香港5大花甲粉推介 街市入新鮮貨、自家炒醬
2024-06-21

新鮮熱辣辣嘅花甲粉一直都係平民美食,有人鍾情肥美花甲,有人就偏愛鮮味嘅湯底,亦有人鍾意索滿湯汁嘅粉絲~今期為大家搜羅香港多間花甲粉,咩款式都有!


自家炒製蒜蓉+麻辣醬 麻甩系

一間充滿懷舊港式風味嘅小店,由顏色鮮艷嘅小掛燈到店名都好有香港style。嚟到必試招牌花甲粉,單係湯底已經有4款:蒜香、香辣蒜香、麻辣蒜香同酸辣味,所有醬料都係店主一手炒製,落足心機㗎~最受歡迎嘅「蒜香世一花甲粉」基本配料有花甲、娃娃菜、金菇、芽菜、豆卜、蔥花同芫荽,一碗約有10隻嚟自東南亞嘅活花甲!花甲會先喺店舖飼養一陣子,確保吐乾淨沙又新鮮。另亦加入九層塔,獨特香氣滲入湯底,飲落清甜,惟蒜味唔算濃烈,口味偏清淡。


街市即日選購活花甲 茜麵(西口西麵)

花甲粉嘅重點梗係新鮮花甲啦~店主每日親自去街市選購活花甲,務求為客人帶嚟最新鮮嘅味道。湯底供應香辣同蒜香2種口味,而7款麵底之中,開飯仔就推薦掛湯爽口嘅粉絲。一碗約有十多隻花甲,值得一讃嘅係粒粒花甲都鮮甜冇沙,食落肥美厚肉;湯底清甜同時鮮味突出,加入粗蒜粒更滋味。嗜辣者可以點香辣湯底,微辛辣勁會更惹味!點餐區隔壁舖位另設堂食用餐區,想即買即食都得。


火山造型花蟹花甲粉 回憶客棧

有時粵式串燒店都會供應花甲粉,好似呢間就有以錫紙包裹成火山造型嘅花甲粉喇!餐廳選用唔同海鮮搭配花甲粉,如花蟹、鮮魷、鮮蝦等等,啱晒海鮮愛好者。開飯仔今次揀咗花蟹花甲粉,由落單到上枱需時近20分鐘,經錫紙包住,耐熱香噴噴~花甲分量頗多,約12隻,但肉質偏瘦同細粒,部分花甲更出現未開殼情況。而花蟹味道中規中矩,但濃味帶酒香嘅湯底,幾啱邊食串燒,邊過吓口癮。


人氣街坊店 元朗花甲粉

原圖:yingchow312肥兔日記

提到花甲粉,唔少食客都會推介呢間小店,佢以香辣濃味湯底同鮮甜冇沙花甲留住一班食客嘅胃口。客人可以自選芫荽、蔥同炸蒜提升香氣,另外辣度同麻度亦各設6級,由清湯到魔鬼辣、走麻到魔鬼麻都有,口味完全可以個人化,設計細心。你仲可以追加花甲或其他配料,最平$7起。早前同區開設分店,設有30至40個堂食座位,可以食得舒服啲𠻹。


逾10款花甲粉+湯鍋選擇 花甲年華

原圖:搵食艱難wunsikgannanonion120

想每次食花甲粉都有啲唔同?呢度有超過十多款花甲粉,一定滿足到你!款式選項豐富,如配珍寶肥牛、無骨魚片、鮮蠔仔、酸菜魚、龍蝦海鮮、胡椒鮮雞等;湯底除咗香辣口味,另有胡椒、豬骨以及番茄湯,食出花甲跟其他食材嘅多元化組合,輪住食都要啲時間呀!


文:Sharon
編:Cathy
相、片:YanYan



關鍵字
花甲粉
元朗
荃灣
麻辣花甲粉
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
持續更新! 2024生日優惠 食盡歐亞各式料理
2024-07-02
【2024新店精選】7月更新! 嘆印度土邦宮廷菜、典雅江南菜
1天前
【隨時更新】零食速報 每周新款零食、酒品點評
2024-07-09
前五星級酒店烘焙主廚尖沙咀開店 推千層酸種蛋撻、牛角包
2024-06-26
香港5大花甲粉推介 街市入新鮮貨、自家炒醬
2024-06-21