香港餐廳同酒吧選擇多到數唔晒，今次揀咗幾間環境同餐飲都各有亮點嘅特色餐廳酒吧，無論約朋友聚會，或者想輕鬆飲返兩杯都有唔同選擇～
全新概念餐廳及酒吧 餓虎藏龍 
啟德全新餐廳酒吧，日間係親子聚腳地，夜晚就變身型格酒吧～招牌菜有鬼馬咕嚕Nachos、冬蔭功蝦多士同超澎湃嘅和牛海膽魚籽煲仔丼，真係夠晒創意又吸睛。飲品就更加不得了！煲仔飯雞尾酒用臘腸糖水加威士忌，配埋臘腸多士勁有驚喜；鎮店之作餓虎藏龍就用奶洗技術改造長島冰茶，外觀如清水，入口就係熟悉嘅可樂香甜味！無論想同朋友聚會或搵個地方輕鬆chill吓，都絕對係一個值得bookmark嘅場地。
懷舊港風酒吧 Kinsman 
呢間酒吧推出咗一份好有心思嘅創新酒單，以世界各地五大唐人街為靈感，用十款雞尾酒講移民同文化故事，好有創意～例如曼谷就有船麵風味嘅「船麵瑪記」；秘魯就係煙燻味超重嘅「聖木纏綿」等，每杯都有唔同驚喜。食物方面都唔馬虎，除咗保留人氣嘅蝦多士同臘腸拼盤，仲有新推出嘅辣椒螃蟹春卷、茄子陳村粉等小食。呢個酒單唔只係飲品，仲好似一場文化旅程，飲一杯就感受到背後嘅故事。
名廚主理韓式Fusion酒吧 Akira Back
國際名廚Akira Back終於將佢嘅同名餐廳帶到香港喇！融合日韓美式風味，打造出一系列充滿創意嘅料理。由招牌AB吞拿魚薄餅、拖羅韃靼配魚子醬到48小時慢燉和牛肋肉，每一道菜都充滿心思。餐廳仲有獨創雞尾酒單，靈感嚟自主廚嘅文化背景，例如帶點辣勁嘅Gochujang Michelada、清新嘅Bamboo Serenity同柑橘風味嘅Yuzu White Negroni，都非常值得一試。
法式美饌醇酒交織之夜 Jean-Pierre
呢間法式小酒館又有新搞作喇～推出咗Mardi Rouge(紅色星期二)，每個月第一個星期二，餐廳燈光會慢慢暗落嚟，氛圍即刻變得浪漫又熱鬧，大家可以一邊食經典法式料理，一邊聽駐場鋼琴家彈奏，成個vibe超正！無論係想同另一半慢慢嘆返杯酒，或者同朋友享受青胡椒牛扒加法國佳釀大快朵頤都一樣啱晒。就連餐廳自己都話，用餐本身就係一場表演，Mardi Rouge就再加多一層音樂同氛圍，令成個晚餐更加難忘。
文：Yanica
編：Cathy
