16cm高燒肉丼+原板海膽!牛角燒肉丼專門店抵港(有片)
2018-11-23

食肉獸們注意:日式燒肉專門店牛角嘅兄弟品牌牛角次男坊開到嚟香港啦!主打即叫即燒嘅燒肉丼,招牌次男坊丼堆到有16cm高夠哂誇張呀。無論牛肉定豚肉都有得升級,仲可以搭配唔同海鮮,由牡丹蝦刺身到原板海膽都有,想食平啲啲定豪華版丼飯自己揀!
 


牛角次男坊丼($88)

牛角次男坊香港首店位於荃灣廣場,而次男係指呢個就係牛角嘅兄弟品牌呀。喺日本同台灣都有分店,而且喺台灣曾經創下開業15日就賣出超過一萬碗燒肉丼嘅記錄!
 


呢碗就係品牌主打嘅次男坊丼,上面舖滿即叫即燒嘅牛肉,唔單止有16cm高,總重亦達500克。配品牌獨家調配,帶微辣嘅次男坊燒肉汁,惹味得嚟唔會蓋過牛肉脂香。
 


牛角次男坊丼配生海膽(+$120)

想食得豪啲?呢碗牛丼就升級做美國SRF極上和牛板腱肉(+$70)特點係雪花分佈均勻,味道豐厚。而香港店獨有嘅海鮮配料亦係亮點,生海膽以原板奉上,而且按季節挑選唔同地方嘅優質海膽,一碗食齊和牛同海膽嘅脂香同鮮味,邪惡度飆升!
 


牛角次男坊丼配牡丹蝦刺身(+$120)

牛肉另一升級選擇係日本熊本玉名黑牛牛肋肉(+$110),油花分佈更細膩平均,口感柔嫩入口即溶。而牡丹蝦刺身就夠哂長,鮮味十足。
 


豚肉丼($78)

唔食牛嘅話亦有豬肉選擇,選用丹麥豚肉眼,燒至香口後好似朵花咁舖喺碗飯上面,賣相已經令人食指大動。而且餐廳嘅飯亦係選用日本產越光米,粒粒分明口感軟糯,配埋燒肉汁同溫泉蛋一齊食最香口。
 


豚肉丼配帶子刺身(+$80)

豚肉丼亦有得「升呢」,好似呢碗就轉為熊本縣產豚肉(+$60),再加埋帶子刺身,同時滿足想食燒肉同刺身嘅願望。如果唔想食刺身嘅話,亦可以選擇將配搭嘅海鮮火炙。
 

更多【新店直擊】:
1. Vivienne Westwood Café銅鑼灣新店 打卡三層架、全球首推鹹食
2. 西營盤日式小店$10隻生蠔 日限15份黑咖喱吉列豬扒飯
3. 全港首創「當店精米」 葵芳惹味海鮮鐵板燒

 

燒鹽麴牛舌丼($78)

燒牛舌大家可能都食唔少,燒鹽麴牛舌又試過未?鹽麴可以令肉質更鬆軟,而且帶少少米香同天然甜味。燒牛舌爽口而唔過韌,有水準。
 


王樣!豚肉丼($88)

豚肉腩(五花腩)經過燜煮後相當入味,有脂香、鬆化而唔會覺得太油膩。而且分量十足,長到好似燒鰻魚咁!配以溏心蛋更豐富。
 


餐廳一開就大受歡迎,Lunch Time都有唔少人等位,其實大家可以用手機Scan一下餐廳張貼嘅QR Code,或者上官方網站就可以預先落單慳返時間!遲啲唔單止堂食,仲可以用手機買外賣自取,夠哂方便呀。
 


(餐廳提供照片)


(餐廳提供照片)

之前餐廳仲搵嚟《全民造星》MIRROR成員姜濤同Alton王智德一齊慶祝新店開幕,一齊比賽整牛角次男坊丼呀!
 





牛角次男坊
地址:荃灣大壩街4-30號荃灣廣場1樓112B-113號舖




文、相、片:Cathy

關鍵字
牛角次男坊
荃灣
燒肉丼
豚肉丼
牛舌丼
日本菜
燒肉
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
$68鰻魚飯 日本人氣連鎖鰻魚專門店登陸尖沙咀 香港Menu率先試
1天前
【特約分享】尖咀商場搵食地圖 多國美食任你揀
2018-11-30
【又到聖誕】任食各款海鮮、環球美食!聖誕自助晚餐精選
2018-11-26
美國人氣連鎖漢堡店登陸灣仔 15款漢堡配料免費任加
2018-11-16
佔地三層!九龍城新開日式料理 一次食勻壽司+鐵板燒+ 爐端燒(有片)
2018-11-19