個個都知青衣係美食沙漠，好難真係搵到一間好好食嘅餐廳，所以依間海南雞飯店最初開嘅時候係成日都要排隊，冇辦法啦，係青衣城咁多間餐廳來講，佢嘅食物質素算係中上，但係而家去就已經唔洗排隊啦，因為佢嘅價錢真係有啲貴，所以令好多人都卻步原本都冇諗住食呢間，但係見佢開咗咁耐都未試過同埋又唔需要排隊，咁就入去試吓，咁我同屋企人就分別叫了兩個餐和加了兩款小食亞參去骨海南雞飯 $91最初我以為91蚊嘅海南雞飯，分量點都會多啲，但原來係我太天真，佢雞嘅份量雖然看似有兩層，但係實則上是好少，因為每件雞肉都細舊（分分鐘雞皮仲大過佢啲肉）肉質係幾鮮嫩，唔會話乾柴柴，而且佢真係有認真處理食材，我一條雞毛都見唔到（唔好問我點解覺得做好基本功已經好好🫠🫠因為出面好多海南雞專門店就係連呢啲基本功都做唔好，就算佢做都幾好食，望到雞毛都已經冇晒胃口）油飯食落唔算好香，但係唔似出面咁黏身，仲可以食到粒粒分明，我個人就幾鍾意，不過分量都係好少，唔係好夠飽雞絲扎肉湯河 $71份量相比之下比海南雞多唔少，起碼係食得飽肚；雞絲應該都係海南雞頭頭尾尾嘅位置，味道食落去冇咩分別，不過就算係咁，肉質都係軟腍腍，唔會死實實，扎肉就正正常常，不過不失馬拉盞通菜 $33因為見冇咩菜食就特登嗌多一個通菜，份量都唔少，但係唔知點解要將馬拉盞分開放埋另一邊唔一齊炒（我哋又冇小朋友又冇話唔食得辣）要我哋自己撈勻一齊食（最初好似點醬咁食，但係味道係幾好，所以最終先決定撈勻一齊食）其實味道係唔錯嘅，辣辣地幾好食，但就係唔知點解要分開，搞到成件事好奇怪咁我哋見野食份量都唔係好多，見佢有個小食優惠價＄39 咁就叫咗一個椰香咖央南洋包和斑蘭咖央多士（原本諗住叫蝦餅，但係職員同我講炸爐壞咗，所以只剩返呢兩個同埋扎肉可以叫，所以我哋就叫了兩份包🙈🙈，超級飽）味道方面，因為佢哋係用馬來西亞空運直送麵包（顏色俾我哋平時食到嘅麵包更加深色）好似冇平時食嘅白麵包咁軟熟，然後佢哋就咖央醬沒有馬馬虎虎求求其其搽少少就算，而係好平均咁搽滿整塊麵包，就算係啲邊邊位都食到滿滿嘅咖央醬而且每份都有厚厚嘅牛油，感覺比主食更加用心🤔🤔不過咖央多士同南洋包，雖然兩者都好食，但係我覺得叫一款已經足夠，因為味道上佢哋分別不大，只不過咖央多士會再脆身啲，南洋包再甜少少我哋主食有加多$10要杯野飲，分別係馬來拉茶和南洋咖啡，味道正正常常，但平時飲慣港式奶茶咖啡嘅就未必鍾意以上均是我個人觀感，每個人嘅口味各有不同，所以末必同每個人嘅用餐感覺一樣，如有不同，敬請見諒。…查看更多
