最近韓式紙盒吐司當道，銅鑼灣都新開咗一間！店主話因為喺韓國食過當地嘅吐司覺得唔錯，但口味只有煙肉及蛋等，略嫌太單調，所以就自創咗一系列混合港式元素口味嘅吐司，全部都好足料又打卡able！而且連吐司都選用自家製麵包配方，本身帶些少甜味，用牛油煎香後外脆內軟。
軟殼蟹親子滑蛋($68)
吐司放入經油炸嘅原隻軟殼蟹、炒滑蛋、葡萄黑醋醬及蟹籽，原隻軟殼蟹多肉而且炸得香脆，蟹籽亦增添口感。葡萄黑醋醬及泰國柑桔有助中和油炸嘅油膩感，係鐘意「相機食先」朋友嘅首選！
泡菜豚五花芝士滑蛋($53)
鐘意韓式口味嘅一定唔可以錯過呢個泡菜豚五花吐司～加咗香辣惹味嘅豚五花、芝士、炒滑蛋、炒香過嘅泡菜及新鮮泡菜，味道層次零舍豐富。
更多【新店直擊】： |
慢煮雞胸牛油果溫泉蛋($55)
使用慢煮技術，雞胸仍然保持嫩滑，味道帶淡淡檸檬香氣。另外加埋人氣Super food牛油果及溫泉蛋等配料，適合想食得有營健康嘅朋友。
黑松露大啡菇滑蛋($45)
選用原個大啡菇，多汁而且菇味香濃，加埋滑蛋同黑松露醬好match！
忌廉芝士醬香辣雞粒($38)
呢個小食香辣雞粒配上自己調忌廉芝士醬，醬汁加入檸檬成件事就無咁漏喇～
地址: 銅鑼灣希雲街28號地舖
文: Yanica
相、片: Calvin Kwok