造型呃like好緊要!靚靚聖誕蛋糕大集合(有片)
2017-12-13

聖誕節除咗要食聖誕大餐,仲要食聖誕蛋糕呀。間間餅店都陸陸續續推出聖誕限定款式,個個cake個樣都好鬼靚,點揀好?

少女系玫瑰水晶燈蛋糕  Bakery plus

呢個蛋糕,一拎出嚟,已經會令全場女生尖叫!真係好!鬼!靚!蛋糕頂放咗個玫瑰水晶球,仲有機關嘅添~ 將聖誕帽同雪花放喺特定嘅位置,個水晶球曉著燈㗎!夠晒浪漫呢。而蛋糕就唔算太甜,係莓果味嚟嘅,同樣都係好多女生杯茶呀。男士們、閏蜜們,識做啦,要預早一個星期訂呀咪話我唔提你。

Rilakkuma蛋糕 Harlan’s Cake Shop

呢度有無Rilakkuma嘅fans呢?有間餅店推出咗3款有Rilakkuma嘜頭嘅蛋糕,分別係藍莓芝士蛋糕、雙層抹茶芝士蛋糕同蜜糖卷蛋配夏威夷果仁夾心,雖然只係得塊牌,但都足以令粉絲心動了!

士多啤梨抹茶慕絲聖誕蛋糕 東海堂
 






呢間連鎖餅店今年都推出咗好多款聖誕造型蛋糕,睇你哋想揀樣定揀味啦。聖誕樹嗰款就係士多啤梨抺茶慕絲蛋糕嚟,特別選用日本京都宇治丸小山園抹茶,而cute cute嘅薑餅人同聖誕老人分別係朱古力mousse同士多啤梨雲呢嗱mousse。

3D聖誕樹蛋糕  聖安娜


屋企冇位擺棵聖誕樹?食返個巨型聖誕樹蛋糕一樣咁有氣氛嘅,仲要係3D嘅添,好有氣勢。外層係抹茶忌廉,底下仲有啲新鮮士多啤梨圍邊添。睇就幾靚嘞,不過負責切嗰個應該幾頭痕,究竟點先切得靚呢科科。人少少嘅話可以揀另一款細啲嘅,雜果薄脆蛋糕,中間個聖誕老人都好cute cute。

夢幻系蛋糕 Vive Cake Boutique

相信每位女士見到呢幾款蛋糕,都一定忍唔住大叫一句:「好靚呀!」呢三款蛋糕各有特色,好似左手邊嘅雙層蛋糕就係用咗香蕉牛油蛋糕、玉桂香蕉同海鹽焦糖牛油忌廉製成嘅。而行可愛風嘅馴鹿造型蛋糕就係以楓糖味為主,仲有行粉紅色路線嘅Baileys cheesecake。

朱古力焦糖脆脆蛋糕 Twinkle Baker Décor

呢款木頭蛋糕造型夠晒逼真,而頂層嘅聖誕樹就係由綠茶曲奇砌成,加埋以開心果同朱古力曲奇製成嘅裝飾,成個feel好夢幻。如果想自私食嘅就可以揀造型的骰嘅小蛋糕,四款口味分別有栗子、蘋果肉桂、綠茶同白朱古力。細細件,食晒都唔會太heavy(好似係)。

手工戚風蛋糕 La Famille

呢間蛋糕店最出名嘅就係戚風蛋糕,嚟到聖誕就特別推出咗四款限定口味,分別有宇治抹茶、冲繩黑糖栗子、雙重朱古力同士多啤梨。佢哋嘅cream,係選用北海道牧場直送嘅新鮮忌廉,口感零舍濃滑。想食嘅話記得要兩日前預訂呀。

聖誕天使蛋糕 Pacific Coffee

呢問coffee shop嘅聖誕蛋糕夠特別呀,呢個紅卜卜,好應節嘅,唔係士多啤梨喎,係石榴味呀!下層係雪芳海綿蛋糕,上層有棵迷你聖誕樹,影相打卡一流。另一款雪花形狀嘅雜苺芝士蛋糕,一樣咁有氣氛。

純素黑森林蛋糕 THE CAKERY

黑森林蛋糕成日都食啦,咁呢款又有咩特別先?原來佢哋嘅黑森林蛋糕係以無麩質純素朱古力蛋糕同純素忌廉整嘅,素食人士都可以盡情食。另一款蛋糕就以有機朱古力奶油忌廉勾畫木紋,配上開心果碎同糖皮磨菇,睇得又食得。想試嘅記住提早預訂呀。

雪糕蛋糕 Häagen-Dazs







最後梗係唔少得Häagen-Dazs嘅雪糕蛋糕啦,今年三款聖誕雪糕蛋糕都好精緻呀。好似有朱古力小鹿同白朱古力松樹嘅雪糕蛋糕。但講到最OP嘅,一定係由曲奇呍呢嗱同士多啤梨雪糕味製成嘅旋轉木馬雪糕蛋糕,粉藍色夠晒夢幻,見到係要大叫兩聲嘅,第一聲係因為真係好靚,第二聲係因為唔知點落手,由邊度切起好呀科科。

*蛋糕需要取餅日前最少三至四天預訂。


文:Crystal

關鍵字
聖誕節
蛋糕
Haagen Dazs
朱古力
慕斯
雪糕蛋糕
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2020-06-26
食豪啲啲 城中5間海鮮+肉扒父親節自助餐
2020-06-10
5月份好評餐廳十強
2020-06-05
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11