上次介紹完行東洋山前有咩搵食好推介，今次就到位於大嶼山嘅人氣行山地點大東山同鳳凰山啦！呢兩座山分別係全港第二同第三高嘅山峰，遠眺景觀優美。起點可以選擇喺東涌出發以及東涌或梅窩碼頭離開，因為秋冬日落時間早，所以建議大家最遲早上10點左右就喺東涌起步會比較好，今次就介紹幾間行完山嘅好嘢食畀大家喇～
(左) 大東山、(右)鳳凰山
行大東山主要路線有三條，而最易嘅路線係由伯公坳沿鳳凰徑上山，雖然話係最易，對行山新手嚟講都會有少少難度，所以大家要注意安全呀。交通方面首先喺東涌地鐵站隔離嘅巴士總站搭3M往大嶼山嘅巴士，於伯公坳站落車；離開時可以原路折返，都係於伯公坳落山，過對面馬路搭返往東涌方向嘅11、3M或者23號巴士就得，或者都可以選擇直接行至梅窩碼頭乘船離開；鳳凰山亦同樣可以喺伯公坳出發，經鳳凰徑落昂坪離開。
日式鍋物放題 鍋處
行完山消耗咁多體力，食放題就最好不過喇！東涌呢間日式鍋物放題係一個唔錯嘅選擇，最招牌係壽喜燒湯底，使用秘製醬汁，香甜惹味。放題就分六個等級，由最平上選美國牛肉到日本黑毛和牛套餐都有，豐儉由人。除咗牛肉，出面自助區另有多款蔬菜、丸類及雪糕任食，啱晒大胃王呀。
圖: ritamahf
遠離鬧巿泰菜 金泰屋 
想繼續遠離塵囂，遠離東涌鬧巿呢間泰國菜氣氛唔錯㗎，裝修以泰國傳統木屋為概念，有室內同半露天座位～食物方面都好正宗，大蝦冬蔭功湯非常足料，大蝦新鮮彈牙，重有好多秀珍菇、香茅同車厘茄，辣度適中偏酸；另外推薦泰式炭火串燒，即叫即燒熱辣辣，醬汁都好香濃，花生味突出。最後當然要食埋個芒果糯米飯做甜品先最滿足喇～
圖: lowaiwa321
梅窩海鮮大排檔 華記海鮮飯店
如果選擇行至梅窩碼頭離開嘅朋友，可以試下呢間海鮮大排檔。望住梅窩夜景，食住海鮮配啤酒簡直係享受。必試椒鹽九肚魚，口感滑捋捋，炸漿又夠鬆脆，點埋個喼汁真係食多多都無問題；避風塘炒蜆新鮮惹味。特別一提個乾炒牛河都好出色，乾身又夠鑊氣，最緊要係唔算油，牛肉份量又多，可以話係一碟出色嘅炒牛河！
圖：自家製酸種麵包 Village Bakery
行完山唔想食得太heavy，去呢間人氣麵包店食個包嘆杯咖啡都唔錯㗎。裝修好有外國風格，主打手工麵包，人氣自家製酸種麵包，酸種天然酵母發酵出嚟嘅麵包更有嚼勁，入面嘅合桃、杏脯同提子更添口感。提子玉桂麵包都值得一試，包身好軟熟，玉桂味突出而且唔會太甜，另外重有唔少蛋糕類質素都唔錯。
圖: F. Teresa
文: Yanica
編：Kar