檬茶茶 (已結業)

放工行咗出佐敦，行到身水身汗，沿途被一浸冷氣所吸引住，再望一眼就發現一間粉紅小店呈現眼前💖。小店名叫「檬茶茶」，名字同裝修一樣可愛。店主非常用心佈置，每個角落都好靚，少女味極濃，打卡一流📸。不過呢度不設堂食，只供外賣。我諗店名有個檬仔係因為佢主打手打檸檬茶🍋。檸檬茶係香港一大飲品，雖然四周圍都有得飲，但呢度確係富有自家特色。除此之外，佢亦提供多款小食。招牌桃膠爆打檸檬茶($38)，呢款係招牌飲品，佢同時加入黃檸檬同青檸檬，檬味突出，酸甜適中，茶底唔澀，而且仲帶一份清新滋味🌿。桃膠打到溶晒，再加埋雪燕，飲落幾有層次感，唔錯。香橙蜜桃檸檬茶($44)，呢杯檸茶加入咗其他水果口味，所以檸味即使弱咗，不過橙味就好強，幾特別🍊。幾款水果夾埋一齊毫無違和感，而且味道天然，好過連鎖店嗰啲「糖水」好多！寒天波波奶茶($38)，奶茶又香又滑🧋，茶同奶嘅比例適中，叫咗少甜真係做得到。奶茶配料係透明嘅寒天波波，口感Q彈，無珍珠咁甜同咁韌，感覺健康啲。黑椒台灣腸($38/5條)，🌭台灣腸一向好食，而且口感彈牙，再加上呢款係黑椒味，微微辣，份外惹味。惹味雞鎚($58/5隻)，🍗雞鎚好肥美厚肉，外層蘸滿辣粉，並炸

🍋粉紅檸檬茶店💕有別於一般飲品店，主打係港式檸檬茶！無論茶餐廳或者紙包飲品，我都勁鐘意檸檬茶，簡直檸檬茶中毒者😆招牌桃膠爆打檸檬茶🍋喺炎熱得天氣下，檸檬茶真的是十分解渴！而且又有桃膠又雪燕十分滋補。雪燕入口的感覺碎碎的，都幾特別。🍊香橙蜜桃檸檬茶用上新鮮嘅橙，橙味非常突出！推介～寒天波波奶茶好重茶味，唔係好似台式咁重奶味。偏甜人士可以無需少甜。寒天波波有點爽脆，口感特別。黑椒台灣腸黑椒一粒粒喺條台灣腸入面，咬開勁重黑椒味～泰式小魷魚🦑好耐無食小魷魚，小魷魚口感爽脆，配合特免泰式醬料，惹味而且幾特別。💕呢間餐廳仲好有愛心，為區內有需要人士提供免費食物及飲品。

先生最近經常OT，放工喺公司附近行吓，見到呢間充滿少女心嘅小店，順便買定飲品同小食等佢放工。店入面有超可愛嘅擺設同少女心爆棚嘅花花背景，超想坐低打卡！飲品方面主打檸檬茶，加入唔同嘅元素令到檸檬茶變得非常有新鮮感，特別係加入養顏嘅雪燕，十分吸引！除咗檸檬茶之外仲有奶茶同咖啡可以選擇，亦有幾款惹味小食，價錢合理。除咗少女心爆棚嘅裝修之外，另一樣令我好有衝動想幫襯嘅原因係呢張poster，令人感覺勁窩心！日子唔容易過，但總會遇上令你會心微笑嘅人同事。飲品方面揀咗香橙蜜桃同西柚口味嘅檸檬茶，有滿滿嘅鮮果同雪燕，睇見都透心涼。香橙蜜桃檸檬茶透住淡淡嘅蜜桃香氣，加入香橙同檸檬茶毫無違和感，甜度亦適中。檸檬茶加入西柚一拍即合，同想像嘅一樣咁清新，酸甜開胃，清爽解渴。一口蝦多士即叫即製，蝦膠鮮味，配上香脆嘅多士同沙律醬，絕對令人一啖接一啖食唔停，非常推薦！泰式小魷魚新鮮彈牙，配上酸甜開胃嘅泰式醬汁非常惹味，而且份量多，兩個人分享剛剛好。難得遇上一間質素高心地又好嘅小店，絕對值得支持！