三德素食館 (僑冠大廈)

定咗6位7點半，去到見到餐館內食客唔多，可能係因為隔離間華豐國貨進行緊大裝修，外牆搭咗棚，行過都見唔到間食館。我哋6個人揀咗個六位套餐$615，轉是日燉湯（精選姬松茸燉湯），每位另加$10，真係夠哂足料，飲完都已經有啲飽嘅感覺。另外精美小菜五款就揀咗五柳仙班（即係炸芋頭魚）、蜜汁素叉燒、梅菜蒸鮮竹、椒絲腐乳花姿通菜、羅漢齊豆腐，都好夠味，食落唔覺得油及鹹，而且份量係啱啱好，仲有甜品每人一碗紫米西米露，個個都食得好飽，唔需要額外再加餸及飯，連埋茶芥加一後，就係$850，除返開每人都只係$141.7。總結：食物質素好，服務態度都好好，環境就比較舊啲，如果將地氈換成地磚，洗手間翻新下，咁就會更加好啦。…查看更多

2003年，三德素食館在北角僑冠大廈一樓開業，而僑冠大廈至今亦有近五十年歷史，連同毗鄰的華豐國貨、商務印書局，遠些的新光戲院、新都城百貨，還有被時光遺忘得乾乾淨淨的北角邨、明園遊樂場等等⋯⋯它們都為北角街坊留下過幾多五光十色的夢幻泡影。而我，就念念不忘那條曾經滄海的名園西街。每次到三德，總會勾起一些伶人往事。嘩！講尼啲⋯⋯ 講番正經，當晚weekend八時多到達，立刻有位。因為超肚餓，叫了一碟酸齋，食咗先講。之後點了兩位套餐，包一羹兩菜送甜品。選了： 竹笙冬茸粟米羹、五柳仙班、麵醬什菜素魷絲。另加一碗白飯。先說單點的酸齋，份量足秤，入口彈牙，起初偏淡，但後來覺得酸味入口自然而溫和適中，是開胃之選。竹笙冬茸粟米羹，用料份量絕不吝嗇，勾芡稠度準確，惟一人只有一小碗，份量偏少。五柳仙班，是炸魚形芋泥。其中芋泥弄得幼滑軟綿而水份適中，佐以帶酸又帶甜的五柳醬汁，正。不過，可能在上桌前放久了，炸的外層已經不很脆了，也不夠熱。但亦不失為不錯的出品。麵醬什菜素魷絲，質和量並重，菜款平均，當日執碼功不可沒，這也是我常說的細節。素魷絲的主要成分相信是蒟蒻，也俗稱魔芋，有謂蒟蒻是胃腸的清道夫，大家不妨試試。蒟蒻本身味道不顯，主要靠外物調味。所以，麵醬的味道令我最注意，因為麵醬是此道菜的味道靈魂。但美中不足，這一次麵醬的味道未能沾合在每條菜和每條素魷絲上，我索性把菜或素魷連同一兩粒麵豉一起入口以吊吊那香味，又okay喎！送甜品，是紫米西米露。埋單：$266 (套餐$180+酸齋$50+白飯$10+酸菜$10+兩位茶$16)總結：性價比合理。是我的素食飯堂之一。…查看更多