天壽和食屋 (已結業)

之前成日都想去呢間野試下，但次次都好多人，今次見到好似可以即刻入去，就去左試喇！ 個個都話呢間野係之前大馬路田中個老闆開既，唔知係唔係，不過D 野食就好似既。今日我地叫左一個三文魚腩碎飯，一個泡菜三文魚頭煱同埋一客芝士軟殼蟹卷。我覺得好好食呀！個三文魚腩碎飯好足料架，我最中意將D 紫菜夾埋D 飯呀三文魚呀一齊食，好好食呀！佢個飯送埋個湯，足料架，你睇下，有好大舊魷魚架！ 不過個湯就咸左D。泡菜三文魚頭煱就辣辣地既，個賣相好靚架，味道都唔錯，三文魚頭都好有咬口。芝士軟殼蟹卷好好食，我不嬲都好中意田中既卷物，如果佢地真係同一間既話，我覺得佢進步左添，D 野整得仔細左。如果下次又唔係點使等位，我都會再黎食呀！ 如果食日本野黎講，呢度真係唔係好貴，下次再同朋友去食。

元朗呢排唔知點解多左好多日本食肆，經過呢間門口超迷你的天壽和食屋，我即刻諗咁細間舖都開到。入面得十幾二十個位，真係好細，而且仲爆晒場。但見佢竟然有元朗出名日本食店「田中」的三文魚腩碎飯，咁就外賣左返屋企食。一開個飯真係好足料，三文魚腩碎好似仲多過田中，而且同田中一樣有三樣刺身、味噌湯同紫菜跟埋。同田中唔同佢唔俾北寄貝，係蟹子魷魚，仲正。隻甜蝦就無田中咁大隻，但都好鮮甜。味噌湯竟然有原隻蜆，味道都OK~