香港食到九州名物炸雞丼 挑戰3kg MEGA版
2018-06-10

食來食去都係牛丼海鮮丼親子丼?不如試吓呢個來自日本嘅炸雞丼!丼丼屋同丼物祭「日本丼物選手權」合作,將日本九州大分縣名物「中津唐揚雞丼」帶咗嚟香港,期間限定供應,炸雞fans一定要試!

中津唐揚雞丼定食(配沙律、和風湯、甘酒蘋果汁) $118


九州大分縣中津市以炸雞馳名,當地獨有唔少炸雞專門店,市民更加熱愛炸雞。今次呢款「中津唐揚雞丼」為唐揚雞料理專門店「職人のからあげ華鳥」嘅出品,係專誠為選手權而設,連舖頭都冇得賣架!



舖頭開業十年,係當地名店之一,連續4年參加「日本丼物選手權」。今次負責人米澤哲也都專誠到港,分享炸雞心得。華鳥選用日本雞肉,用醬油、清酒及蔬菜醃製雞肉12個鐘至入味,炸嘅時間火候都好重要。試食過炸得酥脆,炸粉唔厚,而且有濃郁大蒜及薑味,本身已好夠味。



不過最重要係兩款醬汁,淋喺炸雞上面嘅南蠻醬,以米醋、醬油及糖調成,味道帶酸甜,可以一解油膩感。食時仲可以蘸柚子胡椒沙律醬,酸甜微辣,更加開胃。米飯都講究,加咗雞肉同牛蒡煮成,有微微鹹味。



如果有一大班朋友都鍾意食炸雞,不妨點個3kg MEGA唐揚雞丼!雞肉堆到成座山咁高,份量足3-4人享用,而且特別配上四款醬汁,包括秘製南蠻醬、黑松露沙律醬、咖喱沙律醬同他他醬。

MEGA唐揚雞丼 $448 (一天前預訂)


7月9日至15日,更可以4人一組參加挑戰賽,於15分鐘內食晒成個MEGA唐揚雞丼,即可免費仲送$200餐飲禮券!早前俄仔Ansheles同杰寧公主更親自挑戰,3分鐘內食到三份一都冇呀!



中津唐揚雞丼定食全線供應,每店每日限量20份,平日只於晚市供應,星期六、日則全日供應。MEGA唐揚雞丼必須一天前預訂,大胃王朋友要去挑戰啦!

丼丼屋

地址:觀塘觀塘道418號創紀之城五期(apm)6樓L6-3b號舖



文、相、片:Perrins

關鍵字
中津唐揚雞丼
炸雞
丼物
日本菜
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【隨時更新】零食速報 每周新款零食、酒品點評
2021-06-04
【2021生日優惠】持續更新!6月壽星送海鮮拼盤
2021-06-01
$208起燒肉放題 空運「一頭買」佐賀和牛 荃灣新開日式燒肉店
2021-05-20
尖沙咀新開手工意粉專門店 日本海膽醬手打意粉、廣島蠔味噌醬意大利飯
2021-05-14
中環點心茶館重現港式優雅茶藝文化 前富豪飯堂老師傅主理 招牌菜韭菜炸蟹盒
2021-05-21