西營盤係一個令人放慢腳步嘅地方，沿路亦會發現好多小店富親切感。行至水街樓梯轉角，更會見到純白牆畫滿小動物，原來係墨西哥人主理嘅“Verde MAR”。牆上插畫都係墨西哥常見嘅可愛動物嚟㗎，店內就主打地道健康墨西哥菜喇。
墨西哥人主理嘅“Verde MAR”，純白牆身畫滿當地可愛動物。
墨西哥大廚崇尚健康自然，堅持所有醬汁料理，甚至芝士、雪糕均自家製，零味精。
儼如牛油果專門店！地道墨西哥菜原來可以好健康
同香港人印象中嘅墨西哥菜好唔同，原來正宗嘅墨西哥菜唔係重醬濃味，甚至健康到差唔多每道料理都有牛油果蹤影。因為墨西哥受地理、天氣因素眷顧下盛產牛油果，當地人食牛油果真係由細食到大。所以喺度會食到好多牛油果菜式，而所用的牛油果全由大廚仲隻親手揀，有如奶油般軟滑的口感，所以話“Verde MAR”係牛油果專門店都不為過呀。
店內白色、木系同植物為主，氣氛悠閒。
【崇尚自然】連芝士都係自家製！保證零味精
大廚ELIGIO 爸爸喺墨西哥開餐廳，令佢自細學識尊重食物、崇尚自然，所以佢好堅持由零開始煮製食物，醬汁、食材；就算連芝士都自家製，確保食客唔會誤食致敏食材，亦不含味精、添加劑。
除咗全程自家煮製，店內甚至自設種植園，即摘即煮新鮮仙人掌。
【牛油果Fans召集】
自家製牛油果雪糕
嚟到一定要試最高人氣嘅牛油果雪糕！成個雪糕都係用牛油果肉、牛奶自家製㗎。味道好似食緊牛油果咁，但就更加冰涼綿滑，啱晒夏天。
最估唔到係連粒「牛油果核」都食得。其實真身係用新鮮芒果製成，清甜味道好啱配牛油果。
用新鮮芒果製成嘅「牛油果核」，清甜味道好啱配牛油果。
牛油果花配脆栗米餅
呢個牛油果花花就好受女仔歡迎，上層係牛油果鋪成嘅玫瑰花；下層就有脆卜卜墨西哥粟米薄片，又軟又脆撞出雙重口感。
女生一定鍾意嘅牛油果花花。
【自家種植】仙人掌蘋果汁
仙人掌唔係度度食到，喺香港餐廳入面即摘即食應只有Verde MAR做到。而其實墨西哥人成日都會飲仙人掌汁，甚至有仙人掌料理㗎。仙人掌肉光澤透明，味道清爽淡雅，加埋輕甜蘋果搾汁啱啱好。
同場可以飲埋牛油果奶昔，都係用新鮮牛油果、牛奶製作，綿滑有乳香。
香港極罕見，即摘即榨仙人掌汁。
【限定料理】超嫩！入口即溶慢煮牛面肉
墨西哥菜有好多肉湯類，但就好少用牛面肉嚟煮。大廚一次機緣巧合下試用牛面肉熬湯，因為肥膏筋位少，所以湯頭驚喜地清澈，但又有豐富骨膠原，絕對適合崇尚健康的女士享用。
湯頭清澈肉味濃，所以唔使好多香料已經好好飲。反而食嗰陣可以用薄餅包住牛面肉，再蘸少少紅莎莎醬，一嚐番茄、辣椒嘅甜甜辣辣好惹味。
軟腍牛面肉入口即溶，又有豐富骨膠原。
芝士薄餅
墨西哥經典薄餅—芝士薄餅，輕輕烤過的薄皮包住Mozarella芝士、新鮮蔬菜同自選肉。蘸醬食微辣帶香，好有地道風味。
牛油果羅文生菜生律
呢度真係牛油果控天堂，好多牛油果料理都落足料，好似呢個沙律就用咗原個牛油果！真係每啖都食到肥美果肉㗎。
最值得一提嘅係芝士，因為大廚ELIGIO對食物嘅堅持，係連牧場芝士都係自家製。芝士新鮮製作又不含防腐劑，食落香濃純淨帶鹹香，完全無羶味。
沙律用上原個牛油果，每啖都有肥美果肉。
牛油果青檸開胃沙律
其實墨西哥都有海魚刺身，喺呢款牛油果沙律就食到喇。雖然叫刺身，但其實唔係生食。墨西哥地道食法係利用青檸汁，將海鮮醃至半熟，保留到鮮味又輕酸開胃。
沙律入面仲有牛油果、新鮮番茄同青瓜粒，係墨西哥沿岸好受歡迎嘅料理嚟㗎。如果唔食魚，都可以轉為全牛油果。
墨西哥地道煮法嘅海魚刺身，利用青檸酸度醃熟魚肉。
墨西哥海鮮飯
墨西哥曾受西班牙統治幾百年，所以飲食文化都有西班牙影子，呢個海鮮飯就係其中之一喇。而墨西哥版本有別西班牙，係用海鮮湯將米飯煮得Q彈，粒粒分明唔會黏口。
上面鋪滿大蝦、青口、帶子等海鮮，食之前加啲青檸汁更加惹味㗎。
秘製海鮮湯煮米飯，粒粒Q彈並充滿海鮮精華。
肉桂脆條配朱古力醬
提到西班牙料理，相信大家對Churro完全唔陌生。全靠大廚本身崇尚健康，所以由麵團開始已經自家手製。用天然麵粉搓製，即叫即炸外脆內軟。
雖然係炸嘢，但起碼所有食材、調味都係健康零添加，蘸多啲朱古力醬食都無罪惡感呀。
Churro由麵團開始自家製，即叫即炸好酥軟。
Margarita
“Verde MAR”成個環境都好有外國氣氛，想輕酌兩杯暫時遠離繁囂，經典雞尾酒“Margarita”有3款口味揀—青檸、香橙同辣。
外國小店氛圍下，輕酌兩杯暫時遠離繁囂。
Verde MAR
地址: 西環西營盤水街41號地舖
電話: 28100888