圓方云云咁多間日本菜中，個人覺得依間店確實性價比高，而且環境同服務都唔錯，值得一試。今次食lunch set，價錢合理而且質素比想像中好！定食包括沙津、前菜、漬物、味增湯同甜品（紅豆餡麻糬），相當抵食。銀鱈魚西京燒定食($165)銀鱈魚燒得恰好，唔會韌，依然保持滑嫩口感。西京燒即以西京味噌醃漬銀鱈魚再燒，但放心唔會過份濃味。另外飯好大碗呢！以女仔食量可能會食唔曬。天丼定食($145)令我十分有驚喜嘅天丼！首先天婦羅粉平均，唔會食到成口粉，但最想讚係用料！天婦羅蝦，真係好食到嘩出聲，蝦味可以用「濃郁」形容！並唔係好似一般冰鮮蝦無蝦味之餘口感似食軟糖，而係有好香好濃嘅蝦味，微彈牙再帶少少粉，淨食隻蝦都已經值回票價。另外天婦羅松茸菇都十分出色，完全令我留下深刻印象。醬汁可以根據自己喜好再加，個人覺得加少少已經好足夠，畢竟醬汁帶咸味，太多會影響天婦羅同食材味道。當要用差唔多價錢食一個過江龍天丼嘅情況下，無諗過以依個價錢食到一個高質素嘅天丼「定食」。希望佢地可以維持到食材水準，下次光顧時又有新嘅驚喜！…查看更多
