涮得棧星級火鍋 (已結業)

今天是聖誕佳節，感覺終於也暖和了些；還記得上星期真的凍得要命，凍到甜魔爸爸及媽媽都先後病到!  生病時真的一點不開胃，毫無食慾，但一病好就咀饞得要命，就趁仍然寒冷的happy thursday夜晚 (為什麼是happy thursday? 因為甜魔媽媽請了假，星期五不用返! )，與老公去了打邊爐~　個人對黃大仙不太熟悉，不過就很近老公的工作地點了，由學校步行過來也是十分鐘左右! 來到才知涮得棧是與譽宴同一集團的，環境企理不在話下，而且店內設有特多間房，讓我與老公可以好好的享受一頓二人世界，不，是三人世界 (因為妹妹也來了!)，的清靜打邊爐~兩口子都才病好，太補或太寒的湯底都不敢選，就點了蕃茄薯仔豬骨鍋 ($58)；湯底重蕃茄味，同時又有大量豬骨在底，有一定鮮濃厚感，不錯的。吃打邊爐的飲品多是竹庶矛根水，性質較寒，是晚卻喜見有羅漢果五花茶 (一杯$18/一渣$35)，成品口味微甜清潤，實在是打邊爐的超級良伴，雖然份量不少，我與老公還是合力將之完全清光了!一見到金牌流沙包 ($18/3隻) 就雙眼放光的甜魔媽媽，第一時間就落單了，又忘了交帶要後上，結果成為最先上檯的「頭盤」。也罷，反正媽媽也急不及待想試，就馬上與老公一人撕開一個：嘩，金黃香濃的奶皇餡馬上洶湧流出，味道香濃甜美之極，好好吃啊! 馬上將餘下一個也馬上幹掉，之後還考慮要不要再加點一客呢... (最後因為太飽，改點糖水算了~)吃火鍋時我們習慣了要先吃菜 ，這樣比較有利腸胃消化，會健康得多 (其實吃buffet及其他大餐也一樣!)，所以首先向鮮雜菜籃 ($38) 進攻。喜歡它一籃包括不同的菜類，包括油麥菜、娃娃菜、唐生菜、小白菜等，選擇夠多又不會沉悶，當日最喜歡清爽的油麥菜，兩口子簡直要爭食了，搶+食得非常過癮!也點了金菇益菌併盤 ($38)，內容包括金菇、花菇、松茸菇、雞脾菇及秀珍菇，每款一些，健康同時又非常的適合兩口子分享。菜類及菌類雖然健康，但打邊爐總得來點肉類才夠盡慶及過癮；當晚點了一口和牛粒 ($78)，份量不少而且質素上佳，油脂豐富、牛味香濃，較厚身的質感也帶來更滿足的口感，最重要是長時間淥熨也不會變實變嚡，兩口子一粒接一粒的吃，既飽足又滿意!相比之下，蒙古羊片 ($38) 的口感就不夠和牛粒的豐腴豐富了，不過羊片那獨有的羶香，也是牛肉所無法取代的。還有鮮蝦水餃併雲吞 ($38)，每款各有三隻，太適合人少少分享了；而且兩款都做得不錯，皮薄餡靚味也鮮，淥很久也不會散開，幾抵讚的。由於花枝片 ($58) 最後才上檯，相對吃剩最多就是它，沒法，真的飽了.........如非太飽，還真想再點多籠超級美味的流沙包!! 不過才病好不要吃得太盡，飯後最後只點了一碗楊枝甘露 ($18)分享算了。成品賣相一般，味道倒是幾清甜可喜，是個滿足的結尾。總的來說，挺喜歡這裡的環境格局 (帶著BB來也無問題!) 以及食物份量可多可少的選擇，定價也算合理，實在是兩口子或是三五知己聚頭的好地方。…查看更多

雖然依家食火鍋都無分季節，一年365日都可以，不過，晌冬天尤其感覺特別有風味。就好似盛夏之時，雖然可以開大冷氣打邊爐，但食完一出門口，夏死辣辣，無晒涮完火鍋之後嗰種禦寒嘅感覺；相反，晌寒冬之下，涮完火鍋一出門口，寧捨有種仲喺暖笠笠嘅感覺。今晚，雖然未喺好凍，天氣都有啲涼，經介紹下，就同幾個朋友嚟到「涮得棧」涮涮火鍋，慢慢涮，慢慢嘆！明明嚟到店舖附近，都望唔到涮得棧，原來佢喺譽宴所開嘅火鍋店，譽宴個霓虹招牌勁搶眼，所以涮得棧個招牌差啲睇漏眼。餐廳就晌一樓，一邊喺譽宴，另一邊就喺涮得棧。估唔到涮得棧地方幾闊落，枱櫈間隔亦都排得唔逼，感覺寬敞舒適:)。最正喺原來店內有多個獨立廂房，有大有細，據店員話4個起就可以訂房，仲要無最低消費，最抵死有埋平面大電視，唱埋K都仲得，真喺搞生日、聯誼吓都唔錯喎，可以食得更自在！翻一翻火鍋點菜紙，都有幾多選擇，配料夾夾埋埋超過80多款，而海鮮類似乎幾有睇頭。最有趣喺晌譽宴嗰邊見到個刺身房，所以涮得棧同樣有刺身供應，以及餐前小食。順帶一提，雖然招呼我哋喺啲阿姐，但殷勤有禮，經常主動換碟加湯，成日都多謝前多謝後，值得一讚。醬料醬料費每位收番$15，調味架放晌一旁，有醬油、醋、生蒜、熟蒜、蔥花及紅椒，稍為選擇少，另外一壺備用清湯亦預先放置好，唔使成日叫加湯咁麻煩。不過，房內亦有電鐘，有需要一按就有店員入嚟幫忙。招牌蟹鍋 $198:)湯底一共有11款，其實有幾款湯底幾感興趣，例如：奇味辣雞鍋（半隻$88 / 全隻$168）、滋補醉雞鍋（$88 / $168）、花膠螺頭鍋（$108），但結果揀招牌蟹鍋，因為喺用上法國麵包蟹，感覺特別。湯底以基本嘅蕃茄薯仔豬骨鍋底為基礎，鮮蟹另上，以驗明正身，不過，最初嚟錯隻肉蟹，但又錯手放埋落湯，事後經理發現，再送多隻肉蟹俾我哋。由於湯底帶濃濃蕃茄香，幾鮮活，而肉蟹又頗鮮甜，真喺唔錯！我哋剔吓剔吓都點咗唔少嘢，依家就開始重點逐一介紹吓：招牌手切本地肥牛 $128（中）/ $188（大）:):)食火鍋點可以無肥牛，所以一起手就要中份手切本地肥牛，油花唔算分佈得好平均，但勝在肉味濃，灼過後好嫩滑，咬落無渣，頗鮮甜。美國桶蠔 $148:):):)今晚小弟嘅推介首選，一份桶蠔有5隻，隻隻肥大肉厚，就算淥完依樣仍然大大隻，咬落爆汁滑溜，認真飽滿鮮味。鮮魷魚 $42:):)魷魚雪白晶瑩，難得師傅切得夠大件頭，輕灼之後，入口爽彈鮮甜，用料不賴。老友鬼鬼 $58:):)幽默嘅名字，將蝦膠釀入油炸鬼，件件油炸鬼塞滿蝦膠，一客8件確實幾抵食。因為「老友鬼鬼」本身都半熟，所以晌鍋內拖幾拖都已OK，油炸鬼腍與脆之間，而蝦膠質感爽彈，食落味美富層次。自選手打滑雙拼 $78:):)獨立叫基本上有墨魚滑（$68）、鮮蝦滑（$68）、鯪魚滑（$48），亦有雙拼（$78），咁雙拼當然喺墨魚拼鮮蝦啦。兩款手打滑除了彈牙之外，前者墨魚味幾濃，後者蝦味挺鮮，值得翻兜之選:)。脆炸響鈴 $38:)估唔到響鈴上枱仲有啲暖暖哋，放晌湯中輕灼數秒，脆身得嚟又滲進少少蕃茄湯味，效果不俗。鮮雜菜籃 $38時令蔬菜大概有廿多款，除非你有心水指定食邊幾款菜，否則好似小弟咁隨意無所謂嘅話，鮮雜菜籃就最唔使煩，我哋份菜籃有唐生菜、娃娃菜及菠菜，感覺幾新鮮。試咗唔少嘢，不過唔喺樣樣都有水準，好似個花彫醉生中蝦（$88），一客只有5隻，雖然蝦鮮，但缺少酒香，似乎花彫未滲透蝦中:(；脆鯇魚片（$48），起晒雙飛，賣相靚，可惜質感未夠脆:(。羅漢果五花茶 $38:):)飲品除慣常嘅汽水，咁就要搵啲清熱、滋潤嘅嘢嚟緩和一下食火鍋嘅燥。店內提供羅漢果五花茶及竹蔗水，前者較少飲自己揀佢。味道幾清香，又帶少少甜，夠冰凍可以幫個人降降溫，爽呀！加埋臨尾一碗勁薑芝麻湯丸，暖意十足，捧住個腹！有大集團支援，食材質量應該有保證，不過個別食物再改善、提升一下就更完美，但環境及服務依兩環就好稱心，尤其人少少都有獨立房就最得我歡心，唔單私隱度高啲，最重要唔使咁嘈:)，方便跟好友邊食邊傾偈，唔使嗌爆咪都聽唔到人哋講乜嘛。…查看更多

今晚麵包王朋友約了我們去食火鍋晚餐，其後選擇了去黃大仙「涮得棧」打邊爐，而且我也好開心識了兩位新朋友，真是好高興認識你們。一入門口，樓下的知客好有禮貌地問我們食小菜或是火鍋，原來涮得棧都是譽宴旗下的分店之一。地方都幾寬敞，而且設有包廂 ，更沒有最低消費就可以安排在包廂內打邊爐。更是可讓客人更有私人空間，又有電視機可以睇電視，更可以食得盡慶。以下就是我們點了的火鍋食物......招牌手切本地肥牛(中SIZE)$128鮮黑牛柏葉$58鯇魚片$38美國桶蠔$148自選手打滑雙拼$78脆炸響鈴$38手唧魚麵(3枝)$28老友鬼鬼$58皇帝菜$32唐生菜$28西生菜$28鮮豬腰$35鮮魚卜$38鮮帶子$98鮮魷魚$42花彫醉生中蝦$88羅漢果五花茶$38一酌 x2火鍋湯底點了一個招牌蟹鍋$198，熱騰騰的湯底滾起了，開蓋之後也是散發陣陣的蕃茄味，湯底更有一些蕃茄及薯仔，味道酸甜也算吸引，有一隻蟹是另外放在另一隻碟，不過隻蟹都幾細隻。火鍋配料更是逐一上枱，擠滿了整張枱都是火鍋食物，今餐也是算豐富。在打邊爐前奉上了6格的配料座，讓我們自行配搭，可是種類較少，只有紅辣椒、醬油、乾蒜、蒜蓉及青蔥。如可增加多點配料如芹菜、麻油、胡椒醬、沙爹醬……那麼更是可以令美食昇華而陪感滋味。:)一邊把食物正在烚下烚下時，我們先乾杯飲羅漢果五花茶，味道也不會太甜，好清香的感覺，更是為我們清下熱氣。其後點了第二酌的羅漢果五花茶就凝結了好大舊冰!!:(竹庶水又賣晒，有點可惜。鯇魚片魚味不算濃，不過烚了一陣都已經好快散。手唧魚麵食落的都算口感煙韌，但千萬不好煮得過熟否則就好腍。花彫醉生中蝦不算酒香撲鼻，酒味晤夠濃，但蝦都好新鮮大隻，也算爽口彈牙。手切本地肥牛都切得夠薄，油花分怖都好分明平均，肉味一般。脆炸響鈴上枱時也帶點微暖，入口都好脆，鮮帶子不是好夠鮮，質素一般，豬腰都算新鮮可是晤夠爽滑，美國桶蠔是今晚最好食的食物，入口已爆開蠔汁有蠔鮮味而且入口滑溜，大大隻飽滿又鮮甜。而自選手打滑雙拼我們選擇了墨魚滑及鮮蝦滑。兩者都好新鮮，入口彈牙有鮮味。鮮魚卜都好新鮮，入口都晤腥，好彈口爽口。皇帝菜、唐生菜及西生菜也是好翠綠新鮮爽脆，份量都好足。老友鬼鬼其實油炸鬼釀蝦膠，上枱時仍帶點微熱，放在火鍋拖一拖就已經撈上來食，外層仍帶點脆口的油炸鬼加上內層彈牙的蝦膠，令口感帶點層次，一次過可以享受有兩種口感。最後尾聲食了碗芝麻湯丸，一共有三粒，芝麻餡好香甜，湯丸食落口感煙韌皮又夠薄，個薑湯濃咗點，入口帶點辣。服務真是不錯，樓面姐姐也常幫我們換碟，經常幫我們加荼水加火鍋湯，最後更是幫我們清理好枱再上甜品給我們，招呼真是一流。食物的水準好一般，只是勝在新鮮，個招牌蟹鍋$198真是好晤值，隻蟹又細又少肉，放入火鍋中都不能帶出有蟹味，本來期待後來都有點失望。放火鍋配料的碗是斜，好難放公筷在碗上面，晤是太方便。…查看更多