西九文化區新開無敵海景餐廳 名人總廚主理 麻辣蜆意粉激有驚喜
2020-05-27

坐喺露天觀景平台,望住180度無遮擋嘅海景咁嘆cocktails同法式料理,簡直就好似去咗外國旅行咁。但原來香港都做到呀!最近喺西九文化區開咗間新餐廳,就有齊晒呢啲條件,兼且仲由曾接待過多位演藝名人,如發哥、Sammi,嘅本地意法料理名廚Ken Lau擔任行政總廚,甚有保證。

餐廳叫PANO,係全景(Panorama)嘅縮寫。店如其名,喺度可以觀賞到超廣闊嘅維港景色,毫無遮擋,而且仲係文化區內唯一一幢兩層高嘅獨立海景餐廳,無論係日景定夜景都咁靚,最啱去慶祝生日/紀念日。菜式方面主打Asian French料理,以本地同亞洲嘅食材,配合高級法國料理嘅擺碟風格同烹調藝術,睇得又食得。

當中最推介最有驚喜嘅,一定係麻辣蜆意粉。呢道意粉望落冇咩特別,但食落就相當有驚喜,絕對係「食」不可貌相呀!Ken特選川椒,浸喺意大利橄欖油度一日,再用低溫慢煮嘅方式,當川菜滾油咁去滾啲川椒味出嚟融合落橄欖油內。彈牙嘅意粉索晒啲汁,食落麻比辣香,好有層次。不過如果想食到呢道菜,就要叫只限晚巿供應嘅「名人tasting menu」喇。

呢個tasting menu有十道菜或者七道菜選擇,全部都係餐廳重點主打嘅菜式,由開胃前菜到海鮮、肉類同甜品都有。好似蘋果木煙燻西蘭花燉蛋配馬糞海膽咁,就有陣陣煙燻香傳出,海膽鮮甜,嗶到落底,就有又滑又creamy嘅西蘭花燉蛋,蛋香中滲出菜香。

清酒煮貴妃蚌配法國魚子醬及香蒜泡沫則選用本地嘅貴妃蚌,以牛油同日本清酒用日式手法烹調,面層加上各式嘅配料同調味,更能突顯貴妃蚌嘅清甜同鮮香。

 慢煮48小時和牛肋肉及和牛面頰肉

當然,餐廳都有提供多款單點菜式嘅。平時鍾意生蠔嘅朋友,不妨試下法國生蠔他他,幾有特色㗎。按季節選用最肥美嘅法國生蠔,蠔肉切粒再混入橄欖油、胡椒調味,配埋牛油果醬同日本柚子汁、檸檬泡沫同魚子醬,啖啖都鮮味十足,層次豐富,包你未試過咁樣食蠔!

 西班牙紅蝦手打意大利蛋麵,蝦頭仲有好多膏呢

甜品亦都充滿心思,Chef Ken將經典雞尾酒Pina Colada雪葩演變成甜品,兩球雪葩分別係椰子同菠蘿味,前者椰香濃郁,後者清甜,甜品面層仲有椰絲碎、糖霜蛋白脆片同液態氮雪糕等,happy ending~

PANO
地址:尖沙咀博物館道24-26號西九文化區藝術公園1樓1號舖

文:Kar
相、片:Tom Li

關鍵字
尖沙咀.西九
西九文化區
fusion
海景
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2020-06-26
食豪啲啲 城中5間海鮮+肉扒父親節自助餐
2020-06-10
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11
送A4和牛拼盤!最平$298任食兩小時 銅鑼灣新開鬼怪主題日式燒肉放題店
2020-06-22