平時食韓式燒肉都要叫多幾個朋友一齊，先食到多啲唔同款式。今次炑八韓烤新線炑八Taste就新增唔同嘅燒烤Set，肉嘅分量細啲，一個人自私食，或者兩三個朋友一齊食都咁啱。而且仲有拌飯、紫菜包飯、湯、炸雞等，想食韓式快餐一樣方便。
 

一人前烤肉套餐

前菜（套餐免費供應）

迷你沙律（套餐免費供應）

炑八Taste位於旺角MOKO食代館，主打唔同燒烤套餐同輕食。好似Taste燒烤餐就可以任揀2款肉類同1款飯類（$128），或者4款肉類同2款飯類（$188）。套餐已經配埋三款自家製特色前菜、迷你生菜同迷你沙律。
 

牛臉肉、炑八梨汁雞肉、炑八特製護心肉（Taste雜錦套餐 $98）

如果連揀都懶得揀嘅話，仲有幾款已經配搭好嘅特選燒烤餐，例如呢個套餐就包3款燒肉同一碟紫菜包飯，一個人食韓燒都可以試哂牛、豬同雞！
 

牛臉肉

牛臉肉顧名思義即係牛嘅臉頰肉，數量有限因而特別珍貴。特點係脂肪分佈平均，燒到半熟就食得。食落有牛油脂香，牛味亦相當濃郁，略嫌筋位較多。
 

炑八特製護心肉

護心肉即係豬橫膈膜附近嘅肌肉，每隻豬都係得少量。口感特別煙韌，最啱鍾意「有咬口」嘅為食友。點埋醬汁食肉香更突出。
 

炑八梨汁雞肉

食完紅肉可以食返Light啲嘅白肉，雞肉去骨後用韓國梨汁醃過，所以燒完依然感覺清新。記得唔好燒到過熟，咁就保留到嫩滑Juicy口感。燒完又未食嘅肉可以放喺鐵網上面，保持溫度。
 

是日紫菜包飯（Taste雜錦套餐 $98）

套餐包埋一碟紫菜包飯，紫菜包飯可以話係韓國嘅國民小食，帶獨特嘅麻油鹹香。餐廳會每日製造，確保大家食到新鮮、飽滿又材料豐富嘅紫菜包飯。
 

韓國大蝦（兩隻）（套餐+$25追加）

而且套餐可以追加唔同食物，好似豬大腸、牛小排同大蝦。大蝦燒嘅時候已經聞到非常誘人嘅香味，食落蝦肉亦有彈性。鍾意海鮮嘅朋友可以追加！
 

無限添加爐邊泡菜蛋（免費）

無限添加爐邊芝士（套餐+$25追加）

食韓式烤肉點可以少咗爐邊嘅美食呢？燒肉會免費提供泡菜蛋，而且係無限任添！想再「芝」味啲嘅話就要追加芝士粟米，就咁食得，用燒肉捲住拉芝亦得，一樣係無限添加㗎。
 

健康特色主食

慢煮安格斯牛柳拌飯（套餐配前菜 $68）

喺Food Court可能唔少人都想食個平靚正快餐，所以新店亦特別新增唔少拌飯選擇。當中最特別嘅係呢款加咗Super Food牛油果嘅慢煮安格斯牛柳拌飯。Creamy嘅牛油果估唔到同韓式辣醬又幾夾，撈飯一齊食香得嚟又少一份罪惡感。慢煮安格斯牛柳牛味濃郁有肉汁。
 

雪濃牛骨湯配飯（套餐配前菜 $72）

另一特別推介係暖笠笠嘅雪濃湯飯，雪濃湯喺韓國用內臟同牛膝，熬煮6小時再直送到港。奶白色嘅牛湯香甜而唔油膩，配飯食一流。
 

士多啤梨梳打（套餐+$8，單點$28）

所有套餐都可以加$8享用冷熱飲品一杯，好似柑橘特飲、柚子檸檬梳打、藍天使梳打等。呢杯士多啤梨梳打有吸引漸變賣相得嚟，飲落甜度適中又唔會覺得係人工味，可以一試。

炑八Taste
旺角太子道西193號新世紀廣場3樓食代館R2號
*午市（18:00前）免加一服務費，晚市（18:00後）另收加一服務費

文、相：Cathy