616燒肉酒場

616 除咗火鍋店之外，朋友話我聽原來616係大圍開咗間燒肉店，問我有冇興趣？我當然有啦，佢預先係Openrice 訂位仲享有9折。燒肉店內嘅裝潢好有日本居酒屋嘅感覺。坐位旁邊有個箱可以放衣物入去，呢點幾貼心。呢度點餐都係用平板電腦，有幾款燒肉套餐選擇或者以單點形式都可以，我地選擇單點。除左食燒肉之外，仲有壽司、刺身、炸物、前菜沙律⋯⋯當然唔少得清酒、啤酒、果酒和梅酒啦。現時餐廳做緊優惠，清酒、果酒720ml 有8折優惠。✨自家製冰話梅小蕃茄 - 蕃茄仔用咗話梅醃製過，蕃茄和話梅嘅甜酸味道好夾，好好味嘅一道開胃菜。✨野菌蟹肉茶碗蒸 - 好足料，有野菌仲有好多蟹肉同瑤柱，味道勁鮮甜，蛋都非常嫩滑，非常推薦。✨獅子王飯卷 - 有鰻魚、青瓜、忌廉芝士、牛肉和木魚花，似平時食開嘅芝士鰻魚卷咁。✨A5三角肉刺身 - 油花比例均勻，入口即溶，加咗蔥花同柚子可減少油膩感。✨黑毛和牛友三角 - 三角肉油脂比例均勻，肉味香濃。燒完再點雞蛋醬汁，令牛肉口感會更滑更好味。✨黑毛和牛特選牛小排 - 油花比例均勻，燒過之後油份更突出，放入口即溶，非常推薦，必點。✨澳洲和牛牛肋條(汁燒) - 燒到兩邊微焦之後，就可以將其剪開小片再燒一陣，牛肋條肉味濃帶少少油脂，夾埋生菜食會冇咁膩。✨澳洲和牛牛腹肉 (汁燒) - 肉味濃，肉質結實有咬口，醃製過嘅牛腹肉味道甜甜地，不用再調味已好夠味。✨燒鳥盛盒- 有雞頸肉結實有咬口、雞腎爽口、雞腿肉嫩滑。✨鹿兒島黑豚腩西京燒 - 選用腩位部份富脂肪，燒過之後好香口，食落唔膩，入口軟腍鬆化。✨柚子雪葩 - 食咗咁多肉，最尾食返個柚子味雪葩解膩，為呢餐畫上完美句號。616 無論打邊爐定燒肉我都一樣咁鍾意。…查看更多

天氣涼涼哋其實就最啱食烤肉☝🏻616 除咗有火鍋店之外，仲有呢一間食烤肉嘅，舖頭就喺大圍，大圍站出嚟行一陣就到～ 門口大大隻字616 好易認店舖座位唔係好多，如果想食記得訂位～ ✨自家製冰話梅小蕃茄酸酸甜甜之餘又Juicy~ 作為前菜非常之開胃✨野菌蟹肉茶碗蒸鋪滿鮮甜嘅蟹肉，入邊係滑滑嘅蛋✨燒鳥盛盒盛盒有嫩滑嘅雞腿肉，爽口嘅雞腎同彈牙嘅雞頸～ 餐廳用鹽同埋黑椒調味，燒完香口又惹味✨黑豚腩西京燒用西京燒汁做底～黑豚腩厚身爽口，燒好後微微焦香，甜甜地唔會太膩和牛系列～ 嚟得呢度點會唔揀牛肉😌✨A5三角肉刺身入口即溶㗎😗重油香✨黑毛和牛特選牛小排油花均勻～簡單用少少鹽做調味✨澳洲和牛牛肋條 不嬲都係自己最鍾意食嘅位置，用嚟燒係別有一番滋味，原條燒～再剪開包住生菜食，咁樣可以減低油膩感～ ✨黑毛和牛友三角肉牛腿位置，肉味同埋油脂都平均～ 燒好之後撈蛋漿食～ ✨澳洲和牛牛腹肉 汁燒～用甘口醬汁調味，牛腹肉亦好重肉味✨獅子王飯卷用鰻魚、飯包住和牛、芝士同青瓜。口感同味道都非常有層次。最後店員送上咗兩個清甜嘅雪葩去解一解食完和牛嘅油膩感 ～ 完滿🤭…查看更多

尋日同朋友嚟大圍食飯，呢間燒肉店外觀已經好有日本特色，行到入去簡直好似去咗日本旅行咁，和式裝修配上櫻花🌸同日本燈籠🏮好打卡～❄雪 • 二人特盛 ️ 我哋叫咗個二人套餐，包括沙律，刺身，茶碗蒸，燒肉拼盤，溫泉玉子丼，兩杯飲品🍅蕃茄沙律蕃茄爽脆清甜，配上特製醬汁同紫洋蔥，酸酸甜甜，清新醒胃，可以平衡燒肉嘅油膩感～刺身三點（三文魚，油甘魚，赤蝦）- 三文魚厚身鮮味，有魚油香- 油甘魚色澤鮮嫩，入口甘甜鮮味，肉質嫩滑- 赤蝦晶瑩剔透，鮮甜肥美🦀野菌蟹肉茶碗蒸茶碗蒸好滑，蛋香味濃，配上清甜高湯，中間仲有絲絲蟹肉，好鮮味～🐮燒肉拼盤- 包括一款黑毛和牛，五款澳洲和牛，鰻魚，各款蔬菜～- 黑毛和牛色澤粉嫩，油花分布非常靚，牛肉味香濃之餘油香味亦非常重，口感軟熟，入口軟嫩～🤩- 澳洲和牛相對口感比較結實有咬口，肉味比較濃，油脂冇咁多～- 鹹魚青菜各有所愛，我自己就鍾意黑毛和牛多啲😝- 鰻魚肉質非常嫩滑鮮美，都幾厚身，肉質唔會好淋好肥，配上鰻魚汁好惹味～溫泉玉子丼食燒肉梗係要送飯啦，特別撈埋溫泉蛋蛋漿同紫菜及醬汁，好滿足～🍎日本木村信州蘋果汽水酸酸甜甜好開胃，食完燒肉用嚟清新口腔一流～柚子雪芭食完燒肉驚成浸味，食返個甜品清新下口腔，酸酸甜甜，食完即時降溫～整體食物質素都唔錯，服務員態度殷勤，會主動介紹食法同收拾枱面，環境舒適，樓底夠高空氣好流通，唔會污煙漳氣～…查看更多

最近同朋友仔試左呢間超抵食燒肉，環境好靚，天花好多花瓣裝飾，野食大份又高質，難怪好受歡迎。我地叫2人餐先$888，但就包左前菜、茶碗蒸&刺身、燒肉拼盤、溫泉玉子丼+飲品，晚市仲送埋柚子雪葩，好豐富食到超飽😝⁂⁂⁂雪．二人特盛⁂⁂⁂❀蕃茄沙律配芥末沙律汁❀蕃茄切成薄片，配上生洋蔥，酸酸甜甜好開胃。❀野菌蟹肉茶碗蒸❀係蟹肉唔係蟹柳覺得好好😆蟹肉鮮甜，茶碗蒸個蛋蒸到好滑溜。❀刺身三點❀有油甘魚、三文魚+赤蝦，當中油甘魚油分高，食落淡淡甘甜；赤蝦好彈牙；三文魚夠新鮮，肉質細嫩。❀燒肉拼盤❀有6款唔同部位既牛肉，包括：4款澳洲和牛、1款黑毛和牛+牛肋肉。進食次序係：黑毛和牛-》澳洲和牛-》牛肋肉，由淡味食到濃味。黑毛和牛呈雪花狀，脂肪分佈均勻，燒完後油香四溢，牛味濃郁，質地柔軟，入口即溶。澳洲和牛當然冇和牛咁多油花，但脂肪平均又夠肉汁。另外仲有白鱔，燒到邊邊位金黃色，魚皮脆卜卜，鱔肉有彈性，倒少少醬汁落去好好味。❀溫泉玉子丼❀好大碗飯，完全食唔哂，我食哂上面既紫菜+溫泉蛋，蛋汁好香🥺❀巨峰提子、白桃味梳打❀食燒肉燒到口乾，黎返杯酸酸甜甜既凍飲，好大杯，一邊食一邊飲超爽😋晚市食到最尾侍應會送上柚子雪葩，酸酸甜甜咁幾好味。…查看更多