高質手拉Pizza店銅鑼灣重開 新推熔岩花生醬牛窩夫+Tiramisu Latte
2021-02-02

鍾意食Pizza嘅朋友注意,呢間主打正宗意大利手拉Pizza嘅小店喺銅鑼灣開返啦!同之前喺Soho嘅做法、配方都完全一樣,用意大利進口00麵粉製作批底,口感煙韌得嚟又有麵粉香。新店仲有新推出嘅牛窩夫,以韓國大熱Croffle為靈感,必試超澎湃嘅鹹牛肉炒蛋流心花生醬牛窩夫!
 


Al Forno Cafe and Bar新店位於銅鑼灣,廚房特設一部Pizza爐,最高溫度可達500度,可以喺短時間內烤熟,令批底口感特別煙韌,同時鎖住食材水分!新店走Cafe & Bar形式,各款輕食同飲品同樣落足心思。有唔少熟客特別嚟支持,星期五至日都特別多人。
 



意式風乾火腿手工薄餅(Set Lunch $108)

招牌手工Pizza當然係必食,麵糰用最幼細同雪白嘅00麵粉,發酵兩日後再手拉成批底。烤完口感煙韌鬆軟,保留到水分唔會太乾,批邊更加係外脆內軟又富空氣感!上面嘅意式風乾火腿就既有鹹香亦有肉香,惹味柔軟。再加上即刨Parmesan芝士就更香口,而火箭菜就可以平衡油膩感。
 


Set Lunch嘅周打蜆湯亦非常足料,口感Creamy柔滑,差唔多啖啖都食到蜆肉。
 


墨魚汁意粉,帶子,蟹肉,蟹籽(Set Lunch $148)

每條意粉都裹上黑色嘅墨魚汁,食落口感彈牙又有墨魚鮮香。蟹肉同帶子都好出色,蟹肉口感結實,帶淡淡海水鮮味;帶子外面微焦,裡面鮮美嫩滑。整體鮮味十足。
 



鹹牛肉炒蛋流心花生醬牛窩夫($88)

牛窩夫即係指將牛角包擺落窩夫機,熱壓成外脆內酥嘅格仔窩夫狀。牛窩夫嘅做法就係參考韓國近年興起嘅Croffle,而口味就由大廚發揮創意構思而成。例如呢個鹹牛肉炒蛋流心花生醬就好有香港茶餐廳Feel,兩塊牛窩夫夾住鹹香滑溜嘅鹹牛肉炒蛋,再加上好似熔岩咁澎湃嘅花生醬,視覺效果滿分!食落花生醬同炒蛋嘅味道估唔到又幾夾,味道同口感層次都好豐富。
 

更多【新店直擊】:
1. Burger Joys副線!荃灣新開平民漢堡外賣店 $48安格斯手打牛肉漢堡
2. 日本過江龍年輪蛋糕首次以網店形式抵港 必試原味年輪蛋糕+開心果磅蛋糕
3. 銅鑼灣精釀啤酒餐廳 必食啤啤雞+炸荽漢堡 老闆親自畫圖設計 旋轉木馬打卡位

 

提拉米蘇($68)

餐廳另一必食推介,手指餅先用咖啡加酒浸透,口感綿密而充滿咖啡醇香同酒香。中間嘅忌廉非常Creamy,有濃厚芝士味同蛋香,再加埋上面嘅可可粉,味道香濃而甜度適中,口感柔軟濕潤。
 


巴士克焦香芝士蛋糕($55)

手工甜點亦有蛋糕選擇,巴士克焦香芝士蛋糕嘅芝士香味濃郁,帶少少天然酸味所以唔會太膩。口感偏軟,如果有多啲啲焦香加更好喇。
 


提拉米蘇·拿鐵($58)

提拉米蘇出色之餘,變成咖啡一樣好飲!拿鐵用嘅House Blend咖啡常用波西米亞咖啡豆,口感厚滑,富堅果香氣同時尾韻帶少少水果酸甜味,甜感突出易入口。拿鐵上面加提拉米蘇嘅忌廉、手指餅同可可粉,食嘅時候將手指餅浸入拿鐵當中,吸滿咖啡味道更香濃。
 


抹茶拿鐵($42)

選用澳洲嘅抹茶粉,入口茶香同鮮味拍得上日本京都出品!抹茶香氣明顯之餘,亦有悠長回甘。原來秘訣在於用抹茶加一部分牛奶打成香濃細滑嘅抹茶奶泡,再倒喺牛奶上面,唔單質營造出分層效果,亦令拿鐵口感更濃厚。所以建議大家唔好攪勻,好似飲奶蓋茶咁一啖飲齊抹茶奶泡同抹茶牛奶,抹茶香味會更突出呀。
 





Al Forno Cafe and Bar
地址:銅鑼灣告士打道218號地舖




文:Cathy
相、片:Calvin Kwok

關鍵字
銅鑼灣
Pizza
薄餅
tiramisu
牛窩夫
咖啡
Al Forno Cafe and Bar
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
6天前
【2022生日優惠】持續更新!5月壽星+指定月份補祝生日 嘆火鍋78折起
2022-04-29
晚市堂食恢復!最新酒店自助晚餐一覽 低至78折、龍蝦/海膽主題
2022-04-20
好消息!6間老店/人氣小店 結業重開
6天前
8大必試片皮鴨!超平$178/隻、特色北京填鴨三食
2022-04-27