傳聞係間幾好既小炒廣東菜，朋友仔想試而且我又好奇地想一探究竟。舖面較細，有三張二人方枱、一張四人長枱同一張六人圓枱，不過門外可以視乎情況開兩張圓枱。飯店位置都幾遠，係翠怡花園最遠最角既地方，估唔到要行到盡頭。侍應妹妹服務算殷勤，可能太忙所以要耐心等候一下。蜆勁村個名都幾得意，英文真係 Shell Power。初聽到既時候都會以為係沙田顯徑村，哈哈﹗唔知個名點黎架呢？莫非見到對面 Shell 油站？見 menu 上面既字眼、描述、宣傳都十分前衛，非一般飯店死板味道，反而覺得更地道更親民。睇睇個價錢都幾高下，而且估唔到有 Holgarrden 同 1664 啤酒提供。專登約埋朋友仔黎試菜，先試海鮮，下之再黎試魚試肉啦。繁忙時間限時 90 分鐘架乍，而且仲寫明唔比加單添，唔夠飽想加餸都唔得？跟侍應妹妹確認後，原來其實食客係可以加單既。客家鮮魚湯，我阿娘都係客家人，但我從來未飲過呢。勁多蔥花，蔥花湯？湯裡面除左蔥花外就只有少量豆腐。來一碗試試，強烈胡椒粉味行頭，魚味排第二，不鮮不甜，而且散化著少少腥味，尚可接受，幸好蔥味微弱。普通一個滾湯，完全唔見有魚肉，魚骨沉晒底，飲湯時要小心點。招積椒鹽蝦大辣，招積？唔係掛。蝦仔都有兩吋長，雖然依家都可以原隻食唔洗剝殼，但再炸脆一點、再炸得透徹一點，會更香口、更鬆化。鮮蝦味不錯，但整體味道平平，連椒鹽味都食唔到。而且豆瓣醬太多喇，食到成口都係辣椒皮，一路食要一路吐，好唔方便，而且非常之多油囉。用上麻麻地現成罐頭蒜蓉，味道非常濁又半點都不香，蒜蓉都係新鮮手切最好味。咸味多過辣，免免強強。蒜香鮮油粉絲蒸扇貝？鮮油粉絲？賣一隻蝕一隻？那麼叫兩隻一人一隻啦。唔係好熱乍喎，點解暖暖地既？成隻啪入口先。粉絲凍既？咁搞笑，係凍唔係室溫。嘩！但粒扇貝超熱呀！險些淥到嘴仔都起水泡，玩凍火咩 ﹗不過堅好味，雪白扇貝肉軟棉可口而裡面勁彈牙，味道夾著鮮味、蒜蓉、豉油，食得過﹗招牌爸爸黃蟶子，去埋殼啖啖肉。係就係無沙，而且超級全熟，但又乾又鞋又靭又無味呢﹗出水已過火，再炒多兩野，鮮味肉汁完全流失，任何貝類都變乾屍啦﹗而且跟椒鹽蝦一樣，瓣醬太多，食到成口都係辣椒皮，一路食一路吐，仲非常非常之多油添﹗份量超級多，係就係抵食，不過質數唔合格。食左多三舊已想放棄，但又唔想浪費。招牌薑蔥炒蟹，雖然無咩驚喜，勝在夠穩陣，新鮮度同味道都合格，感覺上似薑蔥焗蟹多過炒囉，鑊氣不足。蟹膏甘香無比，蟹肉鮮甜勁彈，泛著誘人薑蔥味道，隱約散發出微微酒香。招牌爸爸炒蜆大辣，見唔多夠飽就叫多個送啦﹗失望啊，辣度只係免強達微辣，係咪無落到大辣呀？跟蟶子同一情況，出水過火變得又靭又無味。當然要原隻落鑊生炒先可以保存肉汁同鮮味啦﹗豆瓣醬太多，搞到滿口油，再加濁味蒜蓉，浪費晒靚海鮮喇。總結，招牌爸爸炒蜆大辣、招牌爸爸黃蟶子及招積椒鹽蝦大辣，基本上係同一味道，麻麻地。客家鮮魚湯，清清地。招牌薑蔥炒蟹，穩陣之選，必食蒜香鮮油粉絲蒸扇貝。味道係屋企口味，撲素平實，一試無妨。…查看更多
