滋味館

認識「滋味館」源於食友嘅一篇食評，幫襯「滋味館」源於大家嘅一份支持。跟幾位晌飲飲食食上志趣相投嘅朋友，周圍覓覓食食，確喺一件幾開心嘅事，這夜走到嚟土瓜灣嘅滋味館，細嚐越南菜，閒聊話家常。滋味，唔單止因為枱上嘅食物，更因認識到依班知情識趣嘅朋友，令每餐飯局都喺一次歡聚 :) 。走進滋味館，一室亮白，裝修摩登，配以深啡色皮椅，簡約而整潔。而餐廳後方，可架起屏風，變相成為一個半開放式小廂房，減少其他食客嘅騷擾。青綠色嘅主餐牌，令人望落寧捨醒神，最特別喺打開第一版，就有幾款越菜常用嘅香料介紹，如檸檬葉、香花菜、亞參子……等等，圖文並茂，就算唔熟悉，當有個認知都好。再翻一翻餐牌，雖然小小店子，食物款式多得不容小覷，有沙律、越式米紙卷、串燒 / 炭燒類、精美小食、濱海類 / 生菜包、廚師特別介紹、檬粉類、湯粉類、精美小菜、炒飯類、炒粉類、煲仔菜、湯類，唔使數都可以肯定過百款 。部份菜式有圖有相，多個參考。當然，甚識計數嘅香港人，最喜歡點套餐，所以，尊貴一人套餐及滋味二人晚餐都應運而生，故此，一個人嚟又得，兩個人嚟都得，甚至乎幾個人嚟又可將啲套餐互相組合。最有趣喺仲有個「越之素食」小餐牌，投身咗「綠色星期一」嘅朋友，嚟到都唔怕無嘢唔啱食啦 ！盛夏外間非常炎熱，雖然涼著冷氣，點都唔及整多杯凍飲涼入心，餐牌內除有多款越式特飲，仲有港式飲品及啤酒。但店員推介，啱啱椰青新鮮返貨，唔喺日日都有，保證清甜。 新鮮椰青 $28 :) :) :) 不愧為飛機新鮮貨，入口清甜自然，冰涼透心，有種潤喉嘅感覺；而果肉都唔應該錯過，肉厚雪白，軟腍香甜，只賣$28，相當抵飲 :) 。 墨魚青木瓜沙律 $78 :) :) 賣相清新怡人，泰國青木瓜切得絲絲幼細，爽脆多汁，再伴以甘筍絲、白蘿蔔絲，自行添加隨沙律附上嘅青檸辣汁，多少隨意，令個沙律酸爽中帶點辛辣嘅刺激；而墨魚肉切條鎅花，食落柔軟而爽口，有份鮮味嘅感覺 。 帶子米紙卷 $50 :) :) :) 原為一客4件，但店主好人為我哋做夠6件，人人有份。上層香煎帶子，帶子大粒有肉地，味道鮮甜彈牙，外層又有少少焦脆；而越南米紙卷捲有米粉、生菜、青瓜絲、九層塔，淨食嘅話，清淡清爽，若沾上自家製辣汁，集酸辣鹹鮮，味道多變 ，據店員講個汁主要用青檸、檸檬、魚露、辣醬製作，怪唔之得有如此效果。真喺甚有驚喜嘅一道「上熱下涼」嘅米紙卷小食，值得推介 。 炭燒冬蔭雞 $118/半，$228/全 :) 雖則叫「冬蔭」雞，但跟飲冬蔭功時嗰份酸新重口味有很大分別，為保持雞肉本身嘅鮮味，「冬蔭」做得唔會太重手，所以，要有少少心理準備；而雞隻則燒得幾焦香，皮脆肉滑，香脆可口。當然，席間友人嫌「冬蔭」味唔夠突出，覺得未能彰顯「冬蔭」特色。 燒豬頸肉濱海 $88 :) :) :) 晌餐牌中，依道菜特別加插一張大相，因為喺曾經奪得「食神爭霸戰」嘅冠軍菜式。一大碟燒豬頸肉、青瓜片、濱海、甘筍絲、白蘿蔔絲、銀芽，以及另碟上嘅生菜、九層塔，店主話要包晒所有材料食先至好味。一口咬落，爽脆嘅豬頸肉，清爽嘅青瓜片，綿腍嘅濱海，再加另一款以蝦米十碎、花生碎、魚露所做嘅酸辣汁，口感層次豐富，風味獨特 :) 。 越式明爐魚 $118 :) :) 泰式明爐魚食得多，越式就第一次試，鮮魚採用烏頭，不過有時亦會用上鱸魚。湯頭味道辣辣酸酸，據介紹用咗唔少香料，如九層塔、芹菜、大蔥、香茅，不過，整體而言，感覺會較泰式清香。魚肉入口滑溜鮮嫩，加上湯底酸香惹味 :) ，至於墊底嘅黃芽白、芹菜、大蔥，吸收晒湯汁香味，亦都唔好錯過。 香茅豬扒濛 $48 :) :) :) 晌9款濛粉中（凍食），香茅豬扒濛喺店家嘅特別推介，當然要試一試佢啦。撈濛做得穩打穩紮，將濛粉跟墊底嘅銀芽、青瓜絲、生菜絲撈勻，加入魚露，配合埋蔥花同花生碎，既簡單，又清新 ，夏天食撈濛就最好不過。不過，原來最正喺件香茅豬扒，入口估佢唔到有種超脆感，煎得面層焦脆，肉質極鬆化，富香茅味，小弟都認為值得推介 。 手切雪花肥牛湯河 $68 :) :) :) 湯粉類中生牛肉及火車頭都喺店家嘅特別推介，不過，晌牆上仲見到有款廚師推介嘅手切雪花肥牛湯河。湯河跟本地手切肥牛分開上，肥牛色澤紅潤，油花亦見平均，放入湯河中靠湯嘅熱力燙熟，肥牛入口真喺嫩滑無比，油香而富肉鮮味 ；相反，湯底較清，據解釋喺怕搶走肉鮮味，但細呷一口仍感受到當中嘅清甜，至於湯中滑滑溜嘅河粉，應該唔會令人失望！仲有餐後免費奉送嘅糖水，都喺叫人覺得有種窩心嘅感覺。除咗食物做得出色，用料唔欺場，做得認真外，更喺一位媽媽對家人及食客嘅承擔。餐後有幸跟店主羅媽媽傾幾句，原來佢喺越南華僑，所以，做得一手正宗越南菜真喺難唔到佢 ，不過，年紀大都要放下鑊剷，而滋味館亦曾停業過。其後再重開，為嘅就喺患有聽障嘅仔仔，依家掌廚嘅就喺佢個仔及多年老拍檔嘅師傅，因為據佢講啲餐廳一聽到佢仔仔喺失聰，連試工機會都無，徒有一身承傳阿媽嘅好手藝 :( ！雖然過去多年間都遇到唔少困難，但羅媽媽仍相信憑著「越式滋味」及「出色手藝」，「滋」「色」以可改變命運！祝願小店百尺竿頭，更進一步 。…查看更多

其實都知道土瓜灣這個舊區有不少有質素的小店, 但真的很少前往, 皆因沒有地鐵不太方便, 揾路又不太叻的我, 怕找得來, 店子都打烊了…..但最近有朋友介紹一間正宗的越南菜館給我, 一心好奇下, 看看它的食評, 雖然食評不多, 但大部份都是好評, 於是便約了幾位朋友一起勇闖土瓜灣《滋味館》, 估不到得到一個很深刻的體會。小店以鮮綠色為主調, 充滿清新的感覺, 大大的店名招牌高高掛在店子的正中, 以黃燈光圍邊, 清晰鮮明, 站在對面街都能清晰可見, 比我想像中容易尋找。門口擺放了幾張大餐牌, 亦有色彩繽紛的菜式相片和一部平板電視播放着各款菜式的賣相, 相當吸引途人停下腳步看看。內裏以白色為主, 牆上只是掛了幾個相架及擺放了幾個酒架, 擺設簡約平實, 並不花巧, 有一種在家中的舒適感覺。小店地方不大, 但枱與枱之間有一定的空間, 不會感到迫迫夾夾, 令大家可在舒服的環境下品嚐美味的食物。眼看這裏員工個個都精神奕奕, 快手快腳, 而且親切友善, 特別是老闆娘, 她在店內四處穿插, 與熟客你一句我一句, 尤如一家人一樣, 這就是小店優勝的地方, 亦是我愛小店的原因。我們六人行, 看看精美的菜簿有什麼心頭好, 點選了以下幾款。每人先來一個原個椰青($28)以助解渴之用。大大個椰青, 內裏相當多汁, 飲了一整晚都好像飲不完, 勁! 入口冰涼清甜, 相當解渴和美味, 最細心是已替食客弄起了椰青蓋的椰肉。厚厚椰子肉相當爽脆, 但我郤喜歡吃腍嫩而熟透的椰肉。第一道是帶子米紙卷($50), 平時一般所吃的多數是大蝦米紙卷或扎肉米紙卷, 是一款凍食的菜式, 但這裏創一點新意, 改用了香煎帶子, 暖暖的帶子遇上微涼的米紙卷, 外暖內凍, 口感特別, 相當創新。厚厚的帶子外面煎至帶有稍稍焦燶, 甘香而鮮美, 肉質富彈性, 以薄薄半通透的米紙包着清甜的青瓜絲和紅蘿蔔絲、爽脆青綠的生菜絲、富獨特香味的九層疊及爽滑的米粉, 用料豐富而味道清新怡人。吃時淋上以魚露、辣醬、青檸檬和黃檸檬的自家製醬汁, 酸中帶點微辣, 更添美味。吃完凍食便來一道熱辣辣的越式明爐烏頭魚($118)。我家一向會以檸檬、果皮或豆豉蒸烏頭魚, 由於烏頭魚肉厚, 有時會因蒸得過時而令肉質粗糙, 所以對此魚沒有太大的喜好…….但原來越式以明爐煮製烏頭魚的效果有相當大差別! 特別在於一邊滾着, 一邊進食仍能保持魚的肉質嫩滑, 而且持續熱辣辣, 不會因放涼而變腥。肉厚而雪白的原隻烏頭魚, 肉質鮮嫩, 特別喜愛吃魚腩位置的我, 當然要試試它的嫩滑程度, 果然沒有令我失望, 腩位連帶着一層魚脂, 入口滑溜而鮮, 不感半點油膩, 不錯! 它以多款配料一同烹調, 細數一下包括有芹菜、黃芽白、香茅、紅椒絲、檸檬、九層疊、酸梅、薑片和碎肉, 用料豐富, 味道帶點酸辣, 很有風味! 特別要一提芹菜和黃芽白, 兩者吸收了魚的鮮味, 故相當甜美, 千萬不要浪費! 還有附上一碗原料的湯底, 當湯底被收乾時加入, 這樣便可保持原汁原味, 相當細心!店子真細心, 待我們把這條魚吃得七七八八時才再上下一道菜式, 讓食客可慢慢品嚐每道菜的真滋味! 熱辣辣後又來一道涼拌菜, 不知是巧合還是店主的刻意安排呢? 豬扒撈檬($48)的檬粉越南語是河粉的意思, 是一款我頗喜歡的涼拌菜式, 皆因多是用酸咪咪的的醬汁拌食, 入口帶點冰涼, 夏天吃相當不錯。這裏的豬扒撈檬碗底放有大量青綠而爽脆的生菜絲, 上層有條條透白且爽口滑溜的檬粉, 還有爽脆的芽菜和青瓜絲, 當然不少得已切好一件件的豬扒, 再加上翠綠的香蔥花和花生碎, 簡單而美味。件件肉厚的豬扒, 外面煎很香脆無比, 還帶點焦香味, 肉質腍嫩柔軟, 最欣賞是它仍緊緊鎖住肉汁, 絶不乾身。吃時淋上與帶子米紙卷相同的自家製醬汁, 再把所有材料撈勻, 入口冰涼而酸酸辣辣, 既醒胃亦美味, 推介!接着是半隻炭燒冬蔭功燒雞($118)。未上此菜式前讓自己想像一下它的賣相, 結果與我想像的實在差整條街…… 本以為是將雞件浸在冬蔭功湯中, 其實我都覺得這個想法有點奇怪, 但冬蔭功在我心目中是一碗湯, 所以才會想出這個樣子。燒雞外層燒得金黃, 且帶微微焦燶, 外脆內嫩, 不論雞胸或近雞脾位置均肉質嫩滑, 鮮味十足, 但可惜少了冬蔭功的辣味, 略欠冬蔭功的風味, 為何稱此菜式為冬蔭功燒雞, 好奇下問問老闆娘。原來此雞是先以冬蔭功醬醃製, 再以炭燒的烹調方式製作。整體而言, 此雞相當美味, 滿有炭燒的風味, 但因它名為冬蔭功燒雞, 郤欠了冬蔭功特色, 故感覺有點失望。再來是豬頸肉檳海 ($88)。記得曾經在另一間食店吃過一碟豬扒檳海, 但食法與此完全不同, 經過今晚才知道正宗的越南檳海是這樣的。一碟生菜配上一碟饀料和一碟醬汁, 饀料擺放得尤如一朵花, 中間有清爽的芽菜、白蘿蔔絲和紅蘿蔔絲, 旁邊有爽脆的青瓜片、腍嫩的薄薄炭燒豬頸肉, 還有口感彈牙加入香蔥的檳海, 配上一大碟爽脆而青綠的生菜和獨特香味的九層叠。食法是將各饀料逐一放在生菜上, 然後淋上自家製的酸辣醬汁再包裹來進食, 吃時一定要不顧儀態, 張大嘴吧同一時間將各材料放在口中咀嚼才有風味, 老闆娘表示一樣材料都不能少, 果然滿有風味, 相當美味!還有這道墨魚青木瓜沙律($78), 同想未上此菜式前又讓自己想像一下, 想像是青木爪沙律拌上烏卒卒的墨魚汁, 黑漆漆的一道菜式, 事實上賣相與我的想像相差太大, 我的幻想力實在太豐富了! 一道清新而冰涼沙律, 賣相相當吸引, 內裏有生菜絲、青瓜絲、白蘿蔔絲、紅蘿蔔絲和青木瓜絲, 眾食材都非常爽口清新, 當然不少得件件白雪雪的墨魚, 肉質爽嫩, 味道鮮美, 若然想吃得很清新涼快一點, 則勸告不要淋上所配搭的自家製醬汁, 因為它會讓這道清新沙律推至火辣辣, 但我郤喜歡接受挑戰, 更喜歡品嚐每款菜的獨特之處。青黃色的醬汁, 它以青檸、泰式辣椒仔及一些調味料的製成, 入口時一點殺傷力都沒有, 慢慢便能感到它的厲害, 勁!壓軸是吃越南菜必食的手切肥牛湯河($68)。河粉與肥牛分開上, 並非已舖在湯河上, 自行動手更有風味, 但要快快手呀。片片鮮紅色的薄切肥牛, 肉中夾雜着雪花油脂, 稍稍在滾湯內灼一灼, 肉質柔軟嫩滑, 並不油膩, 而且滿有牛肉的鮮味。條條通透的河粉, 入口滑嘟嘟, 以清爽的芽菜和洋蔥、清甜多汁白蘿蔔和翠綠的蔥花作配料, 湯底偏清淡, 沒有半點油膩感, 朋友正正喜歡它的清淡, 而我郤較喜歡濃郁的湯底, 所以不太合我口味。大家已吃到八成飽, 竟奉送一碗令食客甜在心頭的紫糯米糖水。雖然只是細細碗, 但估不到小小的店子也有飯後糖水奉送, 已是一個意外的驚喜。粒粒的紫糯米, 煮至半腍身, 仍保持稍稍的煙韌, 很有咬口, 口感豐富。其滿有椰香, 杰度適中, 而且不會太甜。老闆娘除了顧及熟客, 當然也沒有忽略我們。在品嚐糖水時, 她也主動前來問及我們對菜式的意見, 她由站至坐, 還慢慢細說她的背後故事給我們知道。原來她是一個越南華僑人, 所以能弄出一手正宗的越南菜, 不過她不是現時大廚, 大廚是她一名聽障的兒子, 而她是主力創作新菜式和傳授手藝。老闆娘由越南來港後在鰂魚涌開店, 但由租金問題已搬至灣仔, 其後亦同樣受租金困擾, 已打算退休的她, 停業一段時間, 但由於兒子一直未能成功找工作, 故她再為了兒子而「重出江湖」, 現坐落於土瓜灣。 雖然只對這間小店的背後略知一二, 但深深體會到為人父母的偉大。與好友共享一頓豐富而美味的晚餐, 再加上與老闆娘的一席話, 不但滋味在味蕾, 同樣滋味在心頭, 當你能夠有機會了解一間小食店的背後故事, 你便會對它不知不覺間產生一份情.......離開每間小店, 我都會習慣回望一下, 回憶當晚的美食和小節, 想想老闆娘為自己家人的生活默默經營這小店, 努力耕耘的小故事, 看着門口已續漸延開地鐵興建工程, 行人路上設有路障, 途人要左轉右轉, 行走得不太方便, 恐怕日後對這間小店一定會帶來不少影響, 真令人擔心, 但相信大廚的手藝再加上老闆娘的創新, 除了有一班熟客繼續會支持外, 亦會吸引不是無名而來的食客。回到家中, 不禁再想起老闆娘的背後小故事, 為了自己的兒子勞勞碌碌大半生, 想想自己的父母又何嘗不是為我和哥哥不斷付出, 回想起小時候由親友照顧, 父母早出晚歸, 早放工的話便來教我們功課; 太夜的話也會堅持來看看一眼才安心, 頻頻撲撲都是為了子女日後安穩的生活, 想到父母以前對自己付出, 現在年紀老邁仍盡心盡力付出, 不知不覺唱出「跟你 一起 我想應該值得慶幸，保顧是天生的力氣，忘記 提醒 還有那些你教我的，昨天你给了我 今天我照顧你……」, 一首大家可能未必熟悉的歌《記得我愛你》, 但我每次看這MV, 鼻頭總會一酸, 想與大家分享, 一邊欣賞一邊想着你珍惜的親人, 相信身為子女的你會知道接着應該怎樣做…….…查看更多