更多
2014-01-03
2306 瀏覽
數月前曾同幾位食友嚟曼谷泰菜試食，深覺水準不俗，傳統泰菜做得有板有眼，新創菜式亦有驚喜，難得泰藉廚師功夫紮實，但又唔守舊。之後，有朋友問過食泰菜有無好介紹，當然入九龍城有大把選擇，不過老友想港島區，又想就腳，就再次想起曼谷泰菜。今次人少少，就無謂坐房咁大陣象嘞，雖然晌外面大廳，但一樣坐得舒服，摩登嘅裝修，以少少泰式擺設作為點綴，感覺唔會太滿天神佛，又不失點點泰式風情！侍應有泰藉，亦有本地人，所以唔怕落單溝通有困難！香茅薑蜜（凍或熱） $38先嚟一杯熱香茅薑蜜，喺店方嘅自家製作，亮點喺天然掛帥，少甜而帶有香茅清香，薑味添加出丁點辛辣，應該喺驅風「良葯」，哈哈！泰式蝦片 $15蝦片新鮮即炸，上次嚟食時人多真喺一籃唔夠喉，不過，今次人少啲一籃已可止止牙痕，跟上次一樣香脆可口帶點鹹蝦味。依家仲有埋外賣裝，真喺合晒心意呀！冬蔭公湯 $88（2位用）$168（4位用）$218（6-8位用)雖然湯類有成6款，如酸辣椰汁雞湯、泰式魚肚羹都幾有特色，不過友人鍾情於冬蔭公，上次試過都知有水準，所以我又唔介紹飲多次喎。紅紅嘅冬蔭公湯，入口絕對酸香醒胃，重重嘅泰式香料，香茅、南薑、檸檬葉……等等，令味道複雜有
今次人少少，就無謂坐房咁大陣象嘞，雖然晌外面大廳，但一樣坐得舒服，摩登嘅裝修，以少少泰式擺設作為點綴，感覺唔會太滿天神佛，又不失點點泰式風情！侍應有泰藉，亦有本地人，所以唔怕落單溝通有困難！
香茅薑蜜（凍或熱） $38先嚟一杯熱香茅薑蜜，喺店方嘅自家製作，亮點喺天然掛帥，少甜而帶有香茅清香，薑味添加出丁點辛辣，應該喺驅風「良葯」，哈哈！
泰式蝦片 $15蝦片新鮮即炸，上次嚟食時人多真喺一籃唔夠喉，不過，今次人少啲一籃已可止止牙痕，跟上次一樣香脆可口帶點鹹蝦味。依家仲有埋外賣裝，真喺合晒心意呀！
冬蔭公湯 $88（2位用）$168（4位用）$218（6-8位用)雖然湯類有成6款，如酸辣椰汁雞湯、泰式魚肚羹都幾有特色，不過友人鍾情於冬蔭公，上次試過都知有水準，所以我又唔介紹飲多次喎。紅紅嘅冬蔭公湯，入口絕對酸香醒胃，重重嘅泰式香料，香茅、南薑、檸檬葉……等等，令味道複雜有層次，大頭蝦啖啖肉，鮮香好食。友人果真好鍾意冬蔭公湯，連添幾碗，相信佢都飲得好滿足。
泰式生蝦刺身 $98一客8隻生蝦賣$98，其實都幾抵食，泰式生蝦最好趁凍食，攤暖咗就口感會差咗截。生蝦夾埋塊蒜片，沾點特製辣汁，食落蝦肉鮮甜爽口，如怕辣嘅加埋塊薄荷葉一齊食，可緩和一下辣度。
荔枝蝦球 $88專燈推介俾友人，真喺值得一試再試嘅菜式，上次嚟喺新出菜式，純為試菜，所以價錢待定，依家知道定價$88，唔貴喎。原粒荔枝包住去殼鮮蝦酥炸，外層酥脆甘香，荔枝清甜多汁，蝦肉彈牙鮮甜，配搭合宜，依然值得推介！
甜酸豬軟骨 $92雖然似乎比較大路嘅小菜，但豬軟骨肉質鬆化，軟骨位有咬口，甜酸醬都做得甜酸有緻，但唔算好特別嘅菜式，所以唔需要刻意去試，除非你本人好喜歡食豬軟骨。
黃咖喱牛腩煲 $98食泰菜總鍾意點個咖喱，再加啲蒜蓉包一齊食。黃咖喱牛腩煲，牛腩大大舊認真貨真價實，兼且軟腍鬆化，而黃咖喱入口辣味溫和，帶濃濃椰香，實屬不俗。沾滿咖喱汁嘅蒜蓉包，有咖喱香，又有蒜蓉香，個法包又烘得脆，有啲百吃不厭嘅感覺呀。順帶一提，焗蒜蓉包另計，$33 / 5件。
泰式海南雞 $138（半隻）$238（全隻）新加坡嘅海南雞食過好幾次，但泰式嘅就少接觸，個人覺得最明顯分別喺新加坡嘅就伴黑豉油、辣椒醬及薑蓉，而泰式嘅就簡單一啲只有一款泰式醬汁，鹹鹹酸酸。雞隻望落皮光肉滑，望真啲皮薄肉厚，但柔軟嫩滑，而且去咗骨，方便食用，仲有入口帶點點香茅及薑味，相信喺跟新加坡海南雞嘅另一個分別。
泰式鹹肉椰菜苗 $78泰式鹹肉有啲似我哋廣東人食嘅燒肉，試過又唔會覺得好有特色咁，但鹹香惹味，而椰菜苗炒得非常爽脆，配搭埋啲鹹肉，喜歡重口味嘅人會幾鍾意。
香芒椰汁糯米飯 $52．椰汁木薯 $48個香芒椰汁糯米飯跟上次嘅造型唔一樣，睇埋其他食家嘅食評，真喺次次新款，不過，都離不開芒果、椰汁同糯米飯。糯米飯用上紫糯米溝白糯米，前者煙韌，後者軟糯，淋上濃濃椰漿，實在好味，而芒果砌出玫瑰花形，賞心悅目，再者呂宋芒確實蜜香清甜，令極個甜品更得我心。至於椰汁木薯，口感粉粉，同樣沾滿椰漿，椰香在口腔內游轉。兩款美味甜品下肚，亦為今餐有個美滿完結。
九龍城確實有好多高質泰菜館，但對某啲人嚟講，尤其港島人，交通上始終唔多方便。前後兩次嚐過「曼谷泰菜」嘅手勢，覺得水準保持到，加上價格合理，招呼服務都稱心，依啲可能就喺佢嘅吸引力吧！
張貼
