來自美國加州的連鎖快餐店In-N-Out Burger,再次來到香港搞快閃pop-up店,喺油麻地一間餐廳內限時大賣品牌最具人氣嘅3款漢堡餐,吸引一眾foodie大排長龍。
喺全球超過300間分店嘅In-N-Out Burger快餐店,於1948年由一對夫婦創立,主打3款漢堡包,最大特色就係漢堡中間並非加入茄汁,而改為千島醬,令漢堡味道更有層次,深得漢堡迷歡心。
圖:官網圖片
今次快閃供應品牌最具人氣嘅漢堡、芝士漢堡以及多寶多堡(雙層芝士漢堡),限量約250個。客人更可額外揀選自己喜愛嘅style,animal style即係有烤洋蔥、酸瓜、芥末及千島醬,另一款protein style則以生菜代替漢堡包。
客人可選堂食或外賣,惟堂食座位不多,而且需自行回收食物交畀店員。
今次品牌主打3款漢堡,最貴嘅多寶多堡連套餐都只係$35,價錢尚算抵食。
芝士漢堡,與其他漢堡包一樣,入面有漢堡、芝士、番茄及生菜,最特別係在於醬汁並非一般茄汁,而係惹味千島醬。
更多【飲食潮流】: |
仲有品牌自家T-shirt賣添!
過往,In-N-Out Burger亦來港開快閃pop-up店,好似2012年喺北角、2015年喺銅鑼灣咁,更謠傳開店消息,可惜之後無晒聲氣,令一班burger迷苦等多年。今次重臨香港,唔知又有無開店嘅最新消息呢?
開飯仔訪問咗In-N-Out Burger嘅負責人Eric,「今次快閃首次踏足九龍區,原因係要測試一下市場反應,並考慮緊開舖選址,所以而家講落實開店嘅事情言之尚早。」粉絲們,你哋要繼續等待喇!
In-N-Out Burger快閃店
地址:油麻地彌敦道448-452A號眾坊街文豪閣地下D舖 (中華書局旁)
文:Joy