榮熙茶餐廳

這晚要拿東西給朋友,完成任務後途經大角咀,就在附近一大堆食肆中尋找一下當晚的著落!經過這間茶餐廳時,被門口招牌上的功夫湯海南雞飯吸引到,於是就進內一試了!此茶餐廳的格局與座位擺設都是開揚闊落,感覺上頗為舒服!雖然餐牌上的多款食物都感興趣,但最後都是選擇了海南雞飯;當這套餐上來時,由心而發一讚!以此時物價來說,如此份量的晚餐既有賣相,又夠實際,但當然也要味道來做依歸!功夫湯用了茶壺與茶杯盛載供客人享用,別緻之餘足見相當有心思!而喝起上屬於偏向清淡細膩的,應該與蘸雞件的濃醬做一個平衡點吧!喝了些湯,馬上試試雞件,肉質很嫩滑,而且透著點雞油的香味,淨食已覺得有質素;但當然都要配三式醬料來看其功架,當中甜醬油最能帶出雞肉肉汁的味道,與雞皮下的脂肪互相襯托,多了一些層次感:先甜後鹹再來雞油的味道!另外菜心也十分新鮮脆嫩;而油飯中的雞湯味略顯清淡,雞油亦落得十分抑制,似是為現時愛健康人仕著想;但一配襯起甜醬油,亦是十分美味的!整個套餐真的很快就清光了!總結此餐,在大角咀如此多食肆小店中享用到美味且價不高的海南雞飯套餐,也是挺滿意的!而飯後水杯指數(食物調味輕重度,5杯為最重口味),本人給予2.5杯,在同類食肆中本人給予中至高的用心評價!…查看更多

大角咀宜架真係隱藏左好多食店咩國家嘅菜色都有 今晚決定食返港色茶記😋榮熙茶餐廳 地方闊落 卡位更加唔會腳頂腳👍🏼 茶記黎講佢算選擇多 除左小菜多佢連煲仔飯同鐵板扒都有 簡直花多眼亂😌😌 叫左出名嘅海南雞飯 加$8食雞脾😁賣相非常好 隻雞脾好大隻啊 重有勁大碗飯黃皮雞咬落皮滑肉嫩 啖啖肉 加少許薑蓉就好正黃油飯香濃 米飯粒粒分明😙配埋功夫湯👍🏼 涼瓜魚腩煲 涼瓜夠甘苦夠林 好正👍🏼👍🏼魚腩鮮味肉滑 炸粉唔算太多 馬拉盞炒芥蘭 好香咸魚味 配上少許肉碎加埋芥蘭嘅爽甜 唔錯 只係略嫌油左少少⋯ …查看更多

我住喺大角嘴，某日一家四口落街搵食，行過大同新邨見到呢間嘢試業，於是膽粗粗貢入去試吓新嘢。（原來佢哋24/12號先正式開張，而我哋就早咗兩日去幫襯佢個晚餐）以下係嗰晚晚餐嘅內容：窩蛋牛肉煲仔飯牛肉好香嫩，美中不足係隻蛋熟咗少少，應該係上檯時先至打隻蛋落去，咁先至做到「金鑲銀」（蛋黃蛋白包住每粒熱飯）嘅效果，依家咁只能當熟蛋咁撈飯。 豉汁白鱔煲仔飯鱔肉食落口感好鮮，唔似雪藏或隔夜貨。唔錯！ 臘腸排骨煲仔飯又一唔錯嘅煲仔飯。請留意！最重要係佢哋伴煲仔飯嚟嘅豉油，乃自家調製，絕對係點精之作，不能不試！ 功夫湯海南雞飯套餐淨係睇陣容就知有誠意。其實佢嘅「功夫」係指個湯，或者有人覺得用個功夫茶壺嚟裝湯，仲要用功夫茶杯一口一口咁飲，會唔會過份姿整？但我就十分鐘意！一來佢的確可以令湯有保溫作用，二來佢個湯嘅內容唔係講笑，非一般例水之流，值得用杯仔慢慢㗳其滋味。----------同場加映：過咗兩日開張去食個午餐。焗豬扒飯 我不嬲對茶記嘅焗豬好抗拒，不過睇匀嗰日啲午餐冇乜對到口胃，就即管試試佢個焗豬...... 哈竟然出奇地唔錯喎！芝士同茄汁配得夠香，用上幾好味嘅吉列豬扒，唔係咬唔郁嘅柴皮豬，再加分，只係個人嚟講就嫌個飯乾身咗啲。但整體我覺得係有驚喜嘅，推薦！---------服務嚟講，個主管俾人感覺好緊張，好崩緊，可能係老闆都唔定，某啲員工或者係新做，有啲蝦碌，不過總括都唔差，而且又唔需要對佢哋有太高要求，都係茶餐廳嚟嗟。最後想講，喺大角嘴開茶記，仲要喺條人流唔多嘅街裡面開檔，要發圍真係唔容易，不過呢間嘢啲出品睇得出係幾有誠意，對於一間茶餐廳嚟講，啲食物竟然可以令人喜出望外，都算係大角嘴之福，所以我特地將佢哋提交嚟「開飯」分享俾大家，更第一個幫佢哋寫食評，希望佢哋可以保持甚至再提高到個質素，繼續為區內區外添口福就好嘞！…查看更多