講到韓國菜，其中一樣最有代表性食物一定係韓式炸雞！口味多選擇外，就算加咗醬汁都仍然好香脆，難怪咁多fans。今期搵咗幾間韓式炸雞店介紹畀大家止吓炸雞癮～
$68六件炸雞 Cup Bop Korean Restaurant
圖：盡食天下
喺香港呢個飲食業競爭咁大嘅地方，屹立十年真係唔容易。呢間小店由韓籍媽媽主理，全部菜式都好有韓式家庭風味，同埋性價比好高。好似原味炸雞只係$68就有6件，超抵食！炸雞選用雞髀肉，全部都去晒骨，咬落啖啖肉，加上以牛奶浸醃過夜，外脆內juicy。口味方面幾推介秘製蜂蜜檸檬，比起一般嘅更清爽，食落唔會膩。
招牌無骨蔥雞 安客蔥雞 
圖：位於西營盤嘅型格韓國菜館，招牌係蔥絲無骨炸雞～雞肉炸得外脆內滑，配埋蔥絲食就更fresh，仲有得揀傳統辣醬、芥末醬、沙律醬同醬油大蒜呢4款口味；配埋煙煙韌韌嘅炸年糕同炸餃子，邪惡但超滿足！另外都可以揀雙拼炸雞，咁就一次過滿足晒兩個願望啦。
香甜蜂蜜蒜泥炸雞 Pizza Maru
圖：嚟自韓國、主打新派韓國美食嘅餐廳。佢哋嘅炸雞就主打超多口味選擇，包括超人氣嘅蜂蜜牛油同蜂蜜蒜泥，兩者都甜甜鹹鹹，愈食愈滋味；芝士炸雞有勁香濃芝士粉味，芝士控必食！另外仲有唔少創意口味，如玫瑰炒年糕炸雞、魚香青椒炸雞，後者係醬油炸雞配韓國直送虎皮青椒同鯷魚乾，層次豐富。
川味麻辣炸雞 啤啤Bear韓國包車
圖：kayla324
裝修以韓式機舖為主題嘅韓國菜，全店以霓虹燈同各種遊戲機做佈置，玩味十足好有氣氛。韓式無骨炸雞配脆脆薯格有5種口味，首推川味麻辣醬汁，一入口先感受到麻繼而係辣味，麻辣醬配上韓式炸雞好有新鮮感。酸忌廉醬都值得一試，酸酸甜甜一解炸雞油膩感。
皇牌芝士炸雞 HAHA CHICKEN 하하치킨 
圖：由旅居首爾十幾年，曾於當地經營炸雞店嘅港人創立同管理，炸雞用以韓式秘方醃製，全純手工製作配以韓國進口食材，味道正宗。推薦嘅狂熱炸雞餐，香濃惹味帶點微辣；芝士炸雞裹滿芝士粉，外皮呈金黃色，每一啖都有濃郁嘅芝士香氣。佢哋一個套餐包3件炸雞、細卡邦尼飯/安東雞飯或飲品，全部都係四十幾蚊就食到，好抵食呀！
文：Yanica
編：Cathy
