經典豉油西餐重現 必試火焰鐵板七打扒(有片)
2019-01-11

近兩年多咗唔少老店回歸,包括呢間喺銅鑼灣專賣港式西餐嘅扒房:金雀餐廳原班人馬坐陣,裝修亦係復古風格,加上模仿電影《花樣年華》嘅卡位,情懷依舊。主打嘅扒餐當中推介火焰鐵板七打扒,火焰效果吸引之餘,水準亦相當高!
 


(圖: 李純恩微博

香港情位於銅鑼灣一間樓上舖,由金雀餐廳、亦即係王家衛電影《花樣年華》、《2046》取景地嘅原班人馬主理,廚師同菜單都不變。作家李純恩同藝人劉嘉玲亦係座上客。
 


火焰鐵板七打扒(火焰七打扒套餐二位用 $598)

嚟到扒房當然要鋸扒,當中最有特色嘅就要數到呢份火焰鐵板七打扒!侍應會喺席前完成,喺熱辣辣嘅牛形鐵板上塗鹹牛油、加牛柳煎香、加上配菜、倒冧酒及點火,最後淋上醬汁。
 


七打扒係Chateaubriand steak嘅音譯,即係牛柳嘅中間位,相當珍貴。而呢度用嘅係新西蘭牛柳芯,脂肪比例極低但入口非常軟腍,嫩滑而富肉汁。而且因為加咗冧酒,燒過後只留低酒香,配微辣惹味嘅黑椒汁味道啱啱好。套餐另有餐包、餐湯、大蝦沙律、沙嗲串燒、甜品及餐茶,非常抵食。
 



西冷牛扒餐($200)

西冷牛扒同樣用鐵板奉上,倒上醬汁立刻發出咋咋聲,係細細個食豉油西餐嘅回憶!西冷牛扒肉質比較結實,帶少少韌有咬口,富肉香,配香口嘅蘑菇汁都唔錯。如果想肉味再濃郁啲嘅話就可以點美國西冷扒餐($260)。
 


芝士焗龍蝦餐($290)

唔食牛嘅話呢度仲有好多選擇,呢份芝士焗龍蝦加上炒蛋、洋蔥、煙肉、Mozzarella同車打兩款芝士焗香,一上枱就聞到芝士香。食落龍蝦肉相當彈牙,而且芝士同蛋等配料無蓋過龍蝦鮮味,層次豐富。
 

更多【新店直擊】:
1. 天水圍T Market小食街新登場 食勻麻辣燙+小食+蛋糕奶茶
2. 觀塘新開酒店半自助餐 任食即開生蠔、長腳蟹
3. 日本拉麵大師林隆臣創立品牌進駐中環 必試濃厚白湯拉麵+厚切叉燒

 

羅宋湯(單點$45)

每份套餐都會附上羅宋湯或忌廉雞湯,特別推介羅宋湯,用牛骨同大量蔬菜熬煮8至9個鐘,聞起嚟香味相當醒胃,而且啖啖都係精華。略嫌就咁飲會有少少鹹,配餐包就啱啱好啦。
 


大蝦沙律($190)

沙律碟摸上手係凍嘅,可以保持沙律溫度,細心位值得一讃。沙律係經典嘅味道,大蝦肉質結實,配搭起嚟感覺清爽。其他經典菜式推介有廣受歡迎嘅焗豬扒飯餐($170),同老一輩最愛嘅華盛頓青衣柳(全餐 $178)。而為咗照顧素食者,呢度亦有素小食及飯麵。
 


香港少爺芭菲($75)

最後又點少得甜品呢,呢度芭菲嘅名都相當有趣:香港少爺、風流寡婦、美女郎等,其實都係雪糕、啫喱、雜果為主嘅配搭,只係唔同名就係唔同顏色嘅配搭。雖然雪糕味道當然比唔上外國名牌出品,但見到呢杯咁色彩繽紛又豐富嘅芭菲,自然就會興奮到好似返咗去童年咁,係回憶嚟嘅。
 








香港情
地址:銅鑼灣駱克道491-499號京都廣場6樓




文:Cathy
相、片:Tom Li

關鍵字
銅鑼灣
扒房
豉油西餐
七打扒
金雀餐廳
香港情
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
6天前
尖沙咀新商場開幕 過江龍餐廳一覽
2019-10-11
【特約分享】食魚生轉運 三種好意頭日本海產介紹
2019-10-14
亞洲首間 Tiffany Blue Box Café 打卡必到!三層架下午茶 + 棉花糖雞尾酒
2019-10-08
高CP值火鍋放題 (1)
7天前