滷肉飯絕對係台灣名物，幾乎所有遊台旅客都一定會食番碗嘅必食item，早排更被CNN選為40款「非吃不可的寶島美食」第一名。但台灣有咁多間滷肉飯店，究竟邊間口味最啱食、最啱心水呢？

鑽石山荷里活廣場一連3日大搞首屆台灣滷肉飯節，場內有8間來自台北、台中、台南嘅滷肉飯食店，即場炮製自家招牌滷肉飯或肉燥飯。既有傳統古早味道，又有創新配搭，各位可盡情試味！

古早派

80年老字號　圓環龍凰號

被台灣聯合報封為5大必食滷肉飯嘅圓環龍凰號，至今已有超過80年歷史，可算是業界元老，憑店子第一代老闆嘅祖傳秘方，曾經創下一日賣出2,000碗滷肉飯嘅紀錄，仲有台灣行政院前院長謝長廷、著名電影製作人趙正平等名人加持，實力非凡。

滷肉選用豬嘅後腿肉、肩胛肉及豬皮，令滷肉有多重口感，有時煙韌、有時爽口；加埋祖傳秘方製成嘅滷汁，食完有陣陣嘅中藥餘韻，味道明顯與一般滷肉飯不同。

遊客必食　面鮮到

前身為「劉家老山東牛肉麵」嘅面鮮到，曾經榮獲2017年兩岸十大名店金獎，今年亦被納入2018年台灣觀光手冊之中。其招牌面鮮到滷肉飯好有膠質，師傅以豬腳下嘅「虎掌肉」入饌，加上曬足120日嘅醬油、冬菇、紅蔥一同熬煮，令招牌滷肉飯除咗有油香，仲好重膠質，齒頰留香。

台南政府認證　安平貴記美食文化館

來自台南嘅安平貴記美食文化館曾經獲得台南市政府頒發小吃楷模獎章，而招牌滷肉飯亦好有台南著重甜味嘅特色，醬汁鹹中帶甜，幾惹味。

衝出台灣　度小月

同樣來自台南嘅度小月自1895年起創立，至今已由第4代傳人執掌。咦，度小月唔係出名食台南擔仔麵咩？無錯，擔仔麵上嘅肉燥，正正就係滷肉飯嘅材料。以溫體豬肉、台灣紅蔥去煮，再經過不斷調較肉燥嘅油分、肉汁等分量後，就炮製出香口美味嘅滷肉飯。

香腸配飯最滋味　黑橋牌

黑橋牌滷肉飯，未必人人都食過，但黑橋牌香腸，甚至黑橋牌豬肉紙你都一定見過。台南黑橋牌嘅手信一向受遊客歡迎，至於肉燥飯係以傳統秘方去烹調，分量、比例都有限制，令滷肉飯品質及味道都維持穩定。仲有招牌香腸做配料，幾豐富喎！

創新派

貴氣十足　阿義師頂級滷肉飯

話明要創新，咁當然係同傳統滷肉飯不太一樣啦！由台灣貓空山上著名嘅「阿義師的大茶壺餐廳」總廚阿義師構思，將北海道干貝、馬友魚、金華火腿、櫻花蝦等高級食材熬煮成黃金滷汁，令普通滷肉飯大upgrade，變成頂級滷肉飯。

獨創竹筍滷肉飯　涼師父滷肉飯

總廚涼師父曾獲台灣菁英名廚嘅頭銜，非常厲害，並且對滷肉飯加以改良，首次創作出「廿筍滷肉飯」，以清爽嘅筍子配以油香易膩嘅滷肉飯及醬汁之中，能減輕滷肉嘅肥膩感，被視為台中逢甲街市必食item！

增添台式風味　寶麗金餐飲集團

我哋食過嘅滷肉飯，通常都係一碗白飯，上面再佈滿滷過嘅肉碎，好少會有其他餸；但呢款三寶滷肉飯就特別加入台灣嘅新竹烏魚子、櫻花蝦及虱目魚，好足料，味道、層次亦感豐富。

點先可以食到？只要喺活動期間，即場捐款港幣$30畀港澳台灣慈善基金會，即可入場換領1份滷肉飯，仲有精選靚湯架，每個攤檔都不同，例如涼師父滷肉飯會供應魷魚肉羹、黑橋牌則有貢丸湯！每日數量有限，先到先得，換完即止。

除此之外，場內仲有多家旅行社介紹台灣旅遊資訊及限定優惠，而且仲聽到台灣金曲演唱、旅遊blogger分享等節目添！反正放假，一於去玩下！

首屆台灣滷肉飯節
活動日期及時間：3月31日至4月2日1pm起至換完即止
地址：鑽石山龍蟠街3號荷里活廣場1樓明星廣場
查詢：2118 8811

文：Joy