翠華餐廳 (已結業)

大前日(28-9-2015 Mon)追月夜,同男友送別佢養母後,離開東區醫院有啲肚餓,要食o野,我o地決定返過o黎九龍至食,我o地o係碧街落車,呢o度大把o野食,男友提議食麵,求祁o黎翠華啦,由於佢想去廁所,而廁所又o係二樓,所以我o地上二樓.上到去都冇乜人,坐低後睇menu,男友要$33.00o既鮮蝦菠菜餃米缐,咁我要$37.00o既魚湯自製魚四寶麵,有魚蛋,墨魚丸,魚腐同魚春卷.好快,兩碗o野到o黎,睇到唔大碗,男友o個碗o既鮮蝦菠菜餃擺得好整齊,影好相又食得.先食我o既魚四寶,魚蛋比較腍;墨魚丸爽啲;魚腐浸到好似冇晒豆腐,又腍;魚春卷扁o既,內裡o既魚蛋幾乎食唔出,口感竟然同魚腐差唔多.而麵呢?食返細個時o個種味道,湯味濃郁.而男友o既鮮蝦菠菜餃呢,都普通正正常常咁啦,而佢碗湯o既味道又唔同,不過都幾濃.環境:裝修到舊式豪華茶餐廳,但俾我o既感覺有啲似唔正經o既食肆.

今晚放工去油麻地整CHEESE CAKE，上堂之前喺附近食嘢，由於我係翠華脆脆豬嘅忠實粉絲，所以食翠華係理所當然。鹿兒島風豬軟骨鮮蝦菠菜餃米線餐，跟熱好立克，＄46。先講豬軟骨，滷得很入味而且有筋有肉，最喜歡咬充滿膠質筋位，煮得非常非常腍，直頭係輕輕用牙一咬就化開，個人喜好豬軟骨煮得咁腍，好好味啊！至於鮮蝦菠菜餃真係不得了，一夾起先知佢足足有2吋咁長，一睇就知落足料，餃子皮夠薄，而且材料好新鮮，蝦仁食落爽口，配埋菠菜，真係好夾。通常食菠菜餃，都係茶樓蒸餃，原來菠菜湯餃仲好食！最搞笑係開頭落單時有個伙計以為我未落單就喺度玩IPAD，之後好有禮拜咁催促我落單，後來我同佢講我已經叫咗，莫非我個樣好小器？佢之後對我照顧有加，又驚我飲好立克唔夠甜遞糖包比我，上菜個時又講唔好意思，其實我真係唔MIND喎，哈哈