食肉獸注意！呢間全新日式燒肉放題專門店正式進駐銅鑼灣，餐廳以神秘嘅日本民間傳說為主題，將夏日晚上妖怪大遊行「百鬼夜行」故事注入店內，無論裝潢、設計同食物等細節均加入咗唔同嘅鬼怪元素，帶畀食客不一樣的燒肉體驗。
放題價錢跟入座時段而定，最平$298就可以食到，包括任食前菜、上等美國牛肉、豬肉、雞肉、海鮮、刺身、壽司及蔬菜，每人仲會送一份來自鹿兒島及宮崎嘅A4和牛拼盤啊。
有別於一般燒肉店以溫暖色調配合木材打造傳統日式風格，「燒鬼」室內設計以大量極深色調，如黑色、炭灰同深紅色等營造神秘色彩，亦掛上一幅幅描述「百鬼夜行」故事嘅日式畫作。
每人一份招牌必食嘅「牛鬼拼盤」，集合咗八款唔同和牛部位，包括前胸肉、胸腹肉、上小排肉、横隔肌、中腹肉、內側腹肉、上肩肉及罕見嘅腹脅肉，牛腹脅肉係靠近牛大腿根側嘅五花肉部位，味道比其他五花肉清爽，每隻和牛得8至10公斤嘅牛腹脅肉，好矜貴吓。係咁食和牛的確幾易膩，所以跟配三款自家製醬汁畀食客轉換口味，包括蘋果柚子紅酒燒汁、辣味噌醬同蔥油醬。
想食其他種類，可以考慮加$100享用熊本F1肉眼或西冷，相比起入口即溶嘅和牛，呢兩款肉口感就較結實，但肉味都幾濃厚。
更多【新店直擊】： |
菜單上嘅其他食物都係無限追加。刺身推薦帶子、甜蝦、三文魚及鰹魚，全部都厚切又新鮮，榮螺片山葵漬，大廚採用新鮮山葵製成嘅醬汁醃漬榮螺刺身，榮螺鮮甜味突出。
雖然係放題，其他日式料理質素都唔馬虎，如呢個柚子醬油和牛壽司及明太子醬帶子灸燒壽司，仲有過百款選擇㗎。
價錢 (每位成人):
下午5時30分 – 7時30分 星期一至五$298 星期六、日及公眾假期$308
下午7時30分 – 9時30分 星期一至五$388 星期六、日及公眾假期$398
下午9時30分 – 11時30分 星期一至五$348 星期六、日及公眾假期$358
地址: 銅鑼灣駱克道459-461號The L. Square9樓
文: Yanica
相、片: Calvin Kwok