去荃灣南豐紗廠有咩好食？又去Cafe？不如試下呢間創意粵菜新出嘅夏日水果宴，佢哋將多款盛夏當造嘅水果融入不同菜式，而調味同烹調方法就以亞洲菜為靈感。選用顏色吸睛嘅水果除咗想睇落繽紛啲，亦係為咗畀食客品嚐到不同嘅清新感，味道層次又豐富啲。

蜜瓜燉老雞螺頭湯（$48/位［盅］，$288/4-6位［原個］）

先嚟個蜜瓜燉老雞螺頭湯潤潤喉，雖然參考冬瓜盅做法可以原個蜜瓜上（需２日前預訂），但盅上就可以免預訂。用上海螺頭、豬腿肉、排骨、老母雞、瑤柱、蜜瓜同南杏燉4小時，足料之餘令蜜瓜清甜嘅味道完全融入湯水之中，而且唔覺得油膩。

香炸荔枝蝦丸（$72）

如果要將蝦丸形象大翻新可以點做？呢道香炸荔枝蝦丸就示範咗喇。將原粒荔枝肉釀入自製嘅麻辣味蝦丸後，喺表層印上紅色脆米，炸起後插上薄荷葉扮枝葉，令蝦丸完美變成荔枝造型。入口外脆內彈，微辣之中又滲出少少果肉嘅甜味，畀人恰到好處嘅感覺。

紅肉火龍果炸奶卷（$72）

炸奶卷以紅肉火龍果取代傳統嘅蜜瓜，而紅肉比白肉火龍果更清甜；加上用威化紙同越南米網紙包著混合火龍果汁嘅「果奶條」快速炸成，既保留到內裡軟綿嘅質感，外層又會更鬆脆，食起嚟冇咁黏糯。

柚子手撕雞（$90）

開胃冷盤有柚子手撕雞可以選擇，以泰式木瓜沙律為靈感，將微鹹嘅雞絲、柚子肉、芫荽同芹菜加入辣椒絲、麻油等調味料撈勻，食落有咬三文魚籽嘅「爆珠」感覺。

鮮菠蘿豬頸肉 （$80）

鍾意食燒物嘅朋友好多時都會點燒菠蘿同燒豬頸肉，依家可以一道菜食晒喇！豬頸肉用偏甜嘅日本燒汁調味再烤到微焦，夾埋切到厚度相同嘅燒菠蘿，可以互相中和油膩感同酸度。想惹味啲可以蘸埋混合菠蘿汁嘅自家製泰式菠蘿雞醬，增加東南亞風味又辣辣哋。

木瓜紅燒牛肋肉（$88）

紅燒牛肉一般都畀人味道濃重嘅感覺，夏天食會太heavy，但而家將木瓜打成蓉取代紅燒汁炆煮牛肋肉，令肉變得軟腍之餘，味道亦清甜好多。

百香果一夜干（$128）

將日本鯖魚經醃漬同風乾後，用中式半油炸嘅方法浸熟，做出嚟好似日式烤焗咁，同樣有脆面又鎖起肉汁。配埋新鮮百香果一齊食，酸甜解油又可以提鮮。

點茶公館
地址：荃灣白田壩街45號南豐紗廠1樓109-110號舖
期間限定：暫定至9月 

文、相、片：Cathy.Ｃ