羅麥記 (V City)

媽媽旅行在即，又是忙著執拾行李的時候，所以我們都是在附近vcity吃晚餐，吃完可以直接回家，非常方便。羅麥記 基本上是我家經常光顧餐廳之一，因為它的主食和小食多樣化，又夠本土風味。我超愛羅麥記的炒粉麵，皆因它鑊氣十足，很少在大排檔以外的地方吃到。我忽然想吃辣，所以來一盤避風塘牛肉炒河。酥脆的炸蒜與辣椒跟河粉 一起炒過，蒜香濃郁，河粉除沾染辣椒與炸蒜外，本身吸附鹹香的豉油，好不滋味。牛肉超豐腴鮮嫩軟滑，經炒過後帶咬勁。媽媽每次來羅麥記一定會吃兩樣東西，一是西檸蜂蜜配乳鴿仔，另一樣是雪糕紅豆冰。這裡的乳鴿仔咬下第一口時真的停不下來，肉質鮮美多汁，外皮酥脆，吃得過癮，吮指回味這好滋味。媽媽所以愛雪糕紅豆冰，全因甜蜜蜜的紅豆搭配清涼的椰汁冰與綿密的雪糕，一瞬即逝的味道，就如初戀般的滋味，可能因為爸爸從前跟她拍拖的時候經常喝紅豆冰關係?我則喜歡紅豆冰粒粒奶茶，喝起來有著奶茶的芳香，紅豆飽滿，口感細緻，入口即化，整體不甜膩，味道十分合拍，超好喝。Xo醬豬頸肉炒翠玉瓜相當出色，翠玉瓜鮮甜爽脆不在話下，xo醬將豬頸肉拌炒得香氣四溢，帶點油脂的豬頸肉非常惹味，下飯一絕。…查看更多

放工後約了好友到Vcity的<羅麥記>，吃香港懷舊的特式美食。餐廳佈置維肖維妙，模仿六七十年代的老香港，門面擺放了舊式電視、輪盤電話及收音機，牆壁上有很多古舊的廣告標示，猶如回到過去。餐牌上的選擇琳琅滿目，我跟友人也看到眼花瞭亂，所以最後也在經典推介中，選出最想吃的王牌推介，分別是阿芝芝士撈麵、磚頭焗豬扒飯、蝦多士及紅豆冰粒粒奶茶。阿芝芝士撈麵餐廳的上菜速度很俐落，落單後大約5分鐘，熱辣速的阿芝芝士撈麵先上。半溶的芝士幾乎舖滿了整個撈麵，十分誘惑! 我們先撈勻芝士和麵條，看見已經食指大動。吃一口撈麵，每條撈麵也掛滿了濃郁的芝士，難得的是撈麵經過芝士的浸泡，仍然保持彈性，非常滋味! 雞扒份量為2大塊，雞皮煎至金黃脆口，肉汁濕潤美味，我倆十分滿足。磚頭焗豬扒飯磚頭焗豬扒飯的賣相十分吸引，真的很好奇豬扒飯和厚多士的混合體會是什麼味道。蕃茄豬扒份量很多，滿溢厚多士的表面。我們要先拿出豬扒，才能吃到有濃郁蕃茄香的米飯。內裡的麵包雖然被挖空，但部分的麵包仍然留下。意想不到的，麵包口感軟綿，點配芝士蕃茄醬，味道惹味非常。真想把脆脆的厚多士外殼也吃完，但我倆也真食不了這麼多。蝦多士蝦多士也不負眾望，是十分香脆可口的小食咸點。蝦多士表面焦脆，看起來焗至漲卜卜。多士口感富空氣感，蝦肉打至膠狀，十分彈牙厚實，配合他他醬，真的十分"舔舔脷"。但如果有生菜墊底，幫助吸收炸油會更佳。紅豆冰粒粒奶茶紅豆冰奶茶是頗居特色，因為紅豆冰和奶茶也是香港著名的飲料，它們的結合著實驚喜。紅豆冰雪成四方粒粒狀，開頭飲時奶茶味較重，待紅豆冰粒粒溶解後，紅豆味更出眾，十分美味! 總括而言，羅麥記的食物頗居香港地道特色，款式選擇多，上菜速度快，的確值得一試! …查看更多

其實我好鐘意食雞翼, V-city既羅麥記經過好多次, 辣雞翼就一次都未食過 ...襯住上海婆婆排到天昏地暗, 我地就轉移陣地去羅麥記食 ...我地叫左 阿芝芝士豬頸肉撈麵,  焗住食豬扒飯,  避風塘牛肉炒河, 蝦多士, 紅豆冰粒粒奶茶... 阿芝芝士豬頸肉撈麵: 用光面黎做撈麵其實真係無咁好食, 因為麵條會淋d濕d, 會一舊舊 ...但經過我用心地拆返開, 就可以開動啦 ...芝士味幾正, 都好濃, 所以加左落個麵到就有咸味, 真係幾good ...豬頸肉唔夠香口, 不過算係咁啦 ...懶唔想出TST食個時可以頂下癮 ... 焗住食豬扒飯: 見到枱枱都有磚頭豬扒飯, 但個個都食唔到個包 ...為免浪費, 我地叫左個普通豬扒飯 ...我最鐘意汁撈飯 , 而呢到既味道好肯定係媽媽既味道, 因為佢個汁明顯係用茄汁開出黎, 而且亦唔多番茄 ...不過好少食呢隻味, 而我媽係唔會煮飯, 所以食一次都OK既 ...豬扒就比較扎實, 都唔會太乾...都pass既 ... 避風塘牛肉炒河: 避風塘無避風塘味, 炸蒜唔夠多, 牛肉又無味 ...不過河粉條條分開, 亦都炒得唔錯 ...可以再咸d ... 蝦多士: 蝦膠唔夠彈性, 而且落左蔥, 所以令到面頭既蝦膠味道同口感都變左鯪魚肉 ...多士方面用左厚既包, 佢係介於長法包同牛奶包中間...因為佢外貌係法包件, 食落去就無法包咁硬, 仲係軟到好似牛奶包咁 ...並因為呢個原因令到多士唔夠脆...如果要衰d咁講就係煎鯪魚肉夾麵包 ... 紅豆冰粒粒奶茶:奶茶幾好味: 飲到茶味, 亦有奶味, 甜味都夠 ,另外 紅豆夠淋夠甜 ...不過兩樣加埋就有d唔湯唔水既感覺 , 我係其他餐廳飲過更好味既 ...而且因為豆太多, 令到奶茶得好少...飲幾啖就無哂 ...你可能好奇怪點解我地都係無叫雞翼, 其實原因就係雞翼價錢同一個粉麵飯一樣價錢 ...咁倒不如食飽d, 兩個人食3個主食...結果真係飽到喊 ...…查看更多

屯門好大又多野食試下懷舊茶餐廳有好多舊式電器 員工著校服好可愛的飛行棋紙寫住食物係到架炒蛋唔夠滑多士得少少牛油脆脆的面包磚包圍住睇上面幾多汁 食到下面就冇汁有d芝士係面有蝦、帆立貝、青口、魚柳好多飯 食呢個超飽呢杯紅豆奶茶有驚喜紅豆整到一粒粒冰正方形大大粒原本有3粒架放係到溶左一粒XD奶味茶味都好足…查看更多

大少成日都話想食羅麥記，終於俾佢食到，因為……唔多人等位~~平時V City經過見到佢都好懷舊，估唔到入到去，真係好特別一坐低，店員拎咗本好似手冊嘅menu俾我地，最後我地點咗幾樣佢話係推介嘅食物黑汁墨魚鬚 - 呢個應該係甜豉油加燒汁整，甜甜地，不過個墨魚鬚就應該係就咁白烚，如果係一早炒埋，應該會比較入味，依家只係汁有味墨魚鬚無味羅麥雞翼撈丁 - 呢個好明顯係瑞士汁雞翼撈出前一丁，絕對唔會失敗，所以正常好味磚頭焗白汁芝士海鮮飯 - 呢個，我絕對唔會建議你食，除非你好鍾意食受潮感覺嘅麵包，個汁唔夠，我地最後要佢另上多碗汁俾我地，基本上同磚頭包唔夾，點都係茶本嗰啲甜嘅形式好好多紅豆冰粒粒奶茶 - 呢個奶茶對於我呢個奶茶怪嚟講，只可以話合格，不過最欣賞佢係將啲紅豆沙整成冰粒，咁就唔會因為有冰而令佢杯奶茶再比之前更淡…查看更多

第一次來到屯門V City吃晚飯，遠處看到羅麥記的門口已經被吸引著，一個舊式的電視機，一把電風扇，一個黑白的手撥電話，童年的回憶慢慢從腦海中浮現出來，我小時候很喜歡玩手撥電話，看著它轉圈覺得好好玩，甚至試過亂撥電話呢，哈哈。走進去看到牆身畫了昔日的廣告招牌，色彩繽紛的，其中我最喜歡的地方就是有一個卡位，牆身畫了模仿「九龍皇帝」的手筆，卡位自成一角，私密度甚高。菜譜用了小學手冊作為封面，甚有心思。由門口的擺設，到餐廳內的牆身，到菜譜全都充滿懷舊的味道，被現代人遺忘昔日情懷都可以在這裡感受到。食物方面也帶有不少舊式的情懷。蝦多士就是其中一個懷舊菜色，蝦膠彈牙而且帶有蝦味，再配上蔥花芝麻，另外法包則鬆脆香口，雖然經煎過，但沒有油膩感，而且熱辣辣的。香煎紅酒牛俐 不算厚身的牛脷外層有點脆，內則軟腍，而且味道濃郁，吸收了紅酒的味道，甜甜的非常易入口。避風塘鮮魷薄薄的粉漿包著鮮魷，炸得香口，上面再鋪滿炸蒜頭，非常惹味。磚頭焗咖喱芝士蝦球飯磚頭焗飯賣相非常吸引，上面鋪上爽口的蝦，軟腍的薯仔，打開後發現，把中間的麵包挖空，大部分都是飯。不過飯的份量太多，而咖喱汁和蝦都偏少，比例不夠平均，而且飯是普通的白飯，如果炒過就更好。紅豆冰粒粒奶茶紅豆冰粒粒奶茶甚得我歡心，用紅豆製成冰粒，不會出現冰塊溶解時沖淡奶茶的味道。另外大顆的紅豆粒很甜，而且軟腍，再配上香滑的奶茶，兩者味道非常配合。懷舊香蕉船還記得小時候很喜歡的，經常吵嚷要媽媽點給我吃。朱古力、士多單梨、雲呢拿三球雪糕配上香蕉，是吃感覺多於味道的一道菜。食物質數雖然不是極好，但勝在價格便宜，而且環境充滿懷舊味道，可以感受到昔日被遺忘的情懷。雖然城市要進步，但舊日的事物也應該好好保留，畢竟是我們成長的一部份。打食評時想起了這首歌 - 每當變幻時「懷緬過去常陶醉　一半樂事　一半令人流淚夢如人生　快樂永記取　悲苦深刻藏骨髓」…查看更多

與幾個朋友老遠來到V City羅麥記飯聚，今日在屯門區沒看見有妖魔鬼怪出動，幾個朋友都比我早來到。停在羅麥記門口的招牌下，望着那些殘舊的電風扇、黑白手撥電話和懷舊洗面盆，雖然店方貼了「請勿觸摸」的牌子，但我像是着了魔似的，還是禁不住去摸，腦海浮現很小的時候因為不夠高，要踏在木櫈仔上打電話的情境。當時還在抱怨，為什麼打一通電話要那麼久，現在卻開始懷念那種撥號時獨有的「答答」聲。甫坐下，當我看見模仿康樂棋盤的墊檯紙，還有那本小學手冊造型的餐牌時，不禁會心微笑。棋盤的模樣跟當年一樣，但店方改動了內裡的文字，像第65格的「貪看轉環 忘記前進 停進兩次」，現在變成了「驅風炒飯 忘記前進 停進兩次」。看見餐牌皺皺的，以為是客人把它折磨成這個樣子，拿在手上看真一點，發覺那些紋路不是歷史的痕跡，而是印刷上去的效果，認真鬼馬。先點了一個羅記炒蛋，不過感覺有點怪怪的，因為明明是吃晚餐，這個炒蛋看來卻像早餐。炒蛋濕濕滑滑的，有陣陣牛油香。多士在相機食先過後，只餘一點溫熱，硬硬的，沒有很大特色。反而是店內的招牌飲品紅豆冰粒粒奶茶比較過癮，浮沉在奶茶之中大大塊的冰粒，其實是以紅豆製成，冰塊溶解時不會沖淡奶茶的味道。紅豆粒粒均很大顆，浸漬過糖水後顯得特別甜，而且意外跟奶茶很搭，不過小時候沒印象有遇到這麼一道飲品。近來在香港很多地方都留意到有蝦多士這個小吃，羅麥記的蝦多士用上像拳頭一樣大的法包，塗上蝦滑後丟入油鑊深炸，金黃香脆，非常誘人。其實這種廣東式的蝦多士，在百多年前已經有，而且還傳了去日本，長崎就有賣蝦多士，而且還是按廣東話發音叫「Hadoshi」，雖然形態跟我們有點不一樣，想想還是覺得很威水。朋友點了磚頭焗咖喱芝士蝦球飯，大半個生命麵包被挖空，內裡大半是飯，上面蓋了粒粒原隻蝦仁和黃咖喱汁，蝦仁雖然爽口但味道卻很淡，如果要把整個麵包和飯吃完其實真的是mission impossible，我比較希望它作為甜品，伴上蜜糖和雪糕之類。如果要伴飯，個人覺得炒飯會更香口。最後甜品來了個懷舊香蕉船，將香蕉擘開一半，中間加入朱古力、士多單梨、雲呢拿三球雪糕，然後在船頭和船尾加了兩大球cream，做法非常簡單。這個甜品充滿了回憶的味道，那是兒時的奢侈品，吃得到的次數真是寥寥無幾。望着牆上的人人搬屋、紅A牌標誌、英藉插畫師Edward Arthur Hacker創作出來的「垃圾蟲」和「人見人憎」那雙眼，還有另一面的舊式火柴盒牆，都輕易令一眾70後跌進回憶的漩渦，這種突然回到過去的感覺，有點甜、有點心痛，有點恐怖，心底充滿五味雜陳的滋味。…查看更多

趁著天朗氣清，又喺放假，最好節目都喺行吓山，接觸一吓大自然，因為家住美孚又近西鐵，所以，好多時行山都揀西鐵北行沿線。今次想輕鬆啲，就選咗麥理浩徑第10段，低難度，平路多，一大段喺沿引水道行，不過，就番交通、食晏，所以我哋先入到屯門，行過去麥理浩徑嘅終點，由尾倒轉行，兼且趁中段退路位出番掃管笏，再返屯門V City搵食，又方便搭番車返屋企。心水揀咗羅麥記，純因想帶表兒甥嚟了解吓啲「懷舊」嘢。因為今次行得真喺好迤，加上表兒甥算喺個花草專家，有研究吓香港原生植物，所以，遇有發現就邊介紹，文末再分享吓，故此，比預計嘅時行超咗成個鐘，但估唔到嚟到羅麥記已經喺挨近下午茶時段，都仲喺咁多人晌門口等位，幸而，人流快上快落，唔使等多久就有位。但晌等位期間，門口側旁嘅老爺黑白電視機、古董電話、收音機……等等，已夠回味！羅麥記嘅其中一個賣點，就喺玩懷舊，走到入店內，的確幾有懷舊趣味。由復古格仔地磚、懷舊商品海報、出名品牌標記、仿九龍皇帝墨寶……以至康樂旗枱墊、學生手冊菜牌，都喺70年代嘅集體回憶，老實講，小弟正正就喺70後，故然有更深體會，憶起更多成長往事。但喺，相差一代嘅表兒甥就話對依啲嘢印象比較模糊嘞。本粉藍色「手冊」既有校名，又有校徽，最抵死連啲摺紋都扮埋，唔好以為佢「摷」咗，摸摸個面其實幾平滑，做得認真維妙維肖，好抵死。打開裡面，當然唔會有家課紀錄，一頁又一頁嘅食物，除起首嘅十大必食之外，其他都分門別類，部份又有圖片參照，而菜式旁見到「兔仔印」表示店家認為嘅必食推介。除咗張康樂旗紙枱墊之外，點餐後，有張「顧客點菜」紙跟手，點咗乜一目了然，標埋單價及總數，最搞嘢用個超大個衣夾挾住，又喺一個有趣位！行完山，大家都超口渴，所以，第一時間都點嘢飲先，就連平時唔好飲嘢嘅老婆都整番杯雪糕紅豆冰添。飲品方面，有好幾款特飲，難得一場入到嚟，當然想飲得特別少少。紅豆冰粒粒奶茶 $38因為被列為店家嘅十大必食之一，吸引咗我去試，唔晒多講，顧名思義就知佢賣乜。奶茶紅豆冰依家晌美心都有得賣，而羅麥記依杯就昇華至加入以奶茶做嘅冰粒，令到個凍奶茶飲到尾都仲咁濃郁，而紅豆又煮得腍，味道清甜。由於我哋點咗一客粉麵，餐飲可以優惠價加配（熱飲+$8、凍飲+$10、特飲+$28），所以，實際杯粒粒奶茶只收我哋$28。雪糕紅豆冰 $38個雪糕紅豆冰就比較大路一啲，紅豆、奶水、雲呢拿雪糕球嘅組合，無咩驚喜，但記得細細過時去啲冰室飲依個喺件幾巴閉嘅事嚟。鳳梨粒粒冰 $38表兒甥見佢喺推介又想試試，佢話又幾過癮喎，因為部份啲粒冰喺菠蘿肉做，好似細細個讀小學時，晌小食部買嗰啲冰菠蘿，當然唔少得一般菠蘿肉啦，冰涼清爽，酸酸甜甜，入口為之精神一振。蝦多士 $58另一款十大必食之一，睇相就幾吸引喇！一客有5件，以法包加上蝦膠所做，蝦膠內仲刻意加入粒粒蔥花，睇落有少少油，但食落又唔喺好膩咋喎，入口夠晒熱辣，蝦膠又落得幾足秤，兼爽口彈牙，另外沾一點他他醬，更加提升一吓蝦鮮味。麥sir乳鴿仔 $52見好多枱都有點，之前睇過食評亦有唔少人讚，加上又喺十大必食之一，所以，不期然都想一試。乳鴿仔細細隻，但炸得金黃燙熱，外表富光澤，估唔到又真喺頗香脆；而鴿肉好鬆軟，亦挺嫩滑，可以講喺不負十大之名。避風塘雞翼 $58同樣有一客5件，雞翼之上鋪得滿滿嘅金蒜，一送上枱香氣四溢，睇見都咪話唔流口水。一咬落雞翼外層熱辣脆口，很濃蒜香，帶少少辣，雞肉多汁無話「乾爭爭」，非常惹味，真喺一啖冰，一啖雞翼，食得好爽！滑蛋牛肉煎脆米 $68點解個標題叫「百麥一疏」，咪就喺依個脆米囉！晌餐牌中「香港情懷」系列中，見依個脆米頗為特別，又有「兔仔印」，點知中伏咗。其實個賣相唔差，以米粉做成一件件三角形脆米，配以超滑嘅滑蛋牛肉，最可惜喺個脆米餅又乾又硬，好影響個口感，真喺百密一疏，要俾個「黑豬印」佢！美綠牛奶包 $35最後貪得意點多個美綠牛奶包，其實佢喺屬於多士類，咪以為甜品嚟，以奶醬多為本再糝上美綠，花生醬用上粗粒，睇就幾特別，食就唔會有咩驚喜，加上烘得唔夠時間，未夠脆底。除非你本人好鍾意食奶醬多，否則$35食一客奶醬多感覺有啲奢侈。小食類的確做得唔錯，有水準，只喺臨尾嘅脆米餅意外咁差，加上大部份菜式都唔平，故此，此行覺得俾住個OK先。飽餐一頓，力氣都返晒嚟，題外話，順便都分享少少行山相片，部份都幾有趣，小弟從表兒甥身上都學咗唔少香港原生植物。麥理浩徑及屯門徑交叉位山菅蘭，咪睇佢紫得咁靚，有毒架！葫蘆茶，留心啲就知點解叫「葫蘆」，雖然得塊葉，其實喺會開花！貓尾草，未開花前毛茸茸好似貓尾咁，有長有短，好得意！簕欓花椒，真喺可用作香料，搣少少落嚟捽吓佢，確有辣椒香味，點解影低佢，因為見到有隻不速之客囉！以下喺唔使行使成條麥理浩徑第10段嘅兩個退出位，都喺去返掃管笏！已經跟表兒甥講好，下次跟佢再行過，至多又喺由我請食晏！…查看更多

由於相約了朋友到屯門v city聚餐，所以放工後匆匆忙忙地收拾好東西就趕到地鐵站，由中環到屯門路程還真遠呢. . .由中環站走到香港站乘地鐵，到達南昌後又要轉乘西鐵到屯門，最怕的就是需要轉車. . .左轉轉右轉轉，放工時間車廂內又十分擠湧，足足需要一小時多才到達...記得V City開業不久後，不斷有雜誌爭相介紹「羅麥記」，當然那時我也有湊個熱鬧，立即去試試～所以其實這次已是第3次光顧了～但因為有朋友還沒試過，又跟我一樣喜歡特色餐廳，所以就選了這裡～這陣子好像跟懷舊餐廳蠻有緣份呢～！終於趕到了，懷舊仍然，還未踏進店內，已有回到過去的感覺，四四方方的大電視、撥輪電話、舊式收音機、流星機、電風扇、佈滿灰塵的行李喼⋯不知是仿製還是古董呢～部分物品我還沒有見過實物呢～當時大約7點左右，人流不算太多，可能是閒日吧～環境不會太嘈吵，正適合與朋友慢慢詳談～店內有如一般懷舊小店一樣，以綠色為主調，地面以綠色白色格子磚塊砌成，正中位置擺放著一張張大圓桌及藍白色的木椅子，而牆邊則是一排排卡座，而天花則掛著一把把吊扇及射燈，增加懷舊感，還發現柱身也掛著一個舊式掛鐘～而牆身的裝飾更是焦點所在，您可以從各張海報/掛畫上，看到惜日的地標、玩具、商店及品牌廣告。當中還有一幅寫滿大字的牆壁，似是模仿「九龍皇帝」的手筆，而旁邊的水吧位置，也設計成大排檔的樣子，前方位置更堆砌著一座黑白淡奶山～數量驚人～餐牌也設計得相當獨特～手冊以淡淡的藍色作底色，再以黑字印上了「羅麥記」的校徽和校名，手冊的首頁，簡單介紹了校名的由來，原來兩位校長一位姓「羅」、一位姓「麥」均是出生於70年代，所以藉此餐廳回味昔日點滴～不知是巧合還是甚麼，以這兩個姓氏命名為「羅麥記」正好有著舊式餐廳的感覺，要是換成「陳李記」、「張黃記」感覺就有點怪怪的了～另外，餐紙是以康樂旗盤的模樣印成，還有那隻大大的衣夾，將舊物加入了一點玩味，別具風格呢～餐牌的第2頁開始，先是介紹「羅麥記」的十大必食！分別有磚頭焗豬扒包、麥sir乳鴿仔、紅豆冰粒粒奶茶、羅麥汁牛河、 蝦多士、豬羅包、炒蛋、茄牛公仔麵、羅麥雞翼及芝士撈麵～好像只有豬羅包還沒有試過，其他也試過了～餐牌上食品款式眾多，大至分為7大類：特色土炮小食（有炒蛋、雞翼及炸鮮魷等）、三文治.多士（分為咸甜兩款，咸的有公司治；甜的是在多士上加上雪糕或朱古力醬等甜食）、公仔麵.撈麵.通粉（主要以芝士汁或瑞士雞翼汁撈麵食）、焗住食（很喜歡這個名字XD，有數款磚頭飯及焗飯麵等）、香港情懷（類似中式炒粉麵）、飲品 (必試粒粒紅豆冰及菠蘿冰)及甜品(當中香蕉船及雪糕多士比較特別)～蝦多士 ($58/5件)一客5件炸得金黃飽滿的蝦多士，以花的姿態擺放左方碟上，旁邊附上一碟沙津醬。其實在數月前已吃過一次，但當時覺得只是一般，油份甚高，事隔多月，一於再試試吧！厚厚的法包面上釀上了一層蝦膠，份量不算太多，蝦膠加入了些少蔥花，為粉嫩的蝦肉色加了幾分色彩，蝦多士入口鬆軟，蝦膠不算彈牙，但帶有蝦味，經煎過後，十分香口，熱辣辣的，相信是即叫即製，至於最令我膽心的油份問題，出奇地比上次好多了，法包外脆內軟，不知是不是轉了製作方法，以烘烤取代了油炸，再配上微酸的沙律醬，味道一流～！羅麥雞翼 ($53/5隻)一隻隻肥大的雞中翼，醃至表面呈深啡色並帶光澤，而且胖得不能平放在長方形器皿上，羅麥雞翼的味道跟瑞士雞翼相似，也是甜甜的，以甜鼓油醃成，雞翼肉質嫩滑，而且醃得相當入味，瑞士汁不只留在皮層表面，還滲透到雞肉內，令雞肉也充滿著瑞士汁味，加上瑞士汁味道咸甜適中，想濃味一點的還可邊吃邊沾瑞士汁，令味道更為豐富～怪不得餐牌上還有雞翼撈丁，相信這個醬汁不論配上撈麵或飯類，也是一流的！炸魷魚圈 ($45)再來一點炸物～一個個像乎拉圈的魷魚圈沾上脆漿後，炸到金黃，顏色生非常吸引，炸物的香氣永遠是最吸引的～一個個魷魚圈疊得滿滿的，份量蠻多～咬下去時口感鬆軟，魷魚輕易就能折斷，曾經吃過一些咬不開的魷魚圈，一拉一扯，令魷魚圈與脆漿骨肉分離，大煞風景。而羅麥記的魷魚圈，脆漿的比例相當適中，咬開後能清楚看到薄薄的脆漿包裹著一個魷魚圈，比例適中，而味道方面，魷魚質感爽彈，吃落香口，加上沒有放太多的鹽巴，能吃得到真正的魷魚香～香煎紅酒牛脷 ($45)這道「香煎紅酒牛脷」算是當晚令我最驚喜的小食，由於上兩回沒有吃過，這次還是首嚐，賣相不太突出，一片片紅酒色的薄切牛脷埋放在碟中，形成一個小山谷。入口甜甜的，薄薄的一片竟然還能做出外脆內軟的感覺，而且相當入味，經煎過的表面，尤其是邊位部分，帶點微脆，再咬下去時，是軟棉棉的質感，繼而散發出牛脷的獨有香味，由於紅酒汁比較濃稠，令每片牛脷也能均勻地沾上醬汁，下次必定再叫！芝士炸雲吞 ($45/4隻)炸雲呑相信大家必定有吃過，但「芝士炸雲吞」你又試過未呢～？當然我也是被芝士2字所吸引～油炸、加上芝士，充滿罪惡感吧！但還是抵擋不了芝士的魔力，4隻金黃脆皮的芝士雲吞外貌跟一般的炸雲吞相若，然而餡料較多，中間位置塞得漲漲的，有點像沙律明蝦角～咬開脆卜卜的雲呑皮，内裏包裹著原隻鮮蝦，鮮蝦質感彈牙，還有一顆炸得半溶的芝士粒，芝味香濃，入口軟滑，芝士味與鮮蝦亦相當配合，若果再加多點芝士，做到醬爆效果，相信吸引力會大增呢～～麥sir乳鴿仔 ($52)多數只會在中式菜館或燒味店才會發現乳鴿，想不到這裡也有呢～～一於試試其分別～！乳鴿仔體積𣎴大，分成4件，經鹵水汁醃過後再以油炸～上枱時已聞到陣陣乳鴿香～外皮炸得又脆又薄，熱辣辣，有點燙手～先搣隻脾仔試試～有少量肉汁流出～肉質香嫩帶乳鴿香～而且鹵水汁咸度亦控制得相當得宜，帶點鹵水的咸香味，少少的一件份量剛剛好～不會太膩～磚頭焗豬扒飯 ($82)於招牌菜式中据高榜首的磚頭焗豬扒飯，最適合一大班人每人分著吃～來到時不禁發出「哇～哇～」的聲音～將一個四四方方的磚頭大麵包（應該有一磅的份量吧）先掏空，再放入加了蛋碎炒香的炒蛋飯，然後再舖上滿滿的豬扒，最後加上茄汁、洋蔥及芝士等材料一同焗製，真是色香味俱全由於材料放得滿滿的，真的不知道從何入手，就將它1分為2切開吧！賣相切得不是太好，但清楚看到包内的炒蛋飯份量超多，內裏擠迫非常。而豬扒已預先切成小塊，大約有6-7塊。先試一口豬扒，肉質入口嫩滑，醃得十分入味，輕易就能咬開，並帶有口感，不似一般被鬆肉粉醃得完全沒有口感，配上酸酸甜甜的醬汁，非常開胃。至於炒飯方面，飯粒粒粒分明並帶點蛋碎，但將炒飯與茄汁拌勻後，飯粒感覺有點濕淋，缺少了口感，但帶微酸的炒飯，確實令人忍不住多吃兩口。把內裏的豬扒飯吃完後，最後還有作為盛載工具的麵包，店方在枱上亦寫有溫馨提示，可額外索取蕃茄汁，可將麵包沾上醬汁同吃，不會做成浪費，但可能已經擺放耐了，所以麵包已沒有剛烘好時脆身的質感蕃茄湯底牛肉麵 ($51)另一款較為飽肚的食物就是蕃茄湯底牛肉麵，離遠已傳來一陣陣酸酸的蕃茄味，湯底紅紅的，相信用料非常豐富，上面還舖滿了大量蕃茄肉，色彩繽紛。而牛肉份量也不少呢，吸收了蕃茄湯的鮮味，令牛肉香更為突出，而且肉質非常軟滑，非常不錯。公仔麵用了出前一丁，無需加錢，麵質當然有保證～另外，還附上了一包調味粉，不過由於蕃茄湯底已經非常濃郁，再加入調味粉恐怕咸度會超標，所以就沒有加入～不過蕃茄湯底酸度略高，怕酸的朋友就要注意一下了～美綠牛奶包 ($35)飽吃一頓後是時候來點甜品了～也是最令我開心的環節～美綠牛奶包～在餐牌上知到賣相非常吸引，加上美綠跟巧克力味道有點相近，所以更得我歡心。4件正方形方塊整齊地擺放著，上面淋上了大量牛奶及美綠粉。取起一件後發覺，原來包與包之間還夾著一層花生醬。其實感覺有點像奶醬多，但牛奶比較稀釋，變得有點像忌廉，不過包面由於被牛奶浸耐了，所以變得比較淋身，而且大量的牛奶及花生醬遮蓋了美綠味，有點遜色，所以驚喜不大磚頭多士果籃雪糕（$70）對比起美綠牛奶包，磚頭多士果籃雪糕明顯在賣相上略勝一籌，3塊厚厚的多士上加上了一球雲尼拿雪糕，旁邊伴著忌廉，然後唧上朱古力及士多啤梨漿，再灑上七彩的糖粒，七彩繽紛，令人垂涎欲滴。不過切開時有點困難呢，要一塊塊分開再切開，建議可模仿其他地方先把多士切成一粒粒，令食客易於進食。略嫌多士烘得不夠鬆脆，第一層的多士吸收了大量雪糕及醬料，甜甜的雪糕，暖暖的多士，冷暖交集，非常好吃， 但由於雪糕的份量不足以把第2及3片多士沾滿，所以味道較淡，不過對我來說甜品的賣相確實比味道重要，所以下次還是會再點呢～紅豆冰粒粒奶茶（$38）至於飲品方面，每次也必點紅豆冰粒粒奶茶，紅豆配奶茶於坊間也甚少見到，最特別之處是冰粒方面，除了有小小的碎冰外，還有2至3粒以紅豆制成的冰粒，令冰塊溶化時也不會被水份稀釋了。奶茶入口香滑，紅豆經糖水煮過後甜甜的，帶紅豆香及口感，為怕甜度過高，所以要了少甜，喝下去時甜甜的紅豆，配上香滑的奶茶，甜度適中，味道一流菠蘿粒粒冰 （$38）感覺沒有前者的特別，但一看之下，發現冰粒原來也是用了菠蘿肉製成，作用與前都一樣～而菠蘿冰底下有大量新鮮菠羅粒，大大粒切成四方形，口感極佳～加上味道酸酸甜甜，甜度適中，入口透心涼，作為飯後飲料更能消消剛才的油膩感呢～後記：食品質素感覺較之前改善也不少～最明顯的是蝦多士～今次再次一試後，確實對羅麥記另眼相看～但甜食的包類方面，仍有改善空間～希望羅麥記會繼續進步，能做出更多好吃的懷舊特色小吃～…查看更多

還記得這是小弟第一次來到這個位於屯門的新商場。因為那天是假日的關係，商場從下午開場已是人山人海。走下走下走到了商場的食肆集中地一樓, 更加係水洩不通，而且食肆的選擇更是繁多。正當我煩惱著當晚想吃什麼之際，我突然看到一間門面甚為有趣的港式茶餐廳。門口陳列著六，七十年代的懷舊電視機，收音機，並且掛著一塊很懷舊的霓虹燈招牌, 上面寫著"羅麥記"。還好,我們兩人等了約15分鐘已有位了。走進店舖內，由店內裝修，餐牌到墊枱紙，都不禁令我想起自己愉快的童年時光，當中更發現有小學手冊樣既餐牌，印有康樂棋的墊枱紙等，真係別有一番風味! 可以說, 就算進來只是坐坐而不吃東西，也非常過癮!我們點了餐廳的招牌食品磚頭白汁海鮮飯，避風塘炒麵和紅豆冰粒粒奶茶。紅豆冰粒粒奶茶是不俗的，茶味很香濃，奶亦很滑，而且奶和茶亦不會搶去大家的味道和感覺，真的不錯。至於紅豆，也很好好，口感適中，不硬不軟，但可惜有少少蓋過了奶茶的味道。至於避風塘炒麵，不算太辣，也不油膩，麵的軟硬也適中。雖然鑊氣方面不算很夠，但整體來說都是可以一試的。最後那個磚頭白汁海鮮飯，賣相很特別，一個挖空了的麵包當中放進白汁海鮮飯。但麵包很乾，當中的海鮮飯亦不算好吃，而且麵包和飯都不夠熱，兩者的味道也不是十分夾。用來拍照是不錯，但味道就真的很一般。…查看更多

好耐冇去屯門，知道新開左V City就去行。見到羅麥記門面裝修蠻特別就決定試試。等左陣就有位了，服務員態度也很好。入去後更加覺得店舖周圍都充斥著懷舊既感覺，特色牆紙、康樂棋紙墊同一本好似學生手冊既MENU~ I LIKE IT~決定叫焗豬扒飯、海鮮焗飯、羅麥雞翼及兩杯紅豆冰粒粒奶茶。值得一讚既係紅豆冰粒粒奶茶中的冰粒真係用紅豆及冰混合成，十分有創意，口感唔錯。可惜奶茶甜左DD，因為我平日叫野飲都會叫少甜, 不過今次唔記得左~下次如果再飲要叫少甜~之後就是羅麥雞翼，其實就係瑞士汁雞翼上放辣椒。雞肉好滑好好食!夠辣~正!^^呢個磚頭焗豬扒飯估唔到咁大，而且挖空厚多士放豬扒飯好有創意。(我見識少, 第一次食)蕃茄汁份量好入味好好吃，不過外面既多士皮雖然同飯一齊食都不錯，但實在太多，最後食唔曬 @@食完磚頭焗豬扒飯已經半飽，再吃芝士海鮮焗飯。好香芝士味!!!整體都幾好味, 如果有機會再入屯門, 都可以再食~!…查看更多

羅麥記係近日我同幾個住屯門的朋友嘅話題之一，佢位於該區最新的大型購物商場V City，個商場又大又靚。行完shopping 完梗係要醫肚啦！個商場好旺呀。羅麥記都勁多人。所以要去食好野就要耐心等一下。照片-11點解係話題? 因為我一直以為佢係賣雲吞面 ,HAHA~係咁比朋友們笑, 去到先被羅麥記的裝潢吸引，很地道香港feel 呀！餐檯紙係從前玩嘅康樂跳棋！餐牌係意想不到的學生手冊！勁好感覺！餐牌上有羅麥記十大必吃。咪講咁多！即刻try try 佢！我地先點了十大之一，紅豆冰粒粒奶茶不得了的美味，先講入面的磚頭紅豆冰，紅豆棉棉，又香又甜，配香滑的奶茶後感覺出奇的配啊! 絕對係必點飲品！接住試上了十大的羅麥雞翼(辣)!店長推介，不得不試。辣味很搶，配飯真係一流，汁香雞翼嫩滑。好味！佢絕對係我推介的羅麥記菜色之一。食到辣記得點辣！有驚喜咖！之後就係我覺得好出色嘅 羅麥記炒蛋！首先，我無論係咩時間都喜歡食炒蛋西多士，對炒蛋的要求很高，要炒得香，嫩，滑，仲要有蛋汁，絕不容易，最重要係大份咪縮水。當然要配合微燶的牛油香多士。這個羅麥記炒蛋完全達到我對炒蛋的要求。連一個晚市炒蛋都可以炒得咁仔細。抵佢咁多人排！之後就介紹傳説中的磚頭咖哩海鮮飯磚頭飯基乎係每張枱都必點的菜式，磚頭其實係厚多士的外殻，挖空了後釀入焗飯，我選了磚頭咖哩海鮮飯 ，汁多料足，適合一大班人share 的美食。因為一兩個人係無咩理由食得曬咁大個飯連包！第二度真係未見過。我諗係羅麥記先有咖喇!仲有美味乳鴿。唔知點解個人好喜歡吃乳鴿, 見到有得食就一定會叫~羅麥記美味乳鴿多汁外皮又脆, 上碟時熱辣辣, 見到都流口水!!最後一個係芝士撈面配豬頸肉~ 豬頸肉勁 JUICY~ 好香! 只係略嫌芝士汁有點不足~ 灰了! 最我我就用上了羅麥雞翼的辣汁! 都好正! 整體環境一流(感覺很本地懷舊感, 第二度真係搵唔到) ~ 味道也很好! 服務員都很有禮, 還會主動推薦羅麥記美食, 必吃 羅麥記炒蛋, 同雞翼! 同一定要飲紅豆冰粒粒奶茶, 攪到我返到屋企都想叫媽媽下次煲紅豆沙整紅豆冰粒比我食TIM~…查看更多

餐廳位於屯門新建的大型購物商場V City，商場連接屯門西鐵站非常方便。我也不是第一次到來V City搵食了，每一晚都擠滿人群在不同的餐廳前等待，實在誇張。我們被安排在圓桌，店員表示當晚繁忙時間可能有需要安排搭檯。但其實桌面空間尚算多，即使搭檯也不會太擠迫。一開始吸引眼球的，應該都會是桌上的康樂棋紙墊以及像學生手冊般的餐牌。除了主食的飯麵之外，這３道是我們最想試食的餐點，反正二人都飢腸漉漉，多多都吃得下。有食客指上菜速度很慢，以我所見連其他食客的餐點都沒有等很久，甚至可以說相當快，而且食物上桌時熱氣騰騰，不錯。這杯紅豆冰粒粒奶茶賣相和idea 都很特別，杯內還有數小磚用紅豆冷藏的砂冰粒，吃下去即溶在口，口感特別。不過奶茶奶味被甜味蓋過，因混合紅豆的甜味結果變得過甜，不夠解渴，如能改善過甜問題，這會成為很受歡迎的餐飲！這道牛河本身也是我心水餐點，因為我一向「不肥不吃」，愛吃炸物肥膩食物....牛肉嫩口不韌而且有肉味，難得的是伴菜的四季豆都很入味，跟一般干粉牛河稍稍不同的是它比較濕口，肥膩感比較低，而且河粉彈牙沒有炒得過淋，我和男友都很喜歡。這道羅麥雞翼是店家額外讓我點的菜式，賣相討好價錢亦公道。我倆都很喜歡吃雞翼而且男友更自稱是雞翼評審專員，可惜這碟雞翼不能成為我們喜歡的餐點之一，原因是不夠入味而且醬汁偏淡，難以滿足味蕾。這個磚頭焗豬扒飯似乎是每桌必點菜式，店員都不知棒了多少個出來了。所謂磚頭其實是極厚多士一大個，挖空了裡面的麵包，然後把焗豬扒飯放進去。原本以為份量會偏少但發現一直吃也未見底！豬扒一塊切開約有5-6件，茄汁份量夠，可以一直撈飯吃到尾，豬扒味道亦不錯。嘗試撕一些麵包和著吃，雖然跟焗飯味道不太夾，但不失為一個特別的口感，創意滿分。男友對這菜式沒什麼意見，我就覺得頗不錯。來羅麥記吃環境滿分，食物不過不失，陪上一輩的家人來吃的話，大家一起細味兒時回憶應該會很溫馨吧！若店家可以更珍惜食客意見改善服務和食肆整體待客態度應該會更好。 …查看更多

屯門最近有好多新開既商場，好似我今次介紹既餐廳就喺新開既Ｖ　CITY地下。有晚同朋友就約左喺果度食晚飯，非常多人，不過等左３個字都入到去喇。餐廳既食物亦都好有六七十年化既冰室風味，以懷舊做招徠，六七十年代的日常用品全部搬到香港，就連廣告牌都唔放過，走進去，見到有穿著校服既侍應招呼我地，餐牌係學生手冊咁樣，枱櫈 都係六七十年代既樣（我估啦XD），之後就連食物都好舊時既感覺，除了磚頭飯或者紅豆冰奶茶之外，其餘例如撈麫、公仔麫果Ｄ，都係以方便快捷為首，食物好快上到枱（即使佢地寫明時間幾耐，盡會係快過呢個時間完成），呢樣野體現了舊時香港人講求效率既精神。…查看更多