中菜好講求手藝，小至點心嘅包燒賣；大至主菜嘅炆頭腩，都需要學師多年先出到大場面。銅鑼灣呢間上樓中菜館「顏府御膳」就由大師傅主理，並於傳統中菜加入新元素，重新演繹各道經典菜式，估唔到食咗咁多年中菜都仲有驚喜。
而家推出嘅「顏府嚐味午餐菜譜」一人份量都有頭盤、老火湯、主菜同甜品只係HK$180，就算一個人心血來潮想嚟嘆吓茶、食小菜，都唔會驚唔知點嗌嘢食。
頭盤7選1
胡麻豆腐／口水雞／涼拌窩筍絲／虅椒雲耳／紅椒汁露筍蝦餃／脆皮麻辣燒賣／遠年陳皮上湯浸牛肉球 |
份量過足口癮 口水雞
口水雞份量唔細，加埋後續嘅主菜，一個人食都好似試到2款小菜咁。口水雞係將嫩雞起骨，再加秘製口水雞醬而成，微辣香口，冬天食舒暢暖身。
比花椒更香更麻 藤椒雲耳
坊間好多餐廳都選用花椒，而今次食到嘅藤椒就比花椒更麻，又唔會有花椒嘅天然苦澀味。意即辣得嚟更麻更香，配清爽雲耳食就啱晒，嗜辣者可專注享受呢種又麻又辣感覺。
必試招牌！麻辣脆皮燒賣
唔少燒賣控都鍾意沾辣油，呢個麻辣脆皮燒賣辣得嚟但一滴辣油都見唔到。因為師傅一反傳統將特製辣油混合燒賣皮搓製，所以一咬開超脆外皮即滲出麻辣味，麻香越咬越突出，幾有驚喜。
升級牛肉球！遠年陳皮上湯浸牛肉球
遠年陳皮同上湯，完全顛覆經典牛肉球。先飲一啖上湯暖胃，再將陳皮連埋牛肉球入口，新鮮牛肉正常發揮爽彈得嚟有肉感，唔會出現坊間「粉多過肉」感覺。最精妙之處，係陳皮香相當搶眼，豐富咗牛肉球味道同口感層次，鍾意傳統點心嘅話推薦一試。
頭盤過後，就有每日用時令材料熬製嘅老火湯，例如早前大獲好評嘅野葛菜煲生魚湯。師傅每朝返嚟第一件事就係開火熬湯，大家到咗午市就可以飲到喇！
主菜6選1
伴水芹香／涼瓜豉蒜炆頭腩／農家乳香黑豚肉／野菌燒汁和牛／荷香鮮沙薑陳皮生煎雞焗飯／XO醬蝦乾肉碎炒芥蘭 (各款主菜附送絲苗一碗) |
新鮮龍躉 涼瓜頭蒜炆頭腩
好多長輩都鍾意食嘅涼瓜頭蒜炆頭腩，係用40斤新鮮龍躉炆製，比一般魚肉更紮實，嫩滑得嚟又彈牙。豆豉、涼瓜亦將魚油香引味，真係深海魚先有嘅獨特口感同味道。
西班牙黑豚肉 農家乳香黑豚肉
西班牙黑豚肉肉質比一般豬肉更嫩，而且油脂豐富唔膩，鍾意又嫩又重肉味嘅可揀呢道主菜。大廚亦以鹹香微辣南乳吊味，佐飯一流。
唔平凡家常菜 野菌燒汁和牛
使用嘅澳洲和牛有大草地畀牛隻自然放牧，所以牛肉纖維更豐富，咬落更有口感有肉味。配埋新鮮野菌、自家製燒汁就完成呢道唔平凡嘅家常菜。
皮脆三黃雞 荷香鮮沙薑陳皮生煎雞焗飯
個人覺得呢個焗飯好值得一試，本身冬天食荷葉飯已經好滿足！加上今次係用出名皮薄脆口、肉嫩味濃嘅三黃雞，而且將雞骨全起再配埋鮮沙薑、遠年陳皮一齊煎煮，啖啖荷葉飯香＋無骨雞肉，一般蒸雞飯真係無得比。
滋補甜品
最後仲有甜品南北杏雪耳燉萬壽果，係用泰國木瓜、雪耳、南北杏清燉，乾燥冬天滋潤養生一下。
同場加映 脆皮黃油塩香雞
套餐以外想單點三黃雞，仲有呢道脆皮黃油塩香雞。原隻黃油雞油浸15分鐘，再用滾油淋至雞皮脆口即上碟，更突出三黃雞皮薄脆口嘅賣點。
顏府御膳
地址: 銅鑼灣開平道1號Cubus 5樓
電話: 28990055