼望落以為普通脆口小食，點知一入口係好香嘅魚仔味，仔細一望先知成塊脆餅都係由一條條小沙匐魚而成，難怪炸物都可以咁有魚香。
小沙甸魚榻榻米
南瓜年糕 可愛鳥巢造型
呢道南瓜年糕一上枱已好吸睛，因為好似放上雀仔蛋嘅鳥巢般好可愛。一般日本料理嘅炸南瓜會加薯仔壓成南瓜餅。今次大廚一反傳統，以麻糬外皮包住南瓜蓉，食落外層煙韌、內餡又有南瓜香。
南瓜年糕
日本傳統前菜 三款漬物
雖然漬物從來唔係料理主角，但憑漬物嘅多變味道、豐富營養始終於日本料理佔一席地。呢道小食就一次過食到多款漬物，唔知你又最鍾意邊款？
三款漬物
高質日本料理外賣
除咗堂食，以上嘅定食套餐都可以外賣返屋企慢慢食，全部有麵豉湯同甜品，相當抵食。
